ཟླ7པའི་ཚེས12ཉིན། ཨ་ཆེན་གངས་རྒྱབ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་དོ་དམ་ཅུའུ་ནས་རྒྱུས་ལོན་བྱུང་བ་ལྟར་ན། མཚོ་སྔོན་ཡུལ་ཤུལ་བོད་རིགས་རང་སྐྱོང་ཁུལ་འབྲི་སྟོད་རྫོང་དང་ཨ་ཆེན་གངས་རྒྱབ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་དོ་དམ་ཅུས་ལྷན་དུ་མ་དངུལ་བཏོན་ཏེ་ཟླ8པར་མཚོ་ངོས་མཐོ་ཚད་ལ་སྨི4700ཡོད་པའི་ཁུ་ནུ་རི་ཁར་བསོད་ནམས་དར་རྒྱས་རྗེས་ཀྱི་དྲན་རྡོ་རིང་བཞེངས་འཆར་ཡོད་པ་རེད།
        ཨ་ཆེན་གངས་རྒྱབ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་དོ་དམ་ཅུའི་ཏང་རྩ་འཛུགས་ཧྲུའུ་ཅིས་གསུང་རྒྱུར། རྗེས་རབས་པར་དྲན་གསོ་དང་། དཔའ་བོ་བསོད་ནམས་དར་རྒྱས་ཀྱི་སྙིང་སྟོབས་དར་ཁྱབ་ཏུ་གཏོང་བར། འབྲི་སྟོད་རྫོང་མི་དམངས་སྲིད་གཞུང་དང་ཨ་ཆེན་གངས་རྒྱབ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་དོ་དམ་ཅུས་ཟླ8པར་ཁུ་ནུ་རི་ཁར་བསོད་ནམས་དར་རྒྱས་རྗེས་དྲན་རྡོ་རིང་དངོས་སུ་བཞེངས་རྒྱུ་ཡིན། བསོད་ནམས་དར་རྒྱས་ཀྱི་རྗེས་དྲན་རྡོ་རིང་གསར་བ་ནི་རྙིང་པ་ལས་ལྷག་ཏུ་ཆེ་ཞིང་། དཔའ་བོ་བསོད་ནམས་དར་རྒྱས་ཀྱིས་རི་སྐྱེས་སྲོག་ཆགས་སྲུང་སྐྱོབ་བྱེད་པའི་རྣམ་པ་སྔར་ལས་ཞིབ་ཕྲས་མཚོན་ཡོད་པ་རེད།
        1997ལོའི་ཟླ8པར། དམངས་ཁྲོད་ཁོར་ཡུག་སྲུང་སྐྱོང་པས་མ་དངུལ་བཏོན་ཏེ་དཔའ་བོ་བསོད་ནམས་དར་རྒྱས་རྗེས་དྲན་གྱི་རྡོ་རིང་ཨ་ཆེན་གངས་རྒྱབ་རང་བྱུང་སྲུང་སྐྱོབ་ཁུལ་ཁུ་ནུ་རི་རྒྱུད་ཀྱི་མཚོ་བོད་གཞུང་ལམ་འགྲམ་དུ་བཞེངས་ཤིང་། རྡོ་རིང་མཐོ་ཚད་ལ་སྨི5.8དང་། མདུན་ངོས་སུ་དཔའ་བོ་ཁོང་གི་སྐུ་པར་དང་། རྒྱབ་ངོས་སུ་བོད་རྒྱ་ཡིག་རིགས་སྤེལ་མས་དཔའ་བོ་བསོད་ནམས་དར་རྒྱས་ཀྱི་ལོ་རྒྱུས་བརྗོད་ཡོད། ལོ་ངོ10ཡི་རིང་། གཏིང་གཞི་མི་བརྟན་པ་དང་ས་འགུལ་སོགས་ཀྱི་རྐྱེན་པས་རྡོ་རིང་ལྷོ་རུ་ཏུའུ་གྲངས25ཙམ་གཡོན་པ་དང་། ས་འོག་ཏུ་ལི་སྨི20ཙམ་རྡིབ་ཡོད་པ་རེད།