ཀྲུང་གོ་བོད་ཀྱི་དྲ་བའི་འཕྲིན། ཉེ་ཆར།གསར་འགོད་པས་མཚོ་སྔོན་ཞིང་ཆེན་ཡོངས་ཀྱི་དབུལ་སྐྱོར་གསར་སྤེལ་བྱ་བའི་ཚོགས་འདུའི་སྟེང་རྒྱུས་ལོན་པ་ལྟར་ན། ད་ལོར་མཚོ་སྔོན་གྱིས་ཆེད་དམིགས་དབུལ་སྐྱོར་བྱེད་པར་ཤུགས་བསྣན་ཏེ། སྡེ་བ་ཧྲིལ་བོར་སྐུལ་འདེད་བྱེད་པའི་ཐོན་ལས་དབུལ་སྐྱོར་བཟོ་འགོད་དང་ཡུལ་བབ་དང་བསྟུན་ནས་གནས་སྤོ་བའི་དབུལ་སྐྱོར་བཟོ་འགོད། ཐོན་ལས་ཅན་གྱི་དབུལ་སྐྱོར་བཟོ་འགོད་ལ་སྐུལ་འདེད་བྱེད་པ། སྤོ་བསྒྱུར་གསོ་སྦྱོང་བཟོ་འགོད་སོགས་ལག་བསྟར་བྱས་ཏེ། ཧུར་བརྩོན་གྱིས་དབུལ་ཕོངས་ས་ཁུལ་གྱི་རོང་འབྲོག་པ་མི་རེའི་ཆ་སྙོམས་ཡོང་སྒོ་རྐྱང་བ་བརྒྱ་ཆ14ཡན་གོང་ཏུ་སྤེལ་ཏེ་དབུལ་ཕོངས་མི་གྲངས་ཁྲི20ཇེ་ཉུང་དུ་གཏོང་རྒྱུ་རེད།2012ལོར་མཚོ་སྔོན་གྱི་དབུལ་སྐྱོར་གསར་སྤེལ་བྱ་བར་གྲུབ་འབྲས་མངོན་གསལ་ཐོབ་ཡོད་ལ། ཞིང་ཆེན་ཡོངས་སུ་དབུལ་ཕོངས་མི་གྲངས་ཁྲི24.2ཇེ་ཉུང་དུ་བཏང་ཞིང་། དབུལ་ཕོངས་ས་ཁུལ་གྱི་རོང་འབྲོག་པ་མི་རེའི་ཆ་སྙོམས་ཡོང་སྒོ་རྐྱང་བ་སྒོར5364ལ་སླེབས་ཤིང་།དེ2011ལོ་ལས་བརྒྱ་ཆ16.4འཕར་ཡོད། ལྷག་པར་དུ་ན་ནིང་མཚོ་སྔོན་གྱི་ཆེད་དམིགས་དབུལ་སྐྱོར་ཕན་ནུས་མངོན་གསལ་བླངས་ཡོད་པ་དང་། རིགས་སོ་སོའི་ནོར་སྲིད་དབུལ་སྐྱོར་མ་དངུལ་སྒོར་དུང་ཕྱུར13.72བརྩོན་ལེན་བྱས་ལ། ལོ་སྔོན་མ་དང་བསྡུར་ན་འཕར་ཚད་བརྒྱ་ཆ49ལ་སླེབས་ཤིང་། མཚོ་སྔོན་གྱི་ལོ་རྒྱུས་སྟེང་ཆེད་དམིགས་དབུལ་སྐྱོར་མ་དངུལ་བཏང་བ་ཆེས་མང་བའི་ལོ་ཞིག་ཡིན། ཐོན་ལས་ཅན་གྱི་དབུལ་སྐྱོར་འདུས་ཚད་ཀྱི་ཕན་ནུས་མུ་མཐུད་དུ་མངོན་གསལ་དུ་གྱུར་ལ། 2012ལོར་མཚོ་སྔོན་གྱི་ཡུག་སྦྲེལ་ཁྱད་དབུལ་ས་ཁུལ་དང་བོད་ཁུལ་འཕེལ་རྒྱས་ཀྱི་གཅིག་བསྡུའི་ཡུག་སྦྲེལ་ཐོན་ལས་དབུལ་སྐྱོར་གྱི་ལས་གཞི90ལ་རོགས་སྐྱོར་བྱས་ཤིང་དེ་ཞིང་ཆེན་ཡོངས་ཀྱི་རྫོང29ཡི་དབུལ་ཕོངས་མི་གྲངས་ཅུང་གཅིག་འདུས་ཡིན་པའི་སྲིད་འཛིན་སྡེ་བ250ལ་ཁྱབ་ཡོད་པ་དང་། ཀྲུང་དབྱང་ནོར་སྲིད་ཀྱི་དབུལ་སྐྱོར་མ་དངུལ་སྒོར་ཁྲི19104བཏང་སྟེ་དབུལ་ཕོངས་མི་གྲངས་ཁྲི14ཡན་ལ་ཕན་ཁེ་ཐོབ། ལས་རིགས་དང་སྤྱི་ཚོགས་དབུལ་སྐྱོར་གྱི་ཁྱབ་རྒྱ་ཇེ་ཆེར་གྱུར་ལ། ཞིང་ཆེན་ཡོངས་ཀྱི་ལས་རིགས་སོ་སོའི་སྡེ་ཁག་གིས་ཆ་སྡེབ་མ་དངུལ་སྒོར་དུང་ཕྱུར13.75བཏང་ནས་དབུལ་ཕོངས་ས་ཁུལ་གྱི་རྨང་གཞི་སྒྲིག་ཆས་ལ་སྔར་བས་ལེགས་བཅོས་ཐོབ་ནས་དབུལ་ཕོངས་ས་ཁུལ་གྱི་དཔལ་འབྱོར་སྤྱི་ཚོགས་ཕྱོགས་ཡོངས་ནས་འཕེལ་རྒྱས་སུ་འགྲོ་བར་སྐུལ་འདེད་ཐོབ།
　ད་ལོར། མཚོ་སྔོན་གྱིས་ཚོད་དཔག་བྱས་པའི་དམིགས་ཚད་ནི་དབུལ་ཕོངས་མི་གྲངས་ཁྲི20ཇེ་ཉུང་དུ་གཏོང་རྒྱུ་ཡིན་ལ། གཙོ་བོ་ཡུག་སྦྲེལ་ཁུལ་གྱི་དབུལ་སྐྱོར་བརྟན་བརླིང་འཆར་འགོད་ལག་བསྟར་བྱས་ཏེ། ཡུག་སྦྲེལ་ཁྱད་དབུལ་ས་ཁུལ་གྱི་ཐོན་ལས་དབུལ་སྐྱོར་འཆར་འགོད་བཟོ་སྒྲིག་བྱ་བ་ལེགས་པོར་སྒྲུབ་པ་དང་། མ་དངུལ་སྒོར་དུང་ཕྱུར4.5བཏང་ནས་ཞིང་ཆེན་ཡོངས་ཀྱི་དབུལ་ཕོངས་སྡེ་བ360རུ་སྡེ་བ་ཧྲིལ་བོར་སྐུལ་འདེད་བྱེད་པའི་ཐོན་ལས་དབུལ་སྐྱོར་ལས་གཞི་ལག་བསྟར་བྱེད་རྒྱུ་དང་། མ་དངུལ་སྒོར་ཁྲི8000བཏང་ནས་གནས་སྤོར་རྗེས་ཀྱི་རྗེས་མཐུད་ཐོན་ལས་འཕེལ་རྒྱས་ལ་རོགས་སྐྱོར་བྱེད་པ། མ་དངུལ་སྒོར་ཁྲི1000བཏང་ནས་དབུལ་ཕོངས་ངལ་རྩོལ་པ6000ལ་ནུས་རྩལ་དང་ལས་སྐྲུན་གསོ་སྦྱོང་སྤེལ་རྒྱུ། མ་དངུལ་སྒོར་ཁྲི500བཏང་ནས་དབུལ་ཕོངས་ཁྱིམ་ཚང་གི་བྱིས་པ25000ཡི་ཆེད་ལས་ལག་རྩལ་སློབ་གསོ་གཏོང་བ། ནོར་སྲིད་མ་དངུལ་སྒོར་ཁྲི900བཀོད་སྒྲིག་བྱས་ཏེ་རྫོང6ཏུ་ཕན་ཚུན་རོགས་སྐྱོར་མ་དངུལ་ཚོད་ལྟའི་བྱ་བ་སྤེལ་རྒྱུ་རེད། །