ཉེ་ཆར། ལྷོ་ནུབ་མི་རིགས་སློབ་ཆེན་གྱི་དགེ་རྒན་ཆེན་མོ་ཐུབ་བསྟན་ཕུན་ཚོགས་ལགས་ཀྱིས་བརྩམས་པའི་བོད་ཀྱི་ལོ་རྒྱུས་ཀྱི་བྱིས་པའི་ཀློག་དེབ་ཐོག་མ་སྟེ《བོད་ཀྱི་ལོ་རྒྱུས་བྱིས་པའི་དགའ་སྟོན》ཞེས་པ་དེ་བོད་ལྗོངས་མི་དམངས་དཔེ་སྐྲུན་ཁང་ནས་པར་བསྐྲུན་འགྲེམ་སྤེལ་བྱས་ཤིང་། ཐེངས་འདིར་འགྲེམ་སྤེལ་བྱས་པའི《བོད་ཀྱི་ལོ་རྒྱུས་བྱིས་པའི་དགའ་སྟོན》དེབ་གསུམ་པའི་ནང་དུ་གཙོ་བོ་ས་སྐྱ་དང་ཕག་གྲུ་སྲིད་དབང་སྐབས་ཀྱི་བོད་ཀྱི་ལོ་རྒྱུས་ཤེས་བྱ་དག་དོན་འདུས་ཤིང་གོ་སླ་བའི་ཚིག་གི་སྦྱོར་བས་བཀོད་པའི་ཁར།  ཡིག་རིས་སྤེལ་མའི་ལམ་ནས་ལོ་རྒྱུས་མི་སྣ་དང་ལོ་རྒྱུས་དོན་རྐྱེན་སོགས་གསལ་བོར་བཀོད་འདུག་པས། བོད་རིགས་བྱིས་པ་རྣམས་ལ་བོད་ཀྱི་ལོ་རྒྱུས་ལྟ་ཀློག་དང་རྒྱུས་ལོན་བྱེད་པར་མཐུན་རྐྱེན་ལེགས་པོ་ཞིག་བསྐྲུན་པར་མ་ཟད། ཀློག་དེབ་ནང་གི་རི་མོ་ཕུན་སུམ་ཚོགས་པས་བྱིས་པ་རྣམས་ཀྱི་དཔེ་ཀློག་གི་སྤྲོ་བ་སྐྱེད་སྲིང་བྱེད་ཐུབ་ཅིང་། བོད་ཀྱི་ལོ་རྒྱུས་ཤེས་བྱར་བག་ཆགས་ཟབ་མོ་ཞིག་ཆགས་ཐུབ་པ་རེད།