ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཡོངས་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཀྲང་ཏི་ཅང་གིས་ཚེས་བཅུ་གཉིས་ཉིན་མི་དམངས་ཚོགས་ཁང་ཆེན་མོའི་ནང་དུ་ཕེ་རུའི་ཙུང་ཐུང་ཝུའུ་མཱ་ལར་མཇལ་འཕྲད་གནང་།
 ཀྲང་ཏི་ཅང་གིས་གསུངས་རྒྱུར། ཉེ་བའི་ལོ་འགའི་རིང་ལ། ཀྲུང་གོ་དང་ཕེ་རུའི་བར་གྱི་འབྲེལ་བ་འཕེལ་རྒྱས་ཆེན་པོ་བྱུང་། ན་ནིང་ཀྲུའུ་ཞི་ཞི་ཅིན་ཕེན་དང་ཙུང་ཐུང་ཝུའུ་མཱ་ལ་རྣམ་གཉིས་ཀྱིས་མཉམ་དུ་ཕྱོགས་གཉིས་བར་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་བཙུགས་པ་ཁྱབ་སྒྲོག་བྱས་པ་དང་། རྒྱལ་ཁབ་གཉིས་ཀྱི་འབྲེལ་བ་འཕེལ་རྒྱས་ཀྱི་དུས་རིམ་གསར་བ་ཞིག་ཏུ་བསླེབས། ཀྲུང་གོ་ཕྱོགས་ཀྱིས་ནམ་ཡིན་ཡང་འཐབ་ཇུས་ཀྱི་མཐོ་ཚད་དང་ཡུན་རིང་བོར་དམིགས་ནས་ཀྲུང་གོ་དང་ཕེ་རུ་བར་གྱི་འབྲེལ་བ་གོང་འཕེལ་དུ་གཏོང་བར་མཐོང་ཆེན་བྱེད་པ་དང་། ཕེ་རུ་དང་མཉམ་དུ་འབད་པ་བྱེད་པ། ཁྱབ་ཁོངས་སོ་སོ་ནས་མཉམ་ལས་བྱེད་པའི་བྱ་བ་གཏིང་ཟབ་ཏུ་སྤེལ་ཏེ། རྒྱལ་ཁབ་གཉིས་ཀྱི་འབྲེལ་བ་རྒྱུན་སྲིང་ངང་འཕེལ་རྒྱས་སུ་གཏོང་འདོད་ཡོད་ཟེར། ཀྲུང་གོ་རྒྱལ་ཡོངས་དམངས་འཐུས་ཚོགས་ཆེན་གྱིས་ཕེ་རུ་རྒྱལ་ཚོགས་དང་མཉམ་དུ། ཀྲུང་གོ་དང་ཕེ་རུའི་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་ཇེ་ཟབ་ཏུ་གཏོང་བ་ནས་མགོ་བརྩམས་ཏེ་རྒྱལ་སྐྱོང་སྲིད་སྐྱོང་གི་ཉམས་མྱོང་ཐད་ཀྱི་བརྗེ་རེས་ཇེ་དྲག་ཏུ་བཏང་ནས། རྒྱལ་ཁབ་གཉིས་ཀྱི་འབྲེལ་བ་འཕེལ་རྒྱས་སུ་གཏོང་བའི་ཐད་ལ་བྱས་རྗེས་སྔར་ལས་ཆེན་པོ་འཇོག་འདོད་ཡོད་ཟེར།
ཝུའུ་མཱ་ལ་ཡིས་བཤད་རྒྱུར། ཕེ་རུ་ཕྱོགས་ཀྱིས་རྒྱུན་ཆད་མེད་པར་ཀྲུང་གོའི་བར་གྱི་མཉམ་ལས་ཇེ་བརྟན་དང་འཕེལ་རྒྱས་སུ་གཏོང་འདོད་ཡོད་ལ། ཕེ་རུ་རྒྱལ་ཚོགས་ཀྱིས་ཀྱང་དེའི་ཐད་ལ་དགེ་མཚན་ལྡན་པའི་ནུས་པ་འདོན་ངེས་ཡིན་ཟེར།  །