ཞིན་ཧྭ་གསར་འགྱུར་ཁང་ཟི་ལིང་ནས་ཟླ་བ10པའི་ཚེས26ཉིན་འབྱོར་བའི་གཏམ་གསར།རང་རྒྱལ་གྱི་ཞིང་ལས་ཉེན་འགོག་ཁྲོམ་རའི་གཞི་ཁྱོན་དེ་ཐོག་མར་འཇར་པན་ལས་བརྒལ་ཏེ་ཨ་རིའི་རྗེས་ནས་འཛམ་གླིང་གི་ཨང་གཉིས་པར་ཆགས་ཡོད་ཅེས་ཀྲུང་གོའི་ཉེན་འགོག་ལྟ་སྐུལ་དོ་དམ་ཨུ་ཡོན་ལྷན་ཁང་གི་ཀྲུའུ་ཞི་གཞོན་པ་ཁྲེན་ཝེན་ཧུའེ་ཡིས་མཚོ་སྔོན་དུ་དེ་ལྟར་བཤད་པ་རེད།
    བདེན་དཔང་ལྟ་སྐུལ་ལྷན་ཚོགས་ཀྱིས་བསྡོམས་རྩིས་བྱེད་པའི་གྲངས་ཀ་མངོན་པ་ལྟར་ན།2007ལོར་རང་རྒྱལ་གྱིས་ཀྲུང་དབྱང་ནོར་སྲིད་ཀྱིས་རྒྱབ་སྐྱོར་བྱས་པའི་ཞིང་ལས་ཉེན་འགོག་ཚོད་ལྟ་ལས་ཀ་སྤེལ་འགོ་བརྩམས་པ་ནས་བཟུང་།2013ལོའི་བར།ཞིང་ལས་ཉེན་འགོག་རིན་པའི་ཡོང་འབབ་དེ་སྒོར་དུང་ཕྱུར51.8ནས་སྒོར་དུང་ཕྱུར306.6ལ་འཕར་བས། ལོ་རེར་ཆ་སྙོམས་བརྒྱ་ཆ34.5འཕར་དང་། ཞིང་ལས་ཉེན་འགོག་གི་ཉེན་ཁ་དང་འགན་སྲུང་དེ་སྒོར་དུང་ཕྱུར1126ནས་སྒོར་དུང་ཕྱུར9006ལ་འཕར་བ་རེད།
    ཁྲེན་ཝེན་ཧུའེ་ཡིས་བསྟན་དོན།མིག་སྔར་ཀྲུང་དབྱང་ནོར་སྲིད་ཀྱིས་གཙོ་བོ་རྒྱལ་ཇུས་དམངས་འཚོ་དང་འབྲེལ་བ་ཡོད་པའི་ཆུ་འབྲས་དང་གྲོ མ་རྨོ་ལོ་ཏོག སྲིང་བལ། གཡག་སོགས་གཙོ་བོའི་ཞིང་ལས་སྐྱེ་དངོས་ཀྱི་རིགས15ལ་ཉེན་འགོག་རིན་པ་ཁ་གསབ་སྦྱིན་ཞིང་།ད་ལོ་ནས་བཟུང་ཀྲུང་དབྱང་ནོར་སྲིད་ཀྱིས་རྒྱལ་ཡོངས་རང་བཞིན་གྱི་ཁ་གསབ་རིགས་རྫས15ཕུད་དེ་ས་གནས་སོ་སོར་རིགས་གཅིག་གམ་ཡང་ན་རིགས་འགའི་ཁྱད་ཆོས་ལྡན་པའི་ཞིང་ལས་ཐོན་རྫས་དང་ཀ་སྐྱོར་ཐོན་ལས་ཀྱི་ཐོན་རྫས་བདམས་ཏེ་ཀྲུང་དབྱང་ནོར་སྲིད་ཀྱིས་ཉེན་འགོག་རིན་པའི་ཁ་གསབ་སྤྲོད་པ་དང་བྱ་དགའ་ཡིས་ཁ་གསབ་ཚབ་བྱེད་པའི་སྲིད་ཇུས་ལོངས་སུ་སྤྱོད་ཆོག་པའི་སྲིད་ཇུས་ལག་བསྟར་བྱེད་པར་མཐུན་སྦྱོར་བྱེད།
    ཁྲེན་ཝེན་ཧུའེ་ཡིས་བཤད་དོན།མིག་སྔར་རང་རྒྱལ་གྱི་ཞིང་ལས་ཉེན་འགོག་དེ་ཉེན་འགོག་འགན་ཁུར་བའི་ཐོན་རྫས་ཐོག་ཞིང་ལས་དང་ནགས་ལས། འབྲོག་ལས། ཞོར་ལས། ཉ་ལས་བཅས་ཕྱོགས་གང་ཅིའི་ཐད་ལ་ཁྱབ་ཡོད་ཅིང་། རྒྱལ་ཡོངས་ཀྱི་ཞིང་ཆེན་དང་ལྗོངས།གྲོང་ཁྱེར་ཡོངས་ལ་ཁྱབ་པ་དང་ཞིང་དུད་ཀྱི་ཐེངས་གྲངས་དུང་ཕྱུར2ལ་ཉེ་བར་ཉེན་འགོག་འགན་ཁུར་བྱེད་པས་སའི་གོ་ལ་ཧྲིལ་པོར་ཆེས་གལ་ཆེ་བ་དང་ཆེསགསོན་ཉམས་དོད་པའི་ཞིང་ལས་ཉེན་འགོག་གི་ཁྲོམ་རའི་ཡ་གྱལ་ཞིག་ཏུ་གྱུར་བ་རེད།