ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། སྐབས་10པའི་རྒྱལ་ཡོངས་གྲངས་ཉུང་མི་རིགས་ཀྱི་རྩོམ་རིག་བརྩམ་བྱའི་རྟ་མཆོག་བྱ་དགའ་དཔྱད་འདེམས་བྱ་རྒྱུ་དེ་ཉིན་ཤས་གོང་མཇུག་བསྒྲིལ་ཡོད་པ་རེད། རྟ་མཆོག་བྱ་དགའ་ནི་ཀྲུང་གོའི་རྩོམ་པ་པོའི་མཐུན་ཚོགས་དང་རྒྱལ་ཁབ་མི་རིགས་ལས་དོན་ཨུ་ཡོན་ལྷན་ཁང་གིས་མཉམ་འབྲེལ་ཐོག་གཙོ་གཉེར་བྱས་པ་ཞིག་ཡིན་པ་དང་། དེའི་དམིགས་ཡུལ་ནི་རང་རྒྱལ་གྱི་གྲངས་ཉུང་མི་རིགས་ཀྱི་རྩོམ་རིག་དར་རྒྱས་གོང་འཕེལ་འགྲོ་རྒྱུར་སྐུལ་འདེད་གཏོང་ཆེད་ཡིན་པ་རེད།

ད་ཐེངས་ཀྱི་དཔྱད་འདེམས་ནི་སྤྱི་ལོ་2008ལོ་ནས་སྤྱི་ལོ་2011ལོའི་བར་གྱི་རང་རྒྱལ་གྱི་མངའ་ཁོངས་སུ་པར་སྐྲུན་བྱས་པའི་གྲངས་ཉུང་མི་རིགས་ཀྱི་རྩོམ་པ་པོས་གསར་རྩོམ་བྱས་པའི་བརྩམས་སྒྲུང་རིང་གྲས་དང་། བརྩམས་སྒྲུང་འབྲིང་གྲས་དང་ཐུང་གྲས། འབོལ་རྩོམ། སྙན་ངག སྙན་ཞུའི་རྩོམ་རིག དེ་བཞིན་ཡིག་བསྒྱུར་བརྩམ་བྱ་བཅས་ལ་ཁྱོན་ཡོངས་ནས་ལྟ་ཞིབ་དང་གདེང་འཇོག་བྱེད་ཐེངས་གཅིག་ཡིན་པ་རེད། བརྩམས་སྒྲུང་འབྲིང་བ་དང་ཐུང་བ། འབོལ་རྩོམ། སྙན་ངག སྙན་ཞུའི་རྩོམ་རིག་བཅས་ཀྱི་བྱ་དགའ་ཐོབ་པའི་བརྩམ་བྱ་ཁག་ལྔ་ཡོད་པ་དང་། ཡིག་བསྒྱུར་བྱ་དགའ་ཐོབ་མཁན་བཞི་ཡོད་པ་རེད། བྱ་དགའ་ཐོབ་པའི་བརྩམ་བྱས་ཕྱོགས་མི་འདྲ་བའི་ཐད་ནས་གསོན་ཉམས་དོད་པོས་བསྒྱུར་བཅོས་སྒོ་དབྱེའི་ཚ་ཚ་འུར་འུར་གྱི་འཚོ་བ་དང་མི་རིགས་ཀྱི་སྲོལ་རྒྱུན་མངོན་པར་བྱས་ཡོད་པ་དང་། མི་རིགས་ཁག་གི་མངོན་གསལ་དོད་པའི་རིག་གནས་ཁྱད་ཆོས་མངོན་པར་བྱས་ཡོད་པ། མི་རིགས་ཁག་གི་མི་དམངས་ཀྱི་བསམ་པའི་ཉམས་འགྱུར་མངོན་པར་བྱས་ཡོད་པ་རེད། །