ཟླ་དགུ་བའི་ཚེས་བཅུ་གཅིག་ནས་བཅུ་གཉིས་ཉིན་བར། 2012ལོའི་ཀྲུང་གོ་ཉིན་ཞ་རྒྱལ་སྤྱིའི་དངུལ་གཏོང་ཉོ་ཚོང་ཚོང་གཏམ་ཚོགས་འདུ་དང་ཀྲུང་གོ་ཨ་རབ་འབྱོར་ཚོང་གླེང་སྟེགས་སྐབས་གསུམ་པར་ཞུགས་པའི་སྐབས་སུ། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ལིས་ཁི་ཆཱང་སྔ་གཞུག་ཏུ་ཉིན་ཞ་རང་སྐྱོང་ལྗོངས་ཀྱི་དབྱིན་ཁྲོན་དང་ཧྲི་ཙོས་ཧྲན་སོགས་ས་ཁུལ་ལ་ཕེབས་ཏེ་བྱ་བར་རྟོག་ཞིབ་བྱས། རྟོག་ཞིབ་བྱེད་སྐབས། ལིས་ཁི་ཆཱང་གིས་ནང་མཁོ་རྒྱ་བསྐྱེད་པའི་ཐབས་ཇུས་དེ་དམ་འཛིན་བྱས་ཏེ། ནུབ་རྒྱུད་གསར་སྤེལ་ཆེན་པོ་དང་ནུབ་རྒྱུད་ཕྱོགས་སུ་སྒོ་འབྱེད་ཚད་རྒྱ་བསྐྱེད་པ་གཉིས་ཟུང་དུ་སྦྲེལ་བ་དང་། ཕྱོགས་བསྡུས་ཁྱད་སྟོབས་གསར་བ་ཞིག་ཏུ་བསྒྱུར་རྒྱུ་དང་། དགེ་མཚན་ལྡན་པའི་བྱེད་ཐབས་སྤྱད་དེ་བརྟན་པོར་འཕར་སྣོན་འབྱུང་ཐུབ་ལ། གྲུབ་ཚུལ་ལེགས་སྒྲིག་ཐུབ་པ། དམངས་ཀྱི་འཚོ་བར་ཕན་ཐོགས་པའི་དོན་ཆེན་དང་དོན་དངོས་སྒྲུབ་སྟེ། དཔལ་འབྱོར་འཕར་ཤུགས་དང་རྒྱུན་སྲིང་རང་བཞིན་ཇེ་དྲག་ཏུ་གཏོང་དགོས་ཞེས་ནན་གྱིས་བསྟན།

རྟོག་ཞིབ་བྱེད་སྐབས། ལིས་ཁི་ཆཱང་གིས་ཉིན་ཞ་རང་སྐྱོང་ལྗོངས་ཀྱི་ཉེ་བའི་ལོ་འགར་དཔལ་འབྱོར་དང་སྤྱི་ཚོགས་འཕེལ་རྒྱས་ཐད་ནས་བླངས་པའི་གྲུབ་འབྲས་ཁས་ལེན་གང་ལེགས་མཛད་པར་མ་ཟད། ཉི་ཞ་ཡི་རིགས་སོ་སོའི་ལས་བྱེད་པ་དང་མང་ཚོགས་ལ་ནུབ་རྒྱུད་གསར་སྤེལ་ཆེན་པོའི་གོ་སྐབས་མུ་མཐུད་དུ་དམ་འཛིན་བྱས་ཏེ། རྨ་ཆུའི་འགྲམ་རྒྱུད་དཔལ་འབྱོར་ས་ཁུལ་དང་ལྗོངས་ཡོངས་ཀྱི་འཕེལ་རྒྱས་ལ་གཅིག་གྱུར་གྱིས་འཆར་འགོད་བྱས་ཏེ། དབུལ་སྐྱོར་བྱ་བར་ཡར་སྐུལ་དང་། མི་རིགས་མཐུན་སྒྲིལ་ལ་ཡར་སྐུལ། དཔལ་འབྱོར་དང་སྤྱི་ཚོགས་འཕེལ་རྒྱས་མགྱོགས་པོ་འབྱུང་བར་ཡར་སྐུལ་གཏོང་དགོས་པའི་ཐུགས་རེ་བཏོན།