ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། འབར་མའི་ཙུང་ཐུང་ཝུ་ཏེང་ཧྲེང་གིས་སྤྱི་ཟླ7པའི་ཚེས23ཉིན་འབར་མའི་ཙུང་ཐུང་ལས་ཤག་ཏུ་འཚམས་འདྲིར་ཕེབས་པའི་ཀྲུང་དབྱང་དམག་ཨུད་ཀྱི་ཀྲུའུ་ཞི་གཞོན་པ་ཧྥན་ཁྲང་ལོང་དང་མཇལ་འཕྲད་གནང་།

ཝུ་ཏེང་ཧྲེང་གིས་ཀྲུའུ་ཞི་གཞོན་པ་ཧྥན་ཁྲང་ལོང་གིས་ད་ལྟའི་ལས་གནས་འགན་བཞེས་གནང་རྗེས་འཚམས་འདྲི་དང་པོ་གནང་རྒྱུ་དེ་འབར་མ་གདམ་ག་གནང་བས་དེ་ནི་འབར་མ་དང་ཀྲུང་གོ་རྒྱལ་ཁབ་གཉིས་པོ་དང་དམག་གཉིས་པོའི་མཛའ་གྲོགས་འབྲེལ་བ་གསོན་ཉམས་ལྡན་པའི་ངང་མངོན་པ་ཞིག་ཡིན་ཞེས་གསུངས་ཡོད་པ་དང་།

ཁོང་གིས་འབར་མ་དང་ཀྲུང་གོས་མཐུན་སྒྲིལ་མཉམ་ལས་ལ་ཤུགས་སྣོན་རྒྱག་པ་ནི་རྒྱལ་ཁབ་གཉིས་པོའི་མི་དམངས་ཀྱི་རྩ་བའི་ཁེ་ཕན་དང་མཐུན་པ་ཞིག་ཡིན་པ་དང་། རང་སོ་སོའི་རྒྱལ་ཁབ་དང་ས་ཁུལ་འདི་གའི་གོང་འཕེལ་དང་བརྟན་ལྷིང་ལ་ཕན་ཐོགས་ཡོད། ཀྲུང་གོའི་སྲིད་གཞུང་དང་དམག་དཔུང་གིས་དུས་ཡུན་རིང་པོའི་ནང་རྒྱབ་སྐྱོར་དང་རོགས་རམ་གནང་བར་འབར་མའི་སྲིད་གཞུང་དང་དམག་དཔུང་ནས་ཐུགས་རྗེ་ཆེ་ཞུ་རྒྱུ་ཡིན། འབར་མས་མུ་མཐུད་ནས་ཀྲུང་གོར་མཛའ་གྲོགས་སྲིད་ཇུས་ལག་བསྟར་བྱས་ཏེ། འབར་མ་དང་ཀྲུང་གོའི་ཁྱོན་ཡོངས་འཐབ་ཇུས་མཉམ་ལས་རོགས་པའི་འབྲེལ་བ་ཟམ་མི་ཆད་པར་མདུན་ཕྱོགས་སུ་གོང་འཕེལ་འགྲོ་རྒྱུར་སྐུལ་འདེད་གཏོང་ཆེད་འབད་བརྩོན་ལྷོད་མེད་བྱ་རྒྱུ་ཡིན་ཞེས་གསུངས་ཡོད་པ་རེད།

ཧྥན་ཁྲང་ལོང་གིས་ཀྲུང་གོ་དང་འབར་མ་ནི་མིང་དོན་མཚུངས་པའི་གྲོགས་པོ་ཡག་པོ་དང་། ཁྱིམ་མཚེས་བཟང་པོ། རོགས་པ་ཡག་པོ་བཅས་ཡིན། ཀྲུང་གོ་དང་འབར་མའི་མཛའ་གྲོགས་ནི་ཐོབ་དཀའ་བ་ཞིག་ཡིན་པ་དང་། མི་རབས་མང་པོས་དེའི་ཐད་འབད་བརྩོན་ལྷོད་མེད་གནང་ཡོད་པས། ང་ཚོགས་ཐུན་མོང་ཐོག་གཅེས་འཛིན་བྱེད་དགོས། ཀྲུང་གོས་འབར་མ་དང་མཉམ་དུ། རྒྱལ་ཁབ་གཉིས་པོ་དང་དམག་གཉིས་པོའི་འབྲེལ་བར་གོང་འཕེལ་དེ་བས་ཆེ་བ་ཡོང་ཆེད་མཉམ་དུ་སྐུལ་འདེད་གཏོང་འདོད་ཡོད་ཅེས་གསུངས་ཡོད་པ་རེད།  །