ཞིན་ཧྭ་གསར་འགྱུར་ཁང་ཟི་ལིང་ནས་ཟླ་བ10པའི་ཚེས22ཉིན་འབྱོར་བའི་གཏམ་གསར།བྱང་སྐར་ལག་རྩལ་གྱིས་འབྲོག་པར་ཕྱུགས་འཚོ་བའི་བརྡ་འཕྲིན་ཅན་གྱི་ཁྲིད་སྟོན་མ་ལག་དེ་ཉེ་ཆར་མཚོ་སྔོན་ཞིང་ཆེན་དུ་དངོས་སུ་སྤྱོད་འགོ་བཙུགས་པ་རེད།འབྱུང་འགྱུར་ལ་མཐོ་སྒང་གི་འབྲོག་པས་ལག་ཐོག་ཤེས་ནུས་ཀྱི་མཐུད་སྣེ་སྒྲིག་ཆས་བཟུང་ཏེ་ཕྱུགས་ཟོག་སྤོ་བའི་ལམ་ཐིག་དང་ཕྱུགས་ར་སྤོ་བའི་དུས་ཚོད་གཏན་འཁེལ་བྱེད་ཐུབ་པས།ཚན་རིག་དང་མཐུན་པའི་སྒོ་ཕྱུགས་ཟོག་འཚོ་བར་ཁྲིད་སྟོན་ཐོབ་ཐུབ་པར་གྱུར།
    ལོ་ཕྱེད་སྔོན་དུ་མ་ལག་འདི་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་ཧེ་ཡན་རྫོང་གི་མཚོ་སྔོན་པོ་ས་ཁུལ་དུ་བཀོལ་སྤྱོད་ཚོད་ལྟ་བྱས་ཤིང་། འབྲོག་པ་རྣམས་ཀྱིས་རེས་མོས་དང་འོས་འཚམ་གྱིས་ཕྱུགས་ཟོག་འཚོ་བར་སྣེ་ཁྲིད་བྱས་པ་རེད།ཤེས་ནུས་ཀྱི་མཐུད་སྣེ་སྒྲིག་ཆས་ལ་ལྡན་པའི་མ་ལག་གནས་ཐིག་གཏན་འཁེལ་དང་ཕྱོགས་སྟོན་བྱེད་པ་དང་།གནམ་གཤིས་སྔོན་བརྡ་དང་སྔོན་ཚུད་ནས་ཉེན་བརྡ་གཏོང་བ་སོགས་ཀྱི་ནུས་པ་དེས་རང་བྱུང་གནོད་སྐྱོན་དང་སྲོག་ཆགས་ལ་རིམས་ནད་བྱུང་ཚུལ་དུས་ཐོག་ཏུ་འབྲོག་པའི་ལག་ཐོག་གི་ཤེས་ནུས་མཐུད་སྣེར་ཉེན་བརྡ་འབྱོར་ཐུབ་པས་འབྲོག་པའི་གྱོང་གུད་ཇེ་ཉུང་དུ་གཏོང་ཐུབ་པ་རེད།ཕྱིན་ཆད་ང་ཚོས་མ་ལག་ཁྱབ་པའི་ས་ཁོངས་རྒྱ་བསྐྱེད་བཏང་ནས་འབྲོག་དམངས་དེ་བས་མང་པོར་ཁེ་ཕན་ཐོབ་འཇུག་རྒྱུ་རེད་ཅེས་པ་ནི་རྣམ་གྲངས་ལག་བསྟར་འགན་ཁུར་པ་མཚོ་སྔོན་ཞིང་ཆེན་ཕྱུགས་ལས་ཕྱུགས་ནད་སྨན་པའི་ཚན་རིག་ཁང་གི་ཕྱུགས་ཟོག་ཞིབ་འཇུག་སུའོ་ཡི་སུའོ་ཀྲང་ཕེ་ཆིང་ཧྲེང་གིས་དེ་ལྟར་བཤད་པ་རེད།
    མཚོ་སྔོན་ཞིང་ཆེན་ལ་བེད་སྤྱོད་ཆོག་པའི་རྩྭ་ར་མུའུ་དུང་ཕྱུར4.74ཡོད་ཅིང་།ཕལ་ཆེར་རྨ་འབྲི་རྫ་གསུམ་གྱི་འབྱུང་ཡུལ་ཁུལ་དང་མཚོ་སྔོན་པོར་སྐོར་བའི་ས་ཁུལ་དུ་ཆགས་ཡོད།དེ་ནི་མཐོ་གྲང་སྤང་སར་གཏོགས་ཤིང་ཕྱུགས་ཟོག་གི་ཐེག་ཤུགས་ཅུང་ཞན་པ་ཡིན།བརྡ་འཕྲིན་ཅན་གྱི་ཕྱུགས་ཟོག་འཚོ་བའི་མ་ལག་འཛུགས་པ་བརྒྱུད་ནས་རྩྭ་རའི་གནས་ཚུལ་ལ་ལྟ་སྐུལ་དང་ཚོད་འཛིན་བྱེད་པ་དང་།འབྲོག་པས་རེས་མོས་དང་འོས་འཚམ་གྱིས་ཕྱུགས་ཟོག་འཚོ་བར་སྣེ་ཁྲིད་བྱས་ཏེ་ཕྱུགས་ཟོག་མང་ནས་གཟན་རྩྭ་ཉུང་བའི་འགལ་ཟླ་ཞི་ལྷོད་གཏོང་བ་དང་།མཐོ་སྒང་རྩྭ་རའི་སྐྱེ་ཁམས་དོ་མཉམ་ཡོང་བར་སྲུང་སྐྱོང་བྱས་པ་རེད།