ཚེས་ཉི་ཤུ་ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ལིས་ཁི་ཆཱང་གིས་ཀྲུང་ནན་ཧེ་ཙི་ཀོང་ཀི་ནས་འཛམ་གླིང་གི་སྟོབས་ལྡན་ཁེ་ལས་ལྔ་བརྒྱའི་ཁྲོད་ཀྱི་ཏུའུ་པང་ཀུང་ཟིའི་ཏུང་ཧྲི་ཀྲང་དང་དབུ་བཞུགས་ལག་བསྟར་དཔོན་པོ་ཁི་ཨེ་ལུང་ལ་མཇལ་འཕྲད་གནང་།

རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ལིས་ཁི་ཆཱང་གིས་ཚེས་ཉི་ཤུ་ཉིན་ཀྲུང་ནན་ཧེ་ཙི་ཀོང་ཀི་ནས་སོ་སོར་འཛམ་གླིང་གི་སྟོབས་ལྡན་ཁེ་ལས་ལྔ་བརྒྱའི་ཁྲོད་ཀྱི་ཨ་མེ་རི་ཁའི་མཉམ་འབྲེལ་ལག་རྩལ་ཀུང་ཟིའི་ཏུང་ཧྲི་ཀྲང་དང་དབུ་བཞུགས་ལག་བསྟར་དཔོན་པོའི་འགན་འཁུར་མཁན་ཞའེ་ན་བོ་དང་། ཏུའུ་པང་ཀུང་ཟིའི་ཏུང་ཧྲི་ཀྲང་དང་དབུ་བཞུགས་ལག་བསྟར་དཔོན་པོའི་འགན་འཁུར་མཁན་ཁི་ཨེ་ལུང་གཉིས་ལ་མཇལ་འཕྲད་གནང་། ལིས་ཁི་ཆཱང་གིས་བསྟན་དོན། ཀྲུང་གོ་དང་ཨ་མེ་རི་ཁ་གཉིས་ནི་འཛམ་གླིང་ཐོག་ཆེས་གལ་ཆེ་བའི་རྒྱལ་ཁབ་གཉིས་ཡིན་པ་དང་། ཕྱོགས་གཉིས་བར་འཛུགས་སྐྲུན་གྱི་ཕྱོགས་ནས་ཕན་ཚུན་ལ་བརྩི་འཇོག་དང་མཉམ་ལས་ཀྱི་ཕྱོགས་ནས་གཉིས་ཕན་མཉམ་རྒྱལ་བྱེད་པའི་རྣམ་པ་གསར་བའི་རྒྱལ་ཁབ་ཆེན་པོའི་འབྲེལ་བ་ཡོད་ལ། ཕྱོགས་གཉིས་ཀྱིས་འཕེལ་རྒྱས་བགྲོད་ལམ་སྟེང་དུ་ཕན་ཚུན་ལ་བརྟེན་དགོས་པ་དང་མཉམ་དུ་འཚོལ་ཞིབ་བྱེད་དགོས། ཆེས་གལ་ཆེ་བ་ནི་ཡུན་རིང་གི་འཐབ་ཇུས་ནས་མགོ་བརྩམས་ཏེ་ངེས་པ་དོན་གྱིས་ཕྱོགས་གཉིས་ཀྱི་དཀྱིལ་སྙིང་ཁེ་ཕན་དང་གནད་དོན་གལ་ཆེན་ཐད་ནས་ཕན་ཚུན་ལ་བརྩི་འཇོག་བྱས་ནས། ཕྱོགས་གཉིས་ཀྱི་འབྲེལ་བའི་འཕེལ་རྒྱས་ལ་ཕན་པའི་བྱ་བ་མང་པོ་སྒྲུབ་རྒྱུ་དེ་འཛམ་གླིང་ལའང་ཕན་པ་ཡོད་ཟེར།

ཞའེ་ན་བོ་དང་ཁི་ཨེ་ལུང་གཉིས་ཙུང་ལི་གཞོན་པ་ལིས་ཁི་ཆཱང་གིས་འཇལ་འཕྲད་གནང་བར་བཀའ་དྲིན་ཆེ་ཞུས་པར་མ་ཟད། ཀྲུང་གོའི་དངུལ་གཏོང་ཁོར་ཡུག་ལ་གདེང་འཇོག་ཚད་མཐོན་པོ་བྱས་པ་དང་ཀྲུང་གོའི་ཕྱོགས་བར་ལོ་མང་པོའི་མཉམ་ལས་བརྒྱུད་དེ་གཉིས་ཕན་མཉམ་ལས་མངོན་འགྱུར་བྱེད་འདོད་ཡོད་ཟེར།