ཟླ་བ3པའི་ཚེས11ཉིན་གྱི་སྔ་དྲོར།ཐུན་མོང་དུ་མཛེས་སྡུག་སྐྱེ་ཁམས་ཀྱི་དཀར་མཛེས་ཁུལ་བསྐྲུན་ནས་འཆམ་མཐུན་བདེ་སྐྱིད་ཀྱི་འཚོ་བ་མཉམ་དུ་རོལ་ཆེད།རང་ཁུལ་གྱིས་ཐེངས་དང་པོའི་སྐྱེ་ཁམས་ཉིན་མོའི་མཛད་སྒོ་དེ་དར་མདོའི་མཛའ་གཞས་ཐང་ཆེན་དུ་སྤེལ་བ་རེད།ཁུལ་ཨུའི་ཧྲུའུ་ཅི་ཧུའུ་ཁྲང་ཧྲེང་མཛད་སྒོའི་ནང་ཞུགས་ནས་ཤིས་ཚིག་འབུལ།
    ཧུའུ་ཁྲང་ཧྲེང་གིས་མཛད་སྒོའི་ཤིས་ཚིག་ནང་གསུངས་དོན།ཟླ་བ3པའི་ཚེས11ཉིན་ནི་ཁུལ་ཨུ་དང་ཁུལ་སྲིད་གཞུང་གིས་གཏན་ཁེལ་བྱས་པའི་དཀར་མཛེས་ཁུལ་གྱི་སྐྱེ་ཁམས་ཉིན་མོ་ཡིན།དམིགས་ཡུལ་ནི་སྤྱི་ཚོགས་ཡོངས་ཀྱིས་ཐུམ་མོང་དུ་སྐྱེ་ཁམས་ཀྱི་འདུ་ཤེས་བཅངས་ནས་འཆམ་མཐུན་གྱི་འབྱུང་འགྱུར་གསར་སྐྲུན་ཆེད་ཡིན།ད་ལོའི་བྱེད་སྒོའི་བརྗོད་བྱ་གཙོ་བོ་ནི་ཐུན་མོང་དུ་མཛེས་སྡུག་སྐྱེ་ཁམས་ཀྱི་དཀར་མཛེས་ཁུལ་བསྐྲུན་ནས་མཉམ་དུ་འཆམ་མཐུན་བདེ་སྐྱིད་ཀྱི་འཚོ་བ་རོལ་ཞེས་པ་དེ་ཡིན།དཀར་མཛེས་ཁུལ་ཉིད་ཤམ་བྷ་ལའི་ལྟེ་གནས་ས་ཁུལ་དུ་ཆགས་ཡོད་པ་དང་།ས་གཞི་བརྒྱ་ཆ་97ཡན་ལ་རང་བྱུང་རྩྭ་ཐང་དང་གདོད་མའི་ནགས་ཚལ་གྱིས་ཁེབས་ཡོད།འབྲི་ཆུའི་སྟོད་རྒྱུད་ཀྱི་གལ་ཆེ་བའི་སྐྱེ་ཁམས་སྲུང་ཡོལ་དང་།འཛམ་གླིང་ཐོག་རང་བྱུང་སྐྱེ་ཁམས་ཆེས་ཆ་ཚང་།གནམ་གཤིས་དྲོ་གྲང་གི་ཧེ་བག་ཆེས་ཆེ་བ།སྲོག་ཆགས་དང་རྩི་ཤིང་གི་སྐྱེ་རྒྱུད་ཐོན་ཁུངས་ཆེས་རྒྱ་ཆེ་ཤོས་བཅས་ཡིན་པའི་ས་ཁུལ་ཞིག་ཡིན་པར་མ་ཟད།དཀར་མཛེས་ཁུལ་ཉིད་ད་དུང་སྐྱེ་ཁམས་ཉམས་ཞན་གྱི་ས་ཁུལ་དང་།ཞིང་འབྲོག་སྣོལ་འདྲེས་སུ་གྱུར་པའི་ཉམས་ཞན་གྱི་ས་ཁུལ།ས་གཤིས་ཆགས་ཚུལ་རྙོག་དྲ་ཆེ་བ།ས་རྒྱུ་ཞན་པ།གནམ་གཤིས་ཆ་རྐྱེན་ཞན་པ།རང་བྱུང་གནོད་སྐྱོན་མང་བ།ས་ཆུ་ཤོར་བའི་གནོད་སྐྱོན་ཚབས་ཆེན་སོགས་ཡིན་པའི་ཐོག་ད་དུང་ཤིང་ནགས་གཅོད་དྲག་ནས་རྗེས་ཤུལ་ངན་པ་ཐེབས་པ་དང་།ནོར་ཕྱུགས་མང་པོ་འཚོ་ནས་རྩྭ་ཐང་བྱེ་འགྱུར་འགྲོ་བ་སོགས་ཀྱི་གནོད་སྐྱོན་གྱིས་སྐྱེ་དངོས་ལ་སྣ་མང་རང་བཞིན་གྱི་གནོད་སྐྱོན་ཧ་ཅང་ཆེན་པོ་བཟོས་ཡོད་སྟབས།ཁུལ་ཡོངས་ཀྱི་སྐྱེ་ཁམས་ཁོར་ཡུག་དེ་འགྲན་རྩོད་ཆེན་པོ་དང་འཕྲད་པ་རེད།དེར་བརྟེན་ང་ཚོས་ཐོག་མཐའ་བར་གསུམ་དུ་སྐྱེ་ཁམས་ཀྱིས་ཁུལ་འཛུགས་རྒྱུའི་འཕེལ་རྒྱས་ཀྱི་འཐབ་ཇུས་རྒྱུན་འཁྱོངས་བྱས་ནས།ཁམས་པའི་དྭངས་གཙང་གི་ངོ་བོ་སྲུང་འཛིན་བྱས་ནས་ལྗོངས་རྒྱུ་དང་།སྐྱེ་ཁམས་ནུས་ཁུངས།མཐོ་སྒང་གི་ཁྱད་ཆོས་ལྡན་པའི་ཞིང་འབྲོག་ལས་རིགས་སོགས་འཕེལ་རྒྱས་བཏང་ཏེ་དཀར་མཛེས་ཁུལ་གྱི་མི་དམངས་ཕྱུག་འགྱུར་ཡོང་བར་བྱེད་དགོས།ཁུལ་ཡོངས་ཀྱི་གཞུང་ཞབས་ལས་སྒྲུབ་པས་རང་འགན་གཙང་སྒྲུབ་བྱེད་པ་དང་།སྤྱི་ཚོགས་ཡོངས་ཀྱིས་གཅེས་སེམས་འཆང་བ།རྒྱ་ཆེ་བའི་ཡུལ་མི་རྒན་རབས་ཀྱི་ནུས་ཤུགས་གང་ཡོད་འདོན་ན།ང་ཚོའི་དཀར་མཛེས་ཁུལ་དེ་མཛེས་སྡུག་སྐྱེ་ཁམས་དང་འཚོ་བར་འཆམ་མཐུན་བདེ་སྐྱིད་ཡོང་ཐུབ་ངེས་ཡིན་པའི་ཡིད་ཆེས་བརྟན་པོ་ང་ཚོ་ལ་ཡོད།
    མཛད་སྒོའི་ནང་དང་བླང་པའི་འཐུས་ཚབ་ཀྱིས་ཁོར་ཡུག་སྲུང་སྐྱོང་གི་གྲོས་གཞི་འདོན་ཡིག་སྒྲོག་སྦྱོང་བྱས་པ་དང་།མཛད་སྒོ་སྤེལ་འགོ་ཚུགས་པའི་ནང་ཞུགས་མཁན་འགོ་ཁྲིད་ཀྱིས་མང་ཚོགས་དང་མཉམ་དུ་དྲིལ་བསྒྲགས་འགྲེམ་སྟོན་པང་ལེབ་ལ་གཟིགས་ཞིབ་གནང་བ་རེད།
    ཁུལ་སྐྱེ་ཁམས་དཔལ་ཡོན་འཛུགས་སྐྲུན་ཨུ་ཡོན་གྱི་གྲུབ་མིའི་སྡེ་ཚན་གྱི་འགོ་ཁྲིད་གཙོ་བོ་དང་།རྫོང་སོ་སོའི་ལས་བགོས་འགན་གཉེར་གྱི་རྫོང་དཔོན་གཞོན་པ།ཁོར་ཡུག་སྲུང་སྐྱོང་ཅུས་ཀྱི་ཅུས་ཀྲང་།ཁུལ་གྱི་གཙོ་གནད་ཁེ་ལས་ཀྱི་འགན་ཁུར་མི་སྣའི་འཐུས་ཚབ།ཁོར་ཡུག་སྲུང་སྐྱོང་གི་དང་བླངས་པ།དར་མདོ་རྫོང་འདུས་སྡེ་ཁུལ་གྱི་འཐུས་ཚབ།མི་རིགས་ཁག་གི་མང་ཚོགས་འཐུས་ཚབ་བཅས་དང་མཚམས་སྦྱོར་གསར་འགོད་པ་བཅས་མཛད་སྒོའི་ནང་ཞུགས་པ་རེད།
    ཁུལ་ཁོར་ཡུག་སྲུང་སྐྱོང་ཅུས་དང་ཁུལ་ནགས་ལས་ཅུས།ཁུལ་ཕྱུག་འབྲོག་ཅུས།འཕེལ་རྒྱས་བཅོས་བསྒྱུར་ཨུ་ལྷན།ཁུལ་ཞིང་ལས་ཅུས་སོགས་ཁུལ་འབྲེལ་ཡོད་སྡེ་ཁག་མཛད་སྒོ་ནང་ཞུགས་པར་མ་ཟད་རང་ཉིད་ལས་ཁུངས་ཀྱི་འགན་འཁྲིར་བརྟེན་ནས་ཁོར་ཡུག་སྲུང་སྐྱོང་སྐོར་གྱི་ཁྲིམས་སྲོལ་དང་ཤེས་བྱ་དྲིལ་བསྒྲགས་དང་མང་ཚོགས་ལ་དྲིལ་བསྒྲགས་ཡིག་རིགས་བཀྲམ་པ་རེད།