མི་དམངས་དྲ་བའི་འཕྲིན།  ཟླ་7ཚེས་2ཉིན་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ མི་དམངས་ཚོགས་ཁང་ཆེན་མོར་ཀྲུང་གོར་ཀྲུང་གོ་དང་ཡོ་རོབ་དབུས་ཤར་རྒྱུད་ཀྱི་རྒྱལ་ ཁབ་ཀྱི་ས་གནས་འགོ་ཁྲིད་པའི་ཚོགས་འདུར་ཞུགས་པར་ཕེབས་པའི་མ་ཆི་ཏུན་གྱི་ཙུང་ལི་ ཀེ་ལུའུ་ཨའེ་ཧྥུའུ་སི་ཅི་དང་མཇལ་འཕྲད་གནང་བ་རེད། 
     ཞི་ཅིན་ཕིང་གིས་ཀྲུང་མ་རྒྱལ་ཁབ་གཉིས་བར་གྱི་སྲོལ་རྒྱུན་མཛའ་བཤེས་གཏིང་ཟབ་པོ་ལྡན་ཞིང་།ཉེ་བའི་ལོ་ཤས་རིང་རྒྱལ་ཁབ་གཉིས་བར་གྱི་ཁྱབ་ཁོངས་ཁག་ཏུ་མཉམ་ལས་འཕེལ་རྒྱས་བདེ་བླག་བྱུང་།ཀྲུང་གོའི་ཕྱོགས་ཀྱིས་མ་ཆི་ཏུན་དང་མཉམ་ལས་བྱ་རྒྱུར་རྩིས་མཐོང་ཆེན་པོ་བྱས་ཤིང་།མ་ཆི་ཏུན་ནི་གྲོགས་པོ་བཟང་པོ་དང་རོགས་ཟླ་བཟང་པོར་བརྩིས་ནས་རྒྱལ་ཁབ་གཉིས་བར་འབྲེལ་བ་བཙུགས་ནས་ལོ་ངོ20འཁོར་བ་གོ་སྐབས་སུ་བཟུང་སྟེ་ཕན་ཚུན་བརྩི་འཇོག་དང་ཕན་ཚུན་བར་འདྲ་མཉམ་གྱི་སྤྱོད་ཚུལ་འཛིན་པའི་རྩ་དོན་གྱི་རྨང་གཞིའི་ཐོག་མ་ཆི་ཏུན་ཕྱོགས་དང་མཐོ་རིམ་བར་འབྲེལ་བ་བྱེད་ཤུགས་སྔར་ལས་ཆེ་རུ་གཏོང་དགོས་པ་དང་།མཉམ་ལས་ཆུ་ཚད་མཐོ་རུ་བཏང་ནས་ཀྲུང་མ་རྒྱལ་ཁབ་གཉིས་བར་གྱི་འབྲེལ་བར་འཕེལ་རྒྱས་སྔར་ལས་ཆེ་བ་འགྲོ་བར་སྐུལ་འདེད་གཏོང་བ་དང་།རྒྱལ་ཁབ་གཉིས་ཀྱི་མི་དམངས་ལ་བདེ་སྐྱིད་བསྐྲུན་དགོས་ཞེས་བསྟན་གནང་བ་རེད།