ཞི་ཅིན་ཕིང་གིས་མཆན་འགོད་མཛུབ་སྟོན་གལ་ཆེན་གནང་།
    ཚེས་19ཉིན་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་ལག་བསྟར་གྱི་ཀྲུང་དབྱང་སྒྲོག་འགྲེལ་ཚོགས་པའི་སྐུལ་སློང་ཚོགས་འདུ་པེ་ཅིན་དུ་འཚོགས་པ་དང་།ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཆན་འགོད་མཛུབ་སྟོན་གལ་ཆེན་གནང་བ་རེད།ཁོང་གིས་ཀྲུང་དབྱང་སྒྲོག་འགྲེལ་ཚོགས་པ་སྒྲིག་འཛུགས་བྱས་པ་དེ་ནི་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་།དྲིལ་བསྒྲགས།ལག་བསྟར་བཅས་བྱེད་པའི་བྱེད་ཐབས་གལ་ཆེན་ཞིག་ཡིན།སྒྲོག་འགྲེལ་གྱི་འགག་རྩ་ནི་དོན་དངོས་དང་ཟུང་འབྲེལ་དང་།ཞིབ་འཇུག་ཞིབ་ཚགས་ཤིང་གནད་དོན་ལ་དབྱེ་ཞིབ་དང་དོགས་སེལ་དཀའ་སེལ་གྱིས་དགོངས་དོན་ཆ་ཚང་ཞིང་ཁ་གསལ་ལ།ཏན་ཏིག་ལྡན་པ་བཅས་བྱས་ཏེ་རྒྱ་ཆེའི་ཏང་ཡོན་དང་།ལས་བྱེད་པ།མང་ཚོགས་བཅས་ཀྱིས་ཚང་འཛོམས་གྲོས་ཚོགས་ཀྱི་དགོངས་དོན་ཁྱོན་ཡོངས་དང་གནད་ལ་འཁེལ་བའི་སྒོ་ནས་གོ་བ་ལེན་རྒྱུར་རོགས་རམ་བྱེད་པ་དང་ཚང་འཛོམས་གྲོས་ཚོགས་ཐོག་བཏོན་པའི་བསམ་བློ་དང་ཆོད་གཏམ།བྱེད་ཐབས་གསར་པ་བཅས་ཁྱོན་ཡོངས་དང་གནད་ལ་འཁེལ་བའི་སྒོ་ནས་གོ་བ་ལེན་རྒྱུ་དེ་ཡིན།ས་གནས་ཁག་གིས་བྱེད་ཐབས་སྣ་ཚོགས་ཀྱི་སྒྲོག་འགྲེལ་བྱེད་སྒོ་སྒྲིག་འཛུགས་བྱེད་པ་དང་རིམ་ཁག་འགོ་ཁྲིད་ལས་བྱེད་པས་སྣེ་ཁྲིད་དེ་གཞི་རིམ་དུ་བསྐྱོད་ནས་སྒྲོག་འགྲེལ་བྱེད་དགོས།སྒྲོག་འགྲེལ་གྱི་དམིགས་སའི་རང་བཞིན་དང་ཕན་འབྲས་རང་བཞིན་ལ་ཤུགས་སྣོན་བརྒྱབ་སྟེ་མི་དང་།རིག་པ།བྱ་བ་བཅས་ལ་གཞིགས་ནས་སློབ་གསོ་བཏང་སྟེ་རིམ་པ་མང་བ་དང་ཁྱོན་ཡོངས་ལ་ཁྱབ་ཐུབ་པ་བྱས་ནས་ཏང་ཡོངས་དང་སྤྱི་ཚོགས་ཡོངས་ཀྱི་བསམ་བློ་དང་བྱ་སྤྱོད་ཚང་འཛོམས་གྲོས་ཚོགས་ཀྱི་དགོངས་དོན་དང་ཀྲུང་དབྱང་གི་བླང་བྱའི་ཐོག་གཅིག་གྱུར་ཡོང་རྒྱུར་སྐུལ་འདེད་བཏང་སྟེ་ཡིད་ཆེས་བརྟན་པོ་དང་།ཐུན་མོང་གི་ངོས་འཛིན་གཅིག་གྱུར།མཉམ་ཤུགས་ཆགས་པ་བཅས་བྱས་ཏེ་བསྒྱུར་བཅོས་ལ་སྐུལ་འདེད་གཏོང་བའི་དྲང་ནུས་ཆེན་པོ་གཅིག་ཏུ་འགྲིལ་དགོས་ཞེས་གསུངས་པ་རེད།
    ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་ཀྲུང་དབྱང་ཧྲུའུ་ཅི་ཁྲུའུ་ཡི་ཧྲུའུ་ཅི་ལིའུ་ཡུན་ཧྲན་ཚོགས་འདུར་ཕེབས་པ་དང་འབྲེལ་གསུང་བཤད་ཀྱང་གནང་ཞིང་།ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་ཡག་པོ་དང་།དྲིལ་བསྒྲགས་ཡག་པོ།ལག་བསྟར་ཡག་པོ་བཅས་བྱ་རྒྱུ་ནི་མིག་སྔ་དང་སླད་ཕྱིན་དུས་སྐབས་ཤིག་གི་ཏང་ཡོངས་དང་རྒྱལ་ཡོངས་ཀྱི་ཆབ་སྲིད་ལས་འགན་གལ་ཆེན་ཞིག་ཡིན།ཀྲུང་དབྱང་གི་བཀོད་སྒྲིག་ལག་བསྟར་ནན་ཏན་དང་།སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་འགོད་མཛུབ་སྟོན་གལ་ཆེན་གྱི་བླང་བྱ་དོན་འཁྱོལ་ནན་ཏན།སྒྲོག་འགྲེལ་བྱེད་སྒོ་རྒྱ་ཁྱབ་དང་གཏིང་ཟབ་ངང་སྤེལ་བ།གདོང་དང་གདོང་གཏུག་ནས་ལས་བྱེད་པ་དང་མང་ཚོགས་ལ་བསྒྱུར་བཅོས་ཁྱོན་ཡོངས་ནས་གཏིང་ཟབ་ཏུ་གཏོང་དགོས་དོན་གང་ཡིན་པ་དང་།གང་ཞིག་བསྒྱུར་བཅོས་བྱེད་དགོས་པ།གང་འདྲ་བྱས་ཏེ་བསྒྱུར་བཅོས་བྱེད་དགོས་པ་བཅས་ཀྱི་གནད་དོན་གསལ་བཤད་བྱས་ཏེ་ཕྱོགས་ཁག་གིས་བསྒྱུར་བཅོས་ལ་རྒྱབ་སྐྱོར་དང་བསྒྱུར་བཅོས་ནང་ཞུགས་པའི་ཧུར་བརྩོན་རང་བཞིན་དང་རང་འགུལ་རང་བཞིན་སྐོང་འཐེན་བྱེད་དགོས་ཞེས་ནན་གསུང་གནང་བ་རེད།
    ལིའུ་ཡུན་ཧྲན་གྱིས་བསྟན་དོན།ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག་ཚོགས་ཆེན་བཅོ་བརྒྱད་པའི་བླང་བྱ་དོན་འཁྱོལ་བྱས་ཏེ་བསྒྱུར་བཅོས་ཁྱོན་ཡོངས་ནས་གཏིང་ཟབ་ཏུ་གཏོང་རྒྱུའི་གནད་དོན་ལ་གཙོ་གནད་ཐོག་ཞིབ་འཇུག་དང་བཀོད་སྒྲིག་བྱས་ཡོད།འདི་ནི་ང་ཚོའི་ཏང་གིས་མིག་སྔར་གཞི་ཚུགས་པ་དང་འབྱུང་འགྱུར་ལ་ཕྱོགས་པའི་རང་འགུལ་གྱི་གདམ་ག་ཞིག་ཡིན་པ་དེ་ཐོག་ནས་བློ་མཐུན་ཞི་ཅིན་ཕིང་གིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གིས་བསྒྱུར་བཅོས་སྒོ་དབྱེའི་དར་ཆ་མཐོན་པོར་བསྒྲེངས་པའི་ཁ་གསལ་གྱི་ལངས་ཕྱོགས་དང་བློ་བརྟན་འགྱུར་མེད་ཀྱི་ཆོད་སེམས་གང་ལེགས་མཚོན་ཡོད།ཚང་འཛོམས་གྲོས་ཚོགས་ཀྱི་དགོངས་དོན་ལག་བསྟར་དོན་འཁྱོལ་བྱེད་པ་དེས་ང་ཚོའི་ཏང་དང་རྒྱལ་ཁབ་ཀྱི་བྱ་གཞག་ལ་དབྱར་མཚོ་རྒྱས་པ་ལྟར་གྱི་གསོན་ཤུགས་གསར་པ་ཐོན་ངེས་ཡིན་ལ།“ལོ་བརྒྱ་གཉིས”ཀྱི་འབད་འཐབ་དམིགས་ཚད་དང་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་བྱ་རྒྱུར་རྒྱང་རིང་གཏིང་ཟབ་ཀྱི་ཤུགས་རྐྱེན་ཐེབས་ངེས་ཡིན།ཚང་འཛོམས་གྲོས་ཚོགས་ཀྱི《གཏན་འབེབས》དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་ལ་དམ་པོར་དམིགས་ནས་ཁྱོན་ཡོངས་དང་གནད་ལ་འཁེལ་བ།ཚན་རིག་དང་མཐུན་ལ་གཟབ་ནན་གྱི་སྒོ་ནས་ཚང་འཛོམས་གྲོས་ཚོགས་ཀྱི་དགོངས་དོན་སྒྲོག་འགྲེལ་བྱས་ཏེ་བསྒྱུར་བཅོས་ཁྱོན་ཡོངས་ནས་གཏིང་ཟབ་ཏུ་གཏོང་བའི་མཛུབ་ཁྲིད་བསམ་བློ་དང་།སྤྱིའི་དམིགས་ཚད།བྱེད་ཕྱོགས་རྩ་དོན་བཅས་གསལ་པོ་དང་གནད་ལ་འཕིགས་པའི་སྒོ་ནས་ཤོད་པ་དང་།བསྒྱུར་བཅོས་ཁྱོན་ཡོངས་ནས་གཏིང་ཟབ་ཏུ་གཏོང་བའི་བཀོད་སྒྲིག་གལ་ཆེན་དང་།གསར་གཏོད་བྱེད་ཐབས།རྩ་བའི་འགན་ལེན་བཅས་གསལ་པོ་དང་གནད་ལ་འཕིགས་པའི་སྒོ་ནས་ཤོད་དགོས།སྒྲོག་འགྲེལ་གཏིང་ཟབ་བྱས་ཏེ་རྒྱ་ཆེའི་ལས་བྱེད་པ་དང་མང་ཚོགས་ཚོས་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དོན་སྙིང་གལ་ཆེན་ལ་ངོས་འཛིན་གང་ལེགས་བྱ་རྒྱུར་ཁྲིད་སྟོན་བྱས་ཏེ་ཡར་བརྩོན་གྱི་འདུ་ཤེས་དང་།གོ་སྐབས་ཀྱི་འདུ་ཤེས།འགན་འཁྲིའི་འདུ་ཤེས་བཅས་ཆེ་རུ་གཏོང་བ་དང་བསྒྱུར་བཅོས་ཁྱོན་ཡོངས་ནས་གཏིང་ཟབ་ཏུ་གཏོང་བའི་རང་རྟོགས་རང་བཞིན་དང་འགྱུར་མེད་རང་བཞིན་ཆེ་རུ་གཏོང་དགོས།སྒྲོག་འགྲེལ་གཏིང་ཟབ་བྱས་ཏེ་རྒྱ་ཆེའི་ལས་བྱེད་པ་དང་མང་ཚོགས་ཚོས་ཚང་འཛོམས་གྲོས་ཚོགས་ཀྱི་བཀོད་སྒྲིག་གལ་ཆེན་ལ་ངོས་འཛིན་ཟབ་མོ་ཐུབ་རྒྱུ་དང་དོན་འཁྱོལ་ནན་ཏན་བྱ་རྒྱུར་ཁྲིད་སྟོན་བྱས་ནས་ཚང་འཛོམས་གྲོས་ཚོགས་ཐོག་བཏོན་པའི་འཆར་འགོད་དང་དུས་ཚོད་རེའུ་མིག་ལ་གཞིགས་ཏེ་ཁྱབ་ཁོངས་ཁག་གི་སྒྲིག་གཞི་བསྒྱུར་བཅོས་ལ་སྐུལ་འདེད་ཏན་ཏིག་བཏང་ནས་ཚང་འཛོམས་གྲོས་ཚོགས་ཐོག་བཏོན་པའི་བསྒྱུར་བཅོས་ཁྱོན་ཡོངས་ནས་གཏིང་ཟབ་ཏུ་གཏོང་རྒྱུའི་དམིགས་ཚད་ལས་འགན་མངོན་འགྱུར་བྱ་རྒྱུར་འགན་ལེན་བྱེད་དགོས།
    ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་།ཀྲུང་དབྱང་ཧྲུའུ་ཅི་ཁྲུའུ་ཡི་ཧྲུའུ་ཅི།ཀྲུང་དབྱང་དྲིལ་བསྒྲགས་པུའུ་ཡི་པུའུ་ཀྲང་ལིའུ་ཆི་པའོ་ཡིས་ཚོགས་འདུ་གཙོ་སྐྱོང་གནང་བ་རེད།