ཟླ་བ3པའི་ཚེས13ཉིན་གྱི་སྔ་དྲོར།སྐབས་བཅུ་གཉིས་པའི་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་གྲོས་ཚོགས་ཐེངས་གཉིས་པས་མཇུག་བསྒྲིལ་བ་རེད།ཚོགས་ཆེན་མཇུག་བསྒྲིལ་རྗེས་རྒྱལ་སྲིད་སྤྱི་ཁྱབ་ཁང་གི་ཙུངལི་ལི་ཁེ་ཆང་གིས་མི་དམངས་ཚོགས་ཁང་ཆེན་མོའི་གསེར་མདོག་ཚོམས་ཆེན་དུ་རྒྱལ་ཁབ་ཕྱི་ནང་གི་གསར་འགོད་པ་དང་མཇལ་འཕྲད་གནང་བས་མ་ཚད་དྲི་བར་ལན་གནང་བ་རེད།དཔལ་འབྱོར་འཕར་ཚད་དང་འབྲེལ་བའི་གནད་དོན་ལ་ལན་གནང་བའི་ཚེ་ལི་ཁེ་ཆང་གིས་ང་ཚོས་དཔལ་འབྱོར་འཕར་ཚད་དེ་བརྒྱ་ཆ7.5ཡས་མས་སུ་གཏན་འཁེལ་བྱ་རྒྱུའི་དམིགས་ཡུལ་ནི་ལས་ཞུགས་ལ་འགན་སྲུང་དང་དམངས་འཚོར་ཕན་པ།གྲོང་ཁྱེར་དང་གྲོང་གསེབ་སྡོད་དམངས་ཀྱི་ཡོང་འབབ་འཕར་བར་བསམ་བློ་གཏོང་བ་ཡིན།ང་ཚོས་དོ་ཁུར་བྱ་རྒྱུ་ནི་གྲངས་ཀའི་རྒྱབ་ཏུ་གནས་པའི་དམངས་འཚོ་དང་།འཕར་སྣོན་ཡོང་བའི་རྒྱབ་ཀྱི་ལས་ཞུགས་ཡིན།ང་ཚོས་ན་ནིང་ལོར་དུས་ཐུང་ནང་དུ་སྲིད་ཇུས་ཀྱིས་དཔལ་འབྱོར་ལ་སྐུལ་འདེད་གཏོང་བའི་ཐབས་མ་སྤྱད་པའི་གནས་བབ་འོག་ཏུ་དཔལ་འབྱོར་གྱི་སྔོན་དཔག་དམིགས་ཡུལ་མངོན་འགྱུར་ཡོང་ཐུབ་ཡོད་པས་ད་ལོ་ཡང་འགྲུབ་ཐུབ་ངེས་རེད།ད་ལོར་དེ་བས་སྙོག་འཛིང་ཆེ་བའི་རྒྱུ་རྐྱེན་ཡོད་སྲིད་པ་ངས་ཀྱང་ཁས་ལེན་བྱེད་ཀྱི་ཡིན་ཞེས་གསུངས་པ་དང་།
    ལི་ཁེ་ཆང་གིས་གསུངས་རྒྱུར།ལས་ཞུགས་བྱེད་མ་ཐུབ་ན་ཡོང་འབབ་མེད་པ་རེད་ལ་སྤྱི་ཚོགས་ཀྱི་རྒྱུ་ནོར་ཡང་ཇེ་མང་དུ་གཏོང་དཀའ་བ་རེད།ངས་གཞི་རིམ་དུ་ལས་ཞུགས་གཅིག་ཀྱང་བྱེད་མེད་པའི་ཁྱིམ་ཚང་ལ་འཚམས་འདྲི་བྱས་མྱོང་།ཁྱིམ་ཚང་གཅིག་ལ་མི་གཅིག་གིས་ཀྱང་ལས་ཀ་རག་མེད་ན་འཚོ་བའི་གསོན་ཤུགས་ཉམས་ཚར་ཞིང་རེ་བ་མེད་པ་རེད།ད་ལྟ་རང་རེའི་རྒྱལ་ཡོངས་ཀྱི་ལོ་རེར་གྲོང་ཁྱེར་དང་གྲོང་རྡལ་གྱི་ངལ་རྩོལ་ནུས་ཤུགས་མི་ཁྲི1000ཡན་གསར་འཕར་ཡོང་བ་བྱ་དགོས་པས་མ་ཚད།ད་དུང་མི་ཁྲི་དྲུག་བརྒྱ་བདུན་བརྒྱའི་ཞིང་སྡེའི་ངལ་རྩོལ་ནུས་ཤུགས་གྲོང་ཁྱེར་དུ་ཟུར་ལས་སྒྲུབ་སར་ཡོང་མཁན་ཚོ་ལ་ཡང་བར་སྟོང་ངེས་ཅན་ཞིག་གཞག་དགོས་པ་རེད།དེར་བརྟེན།ལུགས་དང་མཐུན་པའི་རྒྱལ་དམངས་ཐོན་སྐྱེད་ཀྱི་རིན་ཐང་བསྡོམས་འབོར་གྱི་འཕར་ཚད་ཅིག་དགོས་པ་རེད།རྒྱལ་དམངས་ཐོན་སྐྱེད་ཀྱི་རིན་ཐང་བསྡོམས་འབོར་དེས་ངེས་པར་དུ་ལས་ཞུགས་གང་ལེགས་བྱེད་ཐུབ་པར་ཁག་ཐེག་བྱས་ནས་སྡོད་དམངས་ཀྱི་ཡོང་འབབ་འཕར་སྣོན་ཡོང་དུ་བཅུག་དགོས།ང་ཚོས་ཕྱོགས་རེས་ཅན་གྱི་རྒྱལ་དམངས་ཐོན་སྐྱེད་ཀྱི་རིན་ཐང་བསྡོམས་འབོར་ལ་རེ་སྙེག་མི་བྱེད་ཀྱང་།ང་ཚོས་མང་ཚོགས་ཀྱི་རྒྱལ་དམངས་ཐོན་སྐྱེད་ཀྱི་རིན་ཐང་བསྡོམས་འབོར་ལ་ཉེ་བཅར་བྱེད་དགོས་ཤིང་སྤུས་ཚད་དང་ཕན་འབྲས་ཆེ་ཞིང་ནུས་ཁུངས་བསྲི་ཚགས་དང་ཁོར་ཡུག་སྲུང་སྐྱོང་དང་འཚམ་པའི་རྒྱལ་དམངས་ཐོན་སྐྱེད་ཀྱི་རིན་ཐང་བསྡོམས་འབོར་ཇེ་མཐོར་གཏོང་དགོས།
    གསར་འགོད་པས་ལི་ཁེ་ཆང་ལ་ན་ནིང་ལོར་ཁྱེད་ཀྱིས་དམངས་འཚོ་འགན་སྲུང་གི་ཉེན་མེད་དྲ་བ་བསྐྲུན་རྒྱུ་ཞེས་བཏོན་མྱངས་རེད་ཅེས་འདྲི་དུས།ལི་ཁེ་ཆང་གིས་སྤྱི་ཚོགས་ཀྱིས་དོ་ཁུར་བྱེད་པའི་གནད་དོན་གཙོ་བོ་དང་།ལྷག་པར་དུ་དམངས་འཚོའི་གནད་དོན་དེ་སྲིད་གཞུང་ལས་ཀའི་གཙོ་གནད་ཡིན་དགོས་ཞེས་ལན་འདེབས་པ་རེད།
    ལི་ཁེ་ཆང་གིས་གསུངས་རྒྱུར།གཅིག་ནི་གཞི་རྩར་འགན་སྲུང་བྱེད་དགོས།ཅི་ཡིན་ཟེར་ན་འོས་འགན་སློབ་གསོ་དང་།གཞི་རྩའི་སྨན་བཅོས།གཞི་རྩའི་རྒན་གསོ།སྡོད་ཁང་སོགས་ཕྱོགས་མང་པོའི་ཐད་ཆ་ཚང་བའི་སྤྱི་ཚོགས་འགན་སྲུང་གི་ཉེན་མེད་དྲ་བ་ཞིག་འཛུགས་སྐྱོང་བྱེད་དགོས་པ་རེད།ང་ཚོ་ད་ལྟའི་གཞི་རྩའི་སྨན་བཅོས་འགན་སྲུང་དེ་སྤྱི་ཁོག་ཐོག་བཤད་ན་དམངས་ཡོངས་ལ་ཁྱབ་ཡོད་པ་དང་།གཞི་རྩའི་རྒན་གསོ་ལམ་ལུགས་ལ་ཞུགས་པའི་མི་གྲངས་དུང་ཕྱུར8ལས་བརྒལ་ཡོད་པ་རེད།གཉིས་ནི་ཆེས་དམའ་བའི་ཚད་གཞི་འགན་སྲུང་ཐུབ་དགོས།རང་རྒྱལ་གྱི་རྒྱལ་ཤུགས་ལ་ཚད་ཡོད་པའི་རྐྱེན་གྱིས།ང་ཚོའི་གཞི་རྩའི་འགན་སྲུང་གི་ཚད་གཞི་ད་རུང་ཆུ་ཚད་དམའ་བོ་ཡིན་པ་རེད།མི་ཆ་ཤས་ལ་ད་རུང་ནད་ཕོག་པ་དང་གནོད་སྐྱོན་ཐེབས་ནས་འཚོ་བའི་ཐད་དཀའ་ངལ་བཟོས་པ་རེད།གཞི་རྩའི་འགན་སྲུང་ཆུ་ཚད་སྲུང་མ་ཐུབ་ན་ད་རུང་སྤྱི་ཚོགས་ཀྱིས་རོགས་སྐྱོབ་བྱེད་དགོས་ཤིང་།ང་ཚོས་ཁྱིམ་དུ་འགྲོ་ས་མེད་མཁན་དང་དབུལ་ཕོངས་ཡིན་པའི་རྐྱེན་གྱིས་ནད་ཕོག་ཀྱང་སྨན་བཅོས་བྱེད་ས་མི་འགྲོ་ཐུབ་པའི་གནས་ཚུལ་གཏན་ནས་བྱུང་བཅུག་རྒྱུ་མེད།གསུམ་ནི་འདྲ་མཉམ་ཡོང་བར་སྐུལ་འདེད་གཏོང་དགོས།ང་ཚོས་གཞི་རྩར་འགན་སྲུང་བྱེད་པ་དང་ཆེས་དམའ་བའི་ཆུ་ཚད་སྲུང་བར་ད་རུང་མི་དམངས་མང་ཚོགས་ཀྱི་ལས་ཞུགས་དང་ལས་ལམ་གསར་བསྐྲུན་བྱ་རྒྱུའི་ཐད་ཀྱི་སེམས་ཁྲལ་སེལ་རོགས་བྱེད་རྒྱུའི་ཐད་ད་རུང་བྱེད་ཐབས་བླངས་དགོས་པ་དང་།ལྷག་པར་དུ་ཁྱབ་ཁོངས་ཆ་ཤས་སུ་དེ་བས་ཕན་ནུས་ལྡན་པའི་བྱེད་ཐབས་བླངས་ཏེ་ལས་ཞུགས་དང་ལས་གནས་འཚོལ་བའི་གོ་སྐབས་འདྲ་མཉམ་ཡོང་དུ་འཇུག་དགོས།ལས་ལམ་བསྐྲུན་པར་འདྲ་མཉམ་གྱི་འགྲན་རྩོད་ཁོར་ཁུག་ཡོད་པ་བྱེད་དགོས་ཤིང་།ཁྱད་པར་དུ་འགོ་ཚུགས་ས་ནས་འདྲ་མཉམ་ཡོང་རྒྱུར་དོ་སྣང་བྱེད་རྒྱུ་ནི་སློབ་གསོ་འདྲ་མཉམ་ཡིན་དགོས་རྒྱུ་དེ་རེད།
    ལི་ཁེ་ཆང་གིས་གསུངས་རྒྱུར།ང་ཚོས་མུ་མཐུད་ནས་ཞིང་སྡེའི་དབུལ་ཕོངས་ས་ཁུལ་གྱི་སློབ་མ་ཚོ་གཙོ་གནད་ཀྱི་མཐོ་རིམ་སློབ་གྲྭར་ཞུགས་པའི་མི་གྲངས་སྣོན་རྒྱུ་ཡིན་པ་དང་ད་ལོར་བརྒྱ་ཆ10ཡན་ཆད་སྣོན་རྒྱུ་ཡིན་པར་མ་ཟད།ད་རུང་ཞིང་སྡེའི་དབུལ་ཕོངས་ས་ཁུལ་གྱི་ཆ་རྐྱེན་ཞན་པའི་སློབ་གྲྭ་ལེགས་བཅོས་བྱེད་ཤུགས་ཆེ་རུ་གཏོང་དགོས།སྲིད་གཞུང་གིས་ཆ་རྐྱེན་བསྐྲུན་ནས་མི་སུ་ཡིན་ནའང་རང་ཉིད་ཀྱིས་འབད་བརྩོན་བྱས་པར་བརྒྱུད་འདྲ་མཉམ་གྱི་འཕེལ་རྒྱས་གཏོང་བའི་གོ་སྐབས་ཡོད་དུ་འཇུག་དགོས།ང་ཚོས་དྲང་བདེན་དེ་སྤྱི་ཚོགས་ཀྱི་ཆེས་དམའ་རིམ་དུ་ལག་ལེན་མཐར་ཕྱིན་བྱ་རྒྱུ་ཡིན།