ཉིས་སྟོང་བཅུ་གསུམ་ལོའི་ལུགས་གསར་ལོ་སར་གྱི་སྔོན་ཏག་ཏག་ལ་རྒྱལ་སྲིད་སྤྱི་ཁྱབ་ཁང་གི་ཙུང་ལིས་ཝུན་ཅ་པའོ་མཚོ་སྔོན་ཞིང་ཆེན་ཡུས་ཧྲུའུ་བོད་རིགས་རང་སྐྱོང་ཁུལ་ཆགས་སའི་སྐྱེ་རྒུ་གྲོང་བརྡལ་དུ་ཕེབས་ནས་ཡུས་ཧྲུའུ་ས་འགུལ་གནོད་འཚེའི་རྗེས་ཀྱི་སླར་གསོ་བསྐྱར་འཛུགས་བྱ་བའི་གནས་ཚུལ་ལ་གཟིགས་ཞིབ་གནང་བར་མ་ཟད། རིགས་སོ་སོའི་མི་དམངས་མང་ཚོགས་ལ་སྐོར་བརྒྱབ་སྟེ་ཁོ་ཚོར་ལུགས་གསར་ལོ་སར་གྱི་བཀྲ་ཤིས་སྨོན་འདུན་ཞུས། འདི་ནི་ཉིས་སྟོང་བཅུ་གཉིས་ལོའི་ཟླ་བཅུ་གཉིས་པའི་ཚེས་སོ་གཅིག་ཉིན། ཙུང་ལིས་ཝུན་ཅ་པའོ་མཚོ་ངོས་ལས་མཐོ་ཚད་ལ་རྨིད་བཞི་སྟོང་ཡོད་པའི་སྟག་སྡེར་རི་བོའི་རྩེར་ཕེབས་ནས་ཡུས་ཧྲུའུ་སྐྱེ་རྒུ་གྲོང་བརྡལ་གྱི་ས་འགུལ་གནོད་འཚེའི་རྗེས་ཀྱི་སླར་གསོ་བསྐྱར་འཛུགས་བྱ་བར་གཟིགས་ཞིབ་གནང་བའི་ཚུལ་རེད།

པར་འདི་ནི་ཉིས་སྟོང་བཅུ་གཉིས་ལོའི་ཟླ་བཅུ་གཉིས་པའི་ཚེས་སོ་གཅིག་ཉིན། ཝུན་ཅ་པའོ་ཡིས་འདྲེན་ལུང་མདའ་སྡོད་ཁུལ་གྱི་མང་ཚོགས་ཀྱི་ཁྱིམ་དུ་དམངས་ཀྱི་འཚོ་བའི་གནས་ཚུལ་ལ་རྒྱུས་ལོན་བྱེད་སྐབས་ཁོང་གིས་བོད་ལྭ་མནབ་པའི་ཚུལ་རེད།

པར་འདི་ནི་ཉིས་སྟོང་བཅུ་གཉིས་ལོའི་ཟླ་བཅུ་གཉིས་པའི་ཚེས་སོ་གཅིག་ཉིན། ཙུང་ལིས་ཝུན་ཅ་པའོ་ཡུས་ཧྲུའུ་ས་འགུལ་གནོད་འཚེའི་རྗེས་སུ་སླར་གསོ་བསྐྱར་འཛུགས་བྱས་པའི་དར་དམར་སློབ་ཆུང་དུ་ཕེབས་ནས་བྱིས་པ་རྣམས་དང་མཉམ་དུ་བོད་ཀྱི་ཞབས་བྲོ་འཁྲབ་པའི་ཚུལ་རེད།

པར་འདི་ནི་ཉིས་སྟོང་བཅུ་གཉིས་ལོའི་ཟླ་བཅུ་གཉིས་པའི་ཚེས་སོ་གཅིག་ཉིན། ཝུན་ཅ་པའོ་ཡིས་དེང་ཁ་དགོན་པའི་གྲྭ་བཙུན་རྣམས་ལ་སྐོར་རྒྱག་སྐབས་འདུ་ཁང་དང་གྲྭ་ཤག་སོགས་ལ་གཟིགས་ཞིབ་གནང་བའི་ཚུལ་རེད།

པར་འདི་ནི་ཉིས་སྟོང་བཅུ་གཉིས་ལོའི་ཟླ་བཅུ་གཉིས་པའི་ཚེས་སོ་གཅིག་ཉིན། ཝུན་ཅ་པའོ་ཡིས་འདྲེན་ལུང་མདའ་སྡོད་ཁུལ་གྱི་སྡོད་དམངས་ལ་སྐོར་རྒྱག་པའི་ཚུལ་རེད།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཉིས་སྟོང་བཅུ་གཉིས་ལོའི་ཟླ་བཅུ་གཉིས་པའི་ཚེས་སོ་གཅིག་ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལིས་ཝུན་ཅ་པའོ་མཚོ་སྔོན་ཞིང་ཆེན་ཡུས་ཧྲུའུ་བོད་རིགས་རང་སྐྱོང་ཁུལ་ཆགས་སའི་སྐྱེ་རྒུ་གྲོང་བརྡལ་དུ་ཕེབས་ནས་ཡུས་ཧྲུའུ་ས་འགུལ་གནོད་འཚེའི་རྗེས་ཀྱི་སླར་གསོ་བསྐྱར་འཛུགས་བྱ་བའི་གནས་ཚུལ་ལ་གཟིགས་ཞིབ་གནང་བར་མ་ཟད། རིགས་སོ་སའི་མི་དམངས་མང་ཚོགས་ལ་སྐོར་བརྒྱབ་སྟེ་ཁོ་ཚོར་ལུགས་གསར་ལོ་སར་གྱི་བཀྲ་ཤིས་སྨོན་འདུན་ཞུས། ཉིས་སྟོང་བཅུ་གཉིས་ལོའི་ཟླ་བཅུ་གཉིས་པའི་ཚེས་སོ་གཅིག་ཉིན་གྱི་སྔ་དྲོ། ཝུན་ཅ་པའོ་སྟག་སྡེར་རི་བོའི་རྩེར་ཕེབས་ནས་སྐྱེ་རྒུ་གྲོང་བརྡལ་གྱི་གནོད་འཚེའི་རྗེས་ཀྱི་སླར་གསོ་བསྐྱར་འཛུགས་བྱ་བའི་རྣམ་པར་གཟིགས་ཞིབ་གནང་། སྐྱེ་རྒུ་གྲོང་བརྡལ་ནི་ཡུས་ཧྲུའུ་ས་འགུལ་གནོད་འཚེའི་ཁྲོད་གནོད་འཚེ་ཐེབས་པ་ཆེས་ཚབས་ཆེ་བའི་ས་ཁུལ་ཡིན་པ་དང་། ཉིས་སྟོང་བཅུ་ལོའི་ཟླ་བཞི་བའི་ཚེས་བཅུ་བཞིའི་ཉིན། ཡུས་ཧྲུའུ་སྐྱེ་རྒུ་གྲོང་བརྡལ་ལ་ས་འགུལ་བརྒྱུགས་རྗེས་ཀྱི་ཉིན་གཉིས་པར་ཙུང་ལིས་ཝུན་ཅ་པའོ་གནམ་གྲུར་བཞུགས་ནས་གནོད་ཐེབས་ས་ཁུལ་དུ་ཕེབས་པ་དང་། ཟླ་ལྔ་བའི་ཚེས་གཉིས་ཉིན་ཁོང་ཉིད་ཡང་བསྐྱར་ཐེངས་གཅིག་ལ་ཡུས་ཧྲུའུ་གནོད་ཐེབས་ས་ཁུལ་དུ་ཕེབས་མྱོང་། ལོ་གཉིས་ལྷག་གི་རིང་ལ་ཁོང་གིས་ཡུས་ཧྲུའུ་ས་འགུལ་གནོད་འཚེའི་རྗེས་ཀྱི་སླར་གསོ་བསྐྱར་འཛུགས་བྱ་བའི་ཐད་ལ་ཐེངས་མང་བོར་བཀོད་སྒྲིག་མཛད། ལོ་གཉིས་དང་ཟླ་ལྔ་འགོར་རྗེས་ཀྱི་དེ་རིང་སྐྱེ་རྒུ་གྲོང་བརྡལ་ལ་འགྱུར་ལྡོག་ཆེན་པོ་བྱུང་འདུག སྔོན་ཆད་ཞིག་རལ་གྱིས་ཁེངས་པའི་ས་དེ་རུ་ད་ལྟ་ཕྲེང་སྟར་བསྒྲིགས་པའི་ཁང་པ་དང་ཁོད་ཡངས་པའི་སྲང་ལམ། ད་དུང་མི་རིགས་ཀྱི་ཁྱད་ཆོས་ལྡན་པའི་རྟེན་མཛོད་ཁང་དང་གེ་སར་ཐང་ཆེན་སོགས་མིག་ལམ་དུ་མངོན་བྱུང་། ད་ལྟ་མཁར་གྲོང་སྡོད་དམངས་ཀྱི་སྡོད་ཁང་འཛུགས་སྐྲུན་ཕལ་ཆེར་ལེགས་འགྲུབ་བྱུང་སྟེ་ཁྱིམ་ཚང་མང་ཆེ་ཤོས་ཁང་པ་གསར་བའི་ནང་གནས་སྤར་འདུག་ལ། སློབ་གསོ་དང་འཕྲོད་བསྟེན་སོགས་ཀྱི་ལས་གཞིའི་འཕེལ་རིམ་ཡང་ཧ་ཅང་བདེ་བླག་རེད། རི་ལས་བབས་རྗེས་ཝུན་ཅ་པའོ་ཏང་སྲིད་ལས་ཁུངས་ཀྱི་གནས་སྐབས་སུ་སྡོད་ས་དང་སྡོད་དམངས་གནས་སྐབས་སུ་བཀོད་སྒྲིག་བྱས་ཡོད་སར་སོང་བར་མ་ཟད། ལས་བྱེད་པ་དང་ལས་བཟོ་བ་རྣམས་དང་མཉམ་དུ་གུང་ཚིགས་གསོལ། ལོ་བརྒྱད་བརྒྱའི་ལོ་རྒྱུས་ལྡན་པའི་དེང་ཁ་དགོན་པར་ས་འགུལ་གྱི་ཁྲོད་དུ་གཏོར་བརླགས་ཚབས་ཆེན་ཐེབས་པ་དང་། ཝུན་ཅ་པའོ་དེང་ཁ་དགོན་དུ་ཕེབས་ནས་གྲྭ་བཙུན་རྣམས་ལ་སྐོར་བརྒྱབ་པར་མ་ཟད་གསར་དུ་བཞེངས་པའི་དགོན་པའི་འདུ་ཁང་དང་གྲྭ་ཤག་ལ་གཟིགས་ཞིབ་གནང་། ཁོང་གིས་གསུངས་རྒྱུར། ངས་ད་བར་དུ་གནོད་ཐེབས་མི་དམངས་དང་ལྷག་པར་ཏུ་བོད་རིགས་སྤུན་ཟླ་དང་གྲྭ་བཙུན་རྣམས་ལ་སེམས་ཁུར་བྱེད་བཞིན་ཡོད། དེ་རིང་དགོན་སྡེ་གསར་བཞེངས་བྱས་པའི་རྣམ་པ་འདི་མཐོང་དུས་ང་རང་དགའ་སྤྲོ་ཆེན་པོ་སྐྱེས་བྱུང་ཞེས་གསུངས། ཝུན་ཅ་པའོ་ཡིས་གསུངས་རྒྱུར། ཆོས་ལུགས་ནི་རིག་གནས་ཤིག་ཡིན་པ་དང་། བོད་ཁུལ་གྱི་མང་ཚོགས་མང་ཆེ་ཤོས་ཀྱིས་ནང་བསྟན་ཆོས་ལུགས་ལ་དད་མོས་བྱེད་བཞིན་ཡོད་པ་དང་། དེའི་ཐད་ལ་སྲིད་གཞུང་གིས་ཀྱང་ཆ་རྐྱེན་བཟང་བོ་བསྐྲུན་ཡོད་པས་གྲྭ་བཙུན་རྣམས་ཀྱིས་རང་གི་ཚུལ་ཁྲིམས་བརྟན་སྲུང་བྱས་ཏེ་སྤྱི་ཚོགས་ཀྱི་སྟེང་དུ་སྣང་བརྙན་བཟང་བོ་ཞིག་བསྐྲུན་དགོས་ཞེས་གསུངས། ཝུན་ཅ་པའོ་ཡིས་རོགས་འཛུགས་ལས་ཁུངས་ཀྱི་ལས་རེས་ལས་བྱེད་པ་དང་ལས་བཟོ་བར་སྐོར་རྒྱག་དུས་གསུངས་རྒྱུར། དེ་རིང་ང་ཡང་བསྐྱར་ཐེངས་གཅིག་ལ་ཡུས་ཧྲུའུ་རུ་ཡོང་དུས་ཡུས་ཧྲུའུ་གནོད་ཤུལ་བསྐྱར་འཛུགས་ཀྱི་རྣམ་པ་གསར་བ་འདིས་ང་ལ་དངོས་ནས་རང་ཉིད་ཀྱི་མིག་ཟུང་ལའང་ཡིད་མི་ཆེས་པའི་སྣང་བ་ཞིག་བྱིན་སོང་། མི་འགྱངས་པར་ཡུས་ཧྲུའུ་གནོད་འཚེའི་རྗེས་ཀྱི་སླར་གསོ་བསྐྱར་འཛུགས་བྱ་བ་སྣ་ཚོགས་ཕྱོགས་ཡོངས་ནས་མཇུག་བསྡུ་ལ་ཡོད་པས་ང་ཚོས་མཇུག་མཐའི་བྱ་བ་དེ་བཟང་བོར་བསྒྲུབ་སྟེ། ཡུས་ཧྲུའུ་ཁུལ་གྱི་ཕྱོགས་ཡོངས་ཀྱི་བྱ་བ་དེ་སྔར་ལས་རྐས་རིམ་གཅིག་གསར་དུ་འཕར་བར་བརྩོན་ལེན་བྱེད་དགོས་ཞེས་གསུངས། །