ཀྲུང་གོ་བོད་ཀྱི་དྲ་བའི་འཕྲིན། རོང་འབྲོག་མང་ཚོགས་ཀྱི་འཐུང་ཆུ་བདེ་འཇགས་བྱ་བར་འགན་སྲུང་དང་། རོང་འབྲོག་པའི་བདེ་ཐང་ལ་སྲུང་སྐྱོང་ བྱས་ཏེ། སྤྱི་ཚོགས་དཔལ་འབྱོར་རྒྱུན་མཐུད་ངང་འཕེལ་རྒྱས་བྱུང་བར་སྐུལ་འདེད་གཏོང་ཆེད། ལྷ་ས་གྲོང་ཁྱེར་གྱིས་མ་དངུལ་སྒོར་ཁྲི650དངོས་འབེབས་བྱས་ཏེ། འདམ་གཞུང་རྫོང་དང་། ཆུ་ཤུར་རྫོང་། སྟག་རྩེ་རྫོང་། མལ་གྲོ་གུང་དཀར་རྫོང་གི་ས་ཚིགས65ལ་ས་མཚམས་འབྱེད་རྟགས་དང་། རྡོ་རིང་། མཛུབ་སྟོན་བྱང་བུ། སྲུང་སྐྱོང་ཁུལ་གྱི་མཐའ་སྲུང་ར་སྐོར་བཅས་བཙུགས་པ་དང་། ཆུ་རྐ་གསར་བསྐྲུན་དང་བསྒྱུར་བཀོད་བྱེད་པ།སྲུང་སྐྱོང་ཁུལ་ལྗང་སྒྱུར་བྱེད་པ་སོགས་ཀྱི་འཛུགས་སྐྲུན་གཙོ་བྱས་པའི་ཆུ་མགོ་སྲུང་སྐྱོང་བྱེད་པའི་ལས་གཞི་འཛུགས་སྐྲུན་བྱས།
མིག་སྔར་ལྷ་ས་གྲོང་ཁྱེར་གྱིས་ཆུ་མགོ་སྲུང་སྐྱོང་བྱེད་པའི་ལས་གཞི51ལེགས་འགྲུབ་བྱུང་ཞིང་། ཆུ་མགོ་ལྷག་མ14ད་ལྟ་བྲེལ་འཚབ་ངང་ལག་བསྟར་བྱེད་བཞིན་པའི་སྒང་ཡིན་ལ། ལས་གཞི་འདི་དག་ལག་བསྟར་བྱས་པ་བརྒྱུད། ཞིང་སྡེའི་འཐུང་ཆུའི་ཆུ་མགོ་ས་ཁུལ་གྱི་ཁོར་ཡུག་དོ་དམ་བྱ་བར་ཤུགས་སྣོན་བྱེད་ཐུབ་པ་མ་ཟད། ཞིང་སྡེའི་འཐུང་ཆུ་བདེ་འཇགས་བྱ་བར་སྔར་ལས་ལྷག་པའི་སྒོ་ནས་ཁག་ཐེག་བྱེད་ཐུབ་པ་རེད།  །