རྒྱལ་ཡོངས་ཀྱི་སྐབས་བཅུ་བའི་གྲངས་ཉུང་མི་རིགས་རྩོམ་རིག་གསར་རྩོམ་གྱི་རྟ་མཆོག་བུམ་པའི་བྱ་དགའ་གནང་བའི་མཛད་སྒོ་དེ་ཟླ་དགུ་བའི་ཚེས་བཅུ་དགུ་ཉིན་གྱི་དགོང་མོ་རྒྱལ་ཁབ་ཟློས་གར་ཁང་ཆེན་མོ་ནས་གཟབ་རྒྱས་ངང་བསྡུས། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན་ལིས་ཁྲང་ཁྲོན་གྱིས་རྟེན་འབྲེལ་ཞུ་བའི་གློག་འཕྲིན་བསྐུར། ལིས་ཁྲང་ཁྲོན་གྱིས་རྟེན་འབྲེལ་ཞུ་བའི་གློག་འཕྲིན་ནང་གསུངས་རྒྱུར། གྲངས་ཉུང་མི་རིགས་ཀྱི་རྩོམ་རིག་ནི་རང་རྒྱལ་སྤྱི་ཚོགས་རིང་ལུགས་རྩོམ་རིག་གི་གྲུབ་ཆ་གཙོ་བོ་ཞིག་ཡིན་པ་དང་། ཀྲུང་གོ་གསར་བ་དབུ་བརྙེས་རྗེས་དང་ལྷག་པར་དུ་བཅོས་བསྒྱུར་སྒོ་འབྱེད་བྱས་པའི་ཚུན་ལ་དུས་རབས་སོ་སོའི་གྲངས་ཉུང་མི་རིགས་ཀྱི་རྩོམ་པ་པོ་རྣམས་ཀྱིས་ཐོག་མཐའ་བར་གསུམ་དུ་ཡང་དག་པའི་རྩོམ་རིག་གསར་རྩོམ་གྱི་ཁ་ཕྱོགས་རྒྱུན་འཁྱོངས་བྱས་ནས། རང་རྟོགས་སྒོས་གསར་བརྗེ་དང་འཛུགས་སྐྲུན། བཅོས་བསྒྱུར་བཅས་ཀྱི་དུས་རབས་ཀྱི་རླབས་རྒྱུན་ཁྲོད་ཟབ་ཞུགས་བྱས་ཏེ། མི་དམངས་མང་ཚོགས་ཀྱི་དངོས་ཡོད་འཚོ་བ་ལ་རྐང་འཛུགས་པ་དང་མི་རིགས་ཀྱི་སྲོལ་རྒྱུན་རིག་གནས་སྣ་ཚོགས་བསྡུ་ལེན་བྱས་ཏེ། བསམ་བློའི་ནང་དོན་དང་སྒྱུ་རྩལ་གྱི་མཛེས་པ་གང་གི་ཆ་ནས་ཀྱང་མི་རིགས་ཀྱི་ཁྱད་ཆོས་མངོན་པར་གསལ་བའི་ཕུལ་དུ་བྱུང་བའི་རྩོམ་རིག་བརྩམས་ཆོས་མང་པོ་ཞིག་གསར་རྩོམ་བྱས་ཡོད་པ་དེ་དག་ནི་རང་རྒྱལ་རྩོམ་རིག་གི་ལྡུམ་རའི་ནང་གི་བཀྲགས་མདངས་འཚེར་བའི་མེ་ཏོག་ཆུན་པོ་ཞིག་ཏུ་སྣང་ལ། སྤྱི་ཚོགས་རིང་ལུགས་ཀྱི་རིག་གནས་དར་རྒྱས་གོང་འཕེལ་ལ་སྐུལ་འདེད་བྱེད་པ་དང་། རིགས་སོ་སོའི་མི་དམངས་མཉམ་དུ་མཐུན་སྒྲིལ་དང་མདུན་སྐྱོད། མཉམ་དུ་དར་རྒྱས་འཕེལ་རྒྱས་སུ་འགྲོ་བར་དགེ་མཚན་ལྡན་པའི་བྱས་རྗེས་བཞག་ཡོད་ཅེས་གསུངས།