ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།ཀྲུང་དབྱང་གི་ཞིང་སྡེ་བྱ་བའི་གྲོས་ཚོགས་ཟླ12པའི་ཚེས23ཉིན་ནས་ཚེས24ཉིན་བར་པེ་ཅིན་ནས་བསྡུས།གྲོས་ཚོགས་སྟེང་ཏང་གི་འཐུས་མི་ཚོགས་ཆེན་ཐེངས་བཅོ་བརྒྱད་པ་དང་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་གཏིང་ཟབ་སྒོས་ལག་ལེན་མཐར་ཕྱིན་བྱས་ཤིང་།“ཞིང་གསུམ”བྱ་བའི་མདུན་དུ་ལྷགས་པའི་གནས་བབ་དང་ལས་འགན་ཁྱོན་ཡོངས་ནས་དབྱེ་ཞིབ་དང་།ཞིང་སྡེའི་བཅོས་བསྒྱུར་ཁྱོན་ཡོངས་ནས་གཏིང་ཟབ་ཏུ་གཏོང་བ་དང་ཞིང་ལས་དེང་རབས་ཅན་གྱི་གོམ་སྟབས་ཇེ་མགྱོགས་སུ་གཏོང་བའི་སྲིད་ཇུས་གལ་ཆེན་ལ་ཞིབ་འཇུག་བྱས་ཤིང་།2014ལོ་དང་ཕྱིན་ཆད་ཀྱི་དུས་སྐབས་ཤིག་གི་ཞིང་ལས་དང་ཞིང་སྡེའི་བྱ་བ་བཀོད་སྒྲིག་བྱས།
 
    ཏང་དང་རྒྱལ་ཁབ་ཀྱི་མགོ་ཁྲིད་པ་ཞི་ཅིན་ཕེན་དང་ལིས་ཁི་ཆིང་།ཀྲང་ཏི་ཅང་།ཡུས་ཀྲིན་ཧྲིན།ལིའུ་ཡུན་ཧྲན།ཝང་ཆི་ཧྲན།ཀྲང་ཀའོ་ལི་བཅས་གྲོས་ཚོགས་སུ་ཞུགས།
 
    ཞི་ཅིན་ཕེན་གྱིས་གྲོས་ཚོགས་སྟེང་གསུང་བཤད་གལ་ཆེན་གནང་སྐབས།རང་རྒྱལ་གྱི་དཔལ་འབྱོར་དང་སྤྱི་ཚོགས་ཡུན་རིང་འཕེལ་རྒྱས་ཀྱི་ཁྱོན་ཡོངས་ལ་དམིགས་ནས།མཐོ་རིམ་ཀྱི་སྟེང་ནས་གནས་བབ་ལ་གཞིགས་པ་དང་།གཏིང་ཟབ་ཅིང་གནད་ལ་འཁེལ་བའི་སྒོ་ནས་ཞིང་སྡེའི་བཅོས་བསྒྱུར་དང་འཕེལ་རྒྱས་ལ་སྐུལ་འདེད་གཏོང་བའི་ཁ་ཕྱོགས་རང་བཞིན་དང་འཐབ་ཇུས་རང་བཞིན་ལྡན་པའི་གནད་དོན་གལ་ཆེན་འགར་རྒྱས་བཤད་གནང་བ་དང་མཉམ་དུ་བླང་བྱ་གསལ་བོ་བཏོན།ལིས་ཁི་ཆིང་གིས་གསུང་བཤད་གནང་སྐབས་ཞིང་ལས་དང་ཞིང་སྡེ་བྱ་བའི་གནས་བབ་ལ་དབྱེ་ཞིབ་གཏིང་ཟབ་གནང་ཞིང་།བཅོས་བསྒྱུར་དང་གསར་སྐྲུན་ལ་བརྟེན་ནས་ཞིང་ལས་དེང་རབས་ཅན་ལ་སྐུལ་འདེད་གཏོང་བ་དང་།སྲིད་གཞུང་གིས“ཞིང་གསུམ”ཐད་ཁུར་པའི་བྱ་བའི་འགན་འཁྲི་སོགས་ལས་འགན་གཙོ་བོར་བཀོད་སྒྲིག་ཞིབ་མོ་བྱས།
 
    གྲོས་ཚོགས་སྟེང་བསྟན་དོན།ཐེངས་འདིའི་ཀྲུང་དབྱང་གི་ཞིང་སྡེ་བྱ་བའི་གྲོས་ཚོགས་ནི་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་རྗེས་སུ་ཀྲུང་དབྱང་གིས་ཚོགས་པའི་གྲོས་ཚོགས་གལ་ཆེན་ཞིག་ཀྱང་རེད།དུས་རབས་གསར་བ་མགོ་བརྩམས་རྗེས།ཀྲུང་དབྱང་གིས་ལག་ཏུ་བསྟར་བའི“ཞིང་གསུམ”སྲིད་ཇུས་ཀྱི་ནུས་པ་ཐོན་ཏེ་མང་ཚོགས་ཀྱི་དགའ་བསུ་ཐོབ་པས།ཞིང་པའི་བརྩོན་སེམས་སྐུལ་སློང་ནུས་ལྡན་བྱས་ཤིང་ཞིང་ལས་དང་ཞིང་སྡེའི་འཕེལ་རྒྱས་ལ་སྐུལ་འདེད་ནུས་ལྡན་བྱས།རང་རྒྱལ་གྱི་བཅོས་བསྒྱུར་ནི་ཞིང་སྡེ་ནས་མགོ་བརྩམས་པ་ཡིན་ཞིང་ཞིང་སྡེའི་བཅོས་བསྒྱུར་དང་འཕེལ་རྒྱས་ཕྱོགས་ཀྱི་ལག་ལེན་རླབས་ཆེན་དེས་མི་དམངས་ཀྱི་འཚོ་བ་ལྟོ་གོས་གཉིས་འཛོམས་ཙམ་ལས་སྤྱི་ཁོག་ནས་འབྱོར་འབྲིང་དུ་གྱུར་པའི་ལོ་རྒྱུས་རང་བཞིན་གྱི་མཆོང་བརྒལ་འབྱུང་བ་དང་།སྤྱི་ཚོགས་རིང་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བར་བྱས་རྗེས་ཆེན་པོ་བཞག་ལ།དཀའ་ཁག་དང་ཉེན་ཁ་སྣ་ཚོགས་ལས་རྣམ་པར་རྒྱལ་བ་དང་སྤྱི་ཚོགས་ཡོངས་བརྟན་འཇགས་ཡོང་བར་རྨང་གཞི་བརྟན་པོ་བཏིངས།
 
    གྲོས་ཚོགས་སྟེང་ནན་གྱིས་བསྟན་དོན།“ཅན་བཞི་མཉམ་སྤེལ”ཁྲོད་ཞིང་ལས་ད་དུང་རྗེས་སུ་ལུས་ཡོད་པ་དང་འབྱོར་འབྲིང་སྤྱི་ཚོགས་ཁྱོན་ཡོངས་ནས་བསྐྲུན་པའི་ཁྲོད་ཞིང་སྡེ་ད་དུང་རྗེས་སུ་ལུས་ཡོད་པ་ངེས་པར་ཤེས་དགོས།ཀྲུང་གོ་སྟོབས་ལྡན་དུ་བསྒྱུར་ན་ངེས་པར་ཞིང་ལས་སྟོབས་ལྡན་དུ་བསྒྱུར་དགོས་པ་དང་།ཀྲུང་གོ་མཛེས་སྡུག་ལྡན་པ་ཞིག་ཏུ་བསྒྱུར་ན་ངེས་པར་ཞིང་སྡེ་མཛེས་སྡུག་ལྡན་པ་ཞིག་ཏུ་བསྒྱུར་དགོས།ཀྲུང་གོ་ཕྱུག་པོར་བསྒྱུར་ན་ངེས་པར་ཞིང་པ་ཕྱུག་པོར་བསྒྱུར་དགོས།ཞིང་ལས་ཀྱི་རྨང་གཞི་བརྟན་བརླིང་ཡིན་པ་དང་ཞིང་སྡེ་འཆམ་མཐུན་དང་བརྟན་འཇགས་ཡིན་པ།ཞིང་པ་བདེ་སྡོད་ལས་བརྩོན་ཡིན་ཚེ།ཁྱོན་ཡོངས་བརྟན་འཇགས་ཡོང་བར་འགན་སྲུང་བྱ་ཐུབ་ལ།བྱ་བ་སྣ་ཚོགས་སྟེང་ནས་རང་དབང་ཡོད་ངེས།ང་ཚོས་ངེས་པར“ཞིང་གསུམ”གནད་དོན་ཐག་གཅོད་གང་ལེགས་བྱེད་པ་དེ་ཏང་ཡོངས་ཀྱི་བྱ་བའི་གལ་ཆེན་ནང་གི་འགངས་ཆེན་དུ་བརྩི་བ་རྒྱུན་འཁྱོངས་བྱེད་པ་དང་།བཟོ་ལས་ཀྱིས་ཞིང་ལས་ལ་རོགས་སྐྱོར་དང་གྲོང་ཁྱེར་གྱིས་ཞིང་སྡེར་རྒྱབ་སྐྱོར།མང་སྤྲོད་ཉུང་བསྡུ་དང་འཁྲུག་པོ་ཡོང་བར་བྱེད་པ་སོགས་ཀྱི་བྱེད་ཕྱོགས་རྒྱུན་འཁྱོངས་བྱས་ཏེ།ཞིང་ལས་སྟོབས་ལྡན་དང་ཞིང་པར་ཕན་ལ་ཞིང་པ་ཕྱུག་པོར་བསྒྱུར་བའི་སྟེང་སྲིད་ཇུས་ཀྱིས་རྒྱབ་སྐྱོར་བྱེད་ཤུགས་སྔར་ལས་ཇེ་དྲག་ཏུ་གཏོང་བ་དང་།ནམ་ཡང“ཞིང་གསུམ”བྱ་བ་དམ་པོར་བཟུང་ཞིང་ལེགས་པར་བསྒྲུབ་དགོས།
 
    རང་རྒྱལ་གྱི་འབྲུ་རིགས་བདེ་འཇགས་འགན་སྲུང་བྱེད་པའི་སྐོར་གྲོས་ཚོགས་སྟེང་བསྟན་དོན།རང་རྒྱལ་ནི་མི་གྲངས་མང་བའི་རྒྱལ་ཁབ་ཅིག་ཡིན་པས།བཟའ་བཏུང་གི་གནད་དོན་ཐག་གཅོད་བཟང་པོ་བྱེད་པ་ནི་ནམ་ཡིན་ཡང་རྒྱལ་ཁབ་སྐྱོང་བའི་དོན་ཆེན་ཨང་དང་པོ་རེད།རང་ཉིད་གཙོ་བྱས་ཏེ་རྒྱལ་ནང་ལ་རྐང་འཛུགས་པ་དང་ཐོན་ནུས་ཁག་ཐེགནང་འདྲེན་འོས་འཚམ།ཚན་རྩལ་གྱིས་འདེགས་སྐྱོར་བཅས་རྒྱལ་ཁབ་ཀྱི་འབྲུ་རིགས་བདེ་འཇགས་འཐབ་ཇུས་རྒྱུན་འཁྱོངས་བྱ་དགོས།ཀྲུང་གོ་པའི་ཕོར་བ་ནམ་ཡང་རང་གི་ལག་ཏུ་དམ་པོར་འཛིན་དགོས།ང་ཚོའི་ཕོར་བའི་ནང་གཙོ་བོར་ཀྲུང་གོའི་ཟ་མ་འཇོག་དགོས།རྒྱལ་ཁབ་གཅིག་ལ་མཚོན་ན་འབྲུ་རིགས་རང་ཁ་རང་གསོ་བྱས་ཚེ།ད་གཟོད་འབྲུ་རིགས་བདེ་འཇགས་ཀྱི་རང་དབང་ཡོད་པ་དང་།དེ་ནས་ད་གཟོད་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཁྱོན་ཡོངས་ཚོད་འཛིན་བྱ་ཐུབ།འབྲུ་རིགས་བདེ་འཇགས་ཀྱི་བྱ་བའི་གནད་ས་སྔར་ལས་གཏན་འཁེལ་གསལ་བོ་བྱས་ཏེ།ལུགས་མཐུན་སྒོས་ཐོན་ཁུངས་བཀོད་སྒྲིག་བྱེད་པ་དང་སྟོབས་ཤུགས་གཅིག་ཏུ་བསྒྲིལ་ནས་ཐོག་མར་ཆེས་གཞི་རྩ་དང་ཆེས་གལ་ཆེ་བ་དག་འགན་སྲུང་བྱས་ནས།ལོ་ཏོག་ཕལ་ཆེར་རང་ཁ་རང་གསོ་དང་བཟའ་འབྲུ་མཐའ་གཅིག་ཏུ་བདེ་འཇགས་ཡིན་པར་ཁག་ཐེག་བྱ་དགོས།རྨོ་ཞིང་སྟེང་བརྒལ་མི་ཆོག་པའི་ཚད་དེ་དམ་སྲུང་བྱེད་པ་དང་།རྨོ་ཞིང་མུའུ་དུང་ཕྱུར18ལས་ཉུང་མི་རུང་བའི་ཚད་སྔར་བཞིན་ངེས་པར་དམ་སྲུང་བྱ་དགོས།དུས་མཚུངས་སུ་ད་ཡོད་ཀྱི་རྨོ་ཞིང་གི་གཞི་ཁྱོན་ཕལ་ཆེར་བརྟན་འཇགས་ཡིན་པ་ངེས་པར་སྲུང་འཛིན་བྱ་དགོས།འབྲུ་རིགས་ཀྱི་གསོག་འཇོག་དང་སྙོམ་སྒྲིག་བྱ་བ་ལེགས་སྒྲུབ་བྱས་ནས་ཚོང་ར་ནི་འབྲུ་རིགས་ཉོ་གསོག་གི་བདག་པོ་ཉིད་ཡིན་པའི་བརྩོན་སེམས་སྐུལ་སློང་བྱེད་པ་དང་།སྤྱི་ཚོགས་སྟེང་གི་ཉར་གསོག་སྒྲིག་བཀོད་བེད་སྤྱོད་གང་ལེགས་བྱས་ནས་འབྲུ་རིགས་གསོག་འཇོག་བྱ་དགོས།འབྲུ་རིགས་གྲོན་ཆུང་བྱེད་པར་གཙིགས་མཐོང་བྱེད་པ་དང་།འབྲུ་རིགས་གྲོན་ཆུང་བྱེད་པ་དེ་བྱིས་པ་ནས་འཛིན་པ་དང་གསོལ་ཅོག་ནས་བཟུང་སྟེ།སྤྱི་ཚོགས་ཡོངས་སུ་འབྲུ་རིགས་གྲོན་ཆུང་བྱེད་པའི་རྣམ་པ་བཟང་པོ་ཞིག་ཆགས་སུ་འཇུག་དགོས།
 
    ཞིང་སྡེའི་གཞི་རྩའི་བདག་གཉེར་ལམ་ལུགས་རྒྱུན་འཁྱོངས་དང་འཐུས་ཚང་དུ་གཏོང་བའི་སྐོར་གྲོས་ཚོགས་སྟེང་བསྟན་དོན།ཏང་གི་ཞིང་སྡེའི་སྲིད་ཇུས་རྒྱུན་འཁྱོངས་བྱེད་ན།ཐོག་མར་ཞིང་སྡེའི་གཞི་རྩའི་བདག་གཉེར་ལམ་ལུགས་རྒྱུན་འཁྱོངས་བྱ་དགོས།ཞིང་སྡེའི་ས་ཞིང་ཞིང་པ་དང་ཐུན་མོང་ལ་དབང་བ་རྒྱུན་འཁྱོངས་བྱ་དགོས།འདི་ནི་ཞིང་སྡེའི་གཞི་རྩའི་བདག་གཉེར་ལམ་ལུགས་རྒྱུན་འཁྱོངས་བྱེད་པའི“སྲོག”ལྟ་བུ་ཡིན།ཁྱིམ་ཚང་བདག་གཉེར་ཁྲོད་ཀྱི་རྨང་གཞི་རང་བཞིན་གྱི་གོ་གནས་རྒྱུན་འཁྱོངས་བྱ་དགོས།ཞིང་སྡེའི་ཐུན་མོང་གི་ས་ཞིང་དེ་ཐུན་མོང་དཔལ་འབྱོར་གྱི་གྲུབ་ཆ་ཡིན་པས་ཞིང་པ་ཁྱིམ་ཚང་གིས་འགན་གཙང་ལེན་བྱ་དགོས་པ་ལས།བྱེད་པོ་གཞན་པ་སུ་ཡིན་རུང་ཞིང་པ་ཁྱིམ་ཚང་གི་ཚབ་བྱས་ཏེ་ས་ཞིང་འགན་གཙང་ལེན་བྱེད་མི་ཆོགའགན་གཙང་ལེན་གྱི་བདག་གཉེར་དབང་ཆ་ཇི་ལྟར་སྤོ་བསྒྱུར་བྱས་རུང་ཐུན་མོང་ས་ཞིང་གི་འགན་གཙང་ལེན་གྱི་དབང་ཆ་ནི་ཞིང་པ་ཁྱིམ་ཚང་ལ་དབང་བ་ཡིན།
 
    ཞིང་ལས་ཐོན་རྫས་ཀྱི་སྤུས་ཀ་དང་ཟས་རིགས་བདེ་འཇཊ་སྐོར་གྲོས་ཚོགས་སྟེང་ནན་གྱིས་བསྟན་དོན།ཟས་རིགས་བདེ་འཇགས་ཐད་མང་ཚོགས་ཀྱི་ཡིད་ཚིམ་པའི་འབྲས་བུ་ཞིག་འཐོབ་ཐུབ་མིན་ནི་ང་ཚོའི་སྲིད་སྐྱོང་ནུས་པའི་ཉམས་སད་ཚབས་ཆེན་ཞིག་རེད།ཟས་རིགས་བདེ་འཇགས་ཀྱི་མགོ་ཁུངས་ཞིང་ལས་ཐོན་རྫས་དང་འབྲེལ་བ་དང་རྨང་གཞི་ནི་ཞིང་ལས་ཡིན་པས།ངེས་པར་མགོ་ཁུངས་ནས་གཙང་སེལ་བྱ་དགོས་ལ།ཐོག་མར་ཞིང་ལས་ཐོན་རྫས་ཀྱི་སྤུས་ཀ་ལེགས་འཛིན་བྱ་དགོས།
 
    “སུས་རྨོ་ཞིང་འདེབས་པའི”སྐོར་གྲོས་ཚོགས་སྟེང་བསྟན་དོན།གཙོ་བོ་མིའི་གནད་དོན་ཐག་གཅོད་གང་ལེགས་བྱས་ཏེ།ཞིང་པ་ཕྱུག་བསྒྱུར་དང་ཞིང་པའི་སྤུས་མཚག་ཇེ་མཐོར་གཏོང་བ།ཞིང་པར་རོགས་སྐྱོར་བྱེད་པ།ཞིང་ལས་བདག་གཉེར་ཁྲོད་ཕན་ཁེ་རེག་ཏུ་འཇུག་པ།ཞིང་ལས་དེ་དར་རྒྱས་འབྱུང་བའི་ཐོན་ལས་སུ་འགྱུར་དུ་འཇུག་པ།ཞིང་པ་ནི་ལ་རྒྱ་ཡོད་པའི་ལས་རིགས་ཤིག་ཏུ་འགྱུར་དུ་འཇུག་པ།ཞིང་སྡེ་ནི་བདེ་སྡོད་ལས་བརྩོན་གྱི་ཁྱིམ་གཞིས་མཛེས་སྡུག་ལྡན་པ་ཞིག་ཏུ་འགྱུར་བ་བཅས་བྱ་དགོས།
 
    ཞིང་སྡེའི་སྤྱི་ཚོགས་དོ་དམ་ལ་ཤུགས་སྣོན་པའི་སྐོར་གྲོས་ཚོགས་སྟེང་བསྟན་དོན།ཞིང་སྡེའི་དམངས་འཚོ་འགན་སྲུང་དང་ལེགས་སྒྱུར་བྱེད་པ་དེ་དམིགས་སུ་བཀར་བའི་ཁ་ཕྱོགས་ཤིག་ཏུ་བརྩིས་ནས།བརྒྱུད་རིམ་ལྡན་པའི་ངང་བཅོས་སྐྱོང་དང་ཁྲིམས་ལྟར་བཅོས་སྐྱོང་།ཕྱོགས་བསྡུས་བཅོས་སྐྱོང་།མགོ་ཁུངས་ནས་བཅོས་སྐྱོང་བཅས་ཀྱི་འདུ་ཤེས་འཛུགས་སྐྱོང་བྱས་ཏེ།རྒྱ་ཆེའི་ཞིང་པ་བདེ་སྡོད་ལས་བརྩོན་དང་ཞིང་སྡེའི་སྤྱི་ཚོགས་བདེ་འཇགས་ཡིན་ཞིང་སྒྲིག་ལམ་ཡོད་པར་ཁག་ཐེག་བྱ་དགོས།
 
    གྲོས་ཚོགས་སྟེང་བླང་བྱ་བཏོན་རྒྱུར།ཏང་ཡོངས་དང་རྒྱལ་ཡོངས་ཀྱི་རིགས་སོ་སོའི་མི་དམངས་ཀྱིས་བློ་མཐུན་ཞི་ཅིན་ཕེན་སྤྱི་ཁྱབ་ཧྲུའུ་ཅི་ཡིན་པའི་ཏང་ཀྲུང་དབྱང་གི་མཐའ་སྐོར་དུ་མཐུན་སྒྲིལ་དམ་པོ་བྱས་ཏེ།རྡོག་རྩ་གཅིག་སྒྲིལ་དང་བྱ་བར་འབད་པ།བཅོས་བསྒྱུར་གསར་སྐྲུན།དཀའ་སེལ་འགག་སྒྲོལ།ཐེངས་འདིའི་གྲོས་ཚོགས་ཀྱི་བཀོད་སྒྲིག་སྣ་ཚོགས་དངོས་འབེབས་ནན་ཏན་བཅས་བྱས་ནས།ཞིང་ལས་དང་ཞིང་སྡེའི་བྱ་བའི་རྣམ་པ་གསར་བ་གསར་གཏོད་བྱ་དགོས།
 
    གྲོས་ཚོགས་སྟེང《ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཞིང་སྡེའི་བཅོས་བསྒྱུར་ཁྱོན་ཡོངས་ནས་གཏིང་ཟབ་ཏུ་གཏོང་བ་དང་ཞིང་ལས་དེང་རབས་ཅན་ཇེ་མགྱོགས་སུ་གཏོང་བའི་སྐོར་གྱི་བསམ་འཆར་འགའ（གྲོས་བསྡུར་མ་ཟིན）》ལ་གྲོས་བསྡུར་བྱས།།