ཡེ་མིན་བདེ་འཇགས་དཔོན་རིགས་ཀྱིས་ཚེས་ཉེར་བརྒྱད་ཉིན་གྱི་དགོང་མོར་བཤད་རྒྱུར། ཡེ་མིན་ཤར་ལྷོ་ཕྱོགས་ཀྱི་པེ་ཏཱ་ཞིང་ཆེན་གྱི་དམག་དོན་ཞིབ་བཤེར་ས་ཚིགས་གཉིས་ལ་ཉིན་དེའི་དགོང་མོར་རང་སྲོག་གཅོད་པའི་འགས་གཏོར་འཇབ་རྒོལ་ཐེབས་ཏེ། ཉུང་མཐར་ཡང་སྲིད་གཞུང་གི་དམག་མི་བཅུ་གཅིག་རྐྱེན་ལམ་དུ་ཤོར་བ་དང་། མི་མང་བོར་རྨས་ཕོག་ཟེར།

པེ་ཏཱ་ཞིང་ཆེན་གྱི་མིང་བཤད་མི་འདོད་པའི་བདེ་འཇགས་དཔོན་པོ་ཞིག་གིས་གསར་འགོད་པར་བཤད་རྒྱུར། པེ་ཏཱ་ཞིང་ཆེན་གྱི་ལཱ་ཏཱ་གྲོང་རྡལ་གྱི་དམག་དོན་ཞིབ་བཤེར་ས་ཚིགས་གཉིས་ལ་ཚེས་ཉེར་བརྒྱད་ཉིན་གྱི་དགོང་མོར་བསྟུད་མར་རང་སྲོག་གཅོད་པའི་རླངས་འཁོར་འགས་གཏོར་འཇབ་རྒོལ་ཐེབས་པ་དང་། འཇབ་རྒོལ་མཁན་གྱིས་འགད་རྫས་གང་དྲུད་པའི་རླངས་འཁོར་བསྐོར་ནས་ཞིབ་བཤེར་ས་ཚིགས་ནང་དུ་ཐོན་རྗེས་འགས་གཏོར་བཏང་བ་རེད། བསྡོམས་པས་སྲིད་གཞུང་གི་དམག་མི་བཅུ་གཅིག་རྐྱེན་ལམ་དུ་ཤོར་བ་དང་། མི་བཅུ་གསུམ་ལ་རྨས་ཕོག འཇབ་རྒོལ་མཁན་ཡང་ཤི་ཟེར།

དཔོན་པོ་དེས་བཤད་རྒྱུར། དམག་མི་མང་བོའི་རྨས་སྐྱོན་ཅུང་ཚབས་ཆེན་ཡིན་པས་ཤི་བོའི་ཁ་གྲངས་སྔར་ལས་ཇེ་མང་དུ་འགྲོ་ངེས་རེད་ཟེར། ཁོས་བཤད་རྒྱུར། འགས་གཏོར་མ་བྱུང་གོང་། ཡེ་མིན་སྲིད་གཞུང་དམག་དཔུང་གིས་ལཱ་ཏཱ་གྲོང་རྡལ་དང་དེའི་ཉེ་འགྲམ་གྱི་རྟེན་གཞིའི་རྩ་འཛུགས་ཀྱི་དྲག་ཆས་ཉེས་ཅན་སྦས་སྐོང་བྱེད་སར་ཕར་རྒོལ་བྱེད་པར་གྲ་སྒྲིག་བྱེད་བཞིན་ཡོད་པས། ཐེངས་འདིའི་འཇབ་རྒོལ་དེ་རྟེན་གཞི་རྩ་འཛུགས་ཀྱིས་བཟོས་པ་ཡིན་སྲིད་ཟེར།