ཟླ་བརྒྱད་པའི་ཚེས་བཅུ་བཞི་ཉིན་ནས་ཚེས་བཅོ་ལྔའི་ཉིན་བར་ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན།རྒྱལ་སྲིད་སྤྱི་ཁྱབ་ཁང་གི་ཙུང་ལི་ཝུན་ཅ་པའོ་ཀྲིག་ཅང་ཞིང་ཆེན་གྱི་ཧང་ཀྲིག་དང་ཧུའུ་ཀྲིག ཅ་ཞིན་སོགས་སུ་ཕེབས་ནས་དཔལ་འབྱོར་འཁོར་རྒྱུག་གི་གནས་ཚུལ་ལ་རྟོག་ཞིབ་མཛད།

ཝུན་ཅ་པའོ་ཡིས་བསྟན་དོན།ད་སྔ་རང་རྒྱལ་གྱི་དཔལ་འབྱོར་འཕེལ་སྟངས་སྤྱིའི་ཆ་ནས་བཟང་བ་དང་།ཁྱབ་ཁོངས་ཁ་ཤས་སུ་འགྱུར་ལྡོག་བྱུང་ཡོད་པས་དཔལ་འབྱོར་བརྟན་ཞིང་མགྱོགས་པའི་སྒོ་ནས་འཕེལ་རྒྱས་སུ་འགྲོ་བར་མཐུན་རྐྱེན་མི་ཉུང་བ་ཞིག་བསྐྲུན་ཡོད།དེ་དང་ཆབས་ཅིག་ཏུ་ང་ཚོས་གསལ་བོར་ཤེས་དགོས་པ་ཞིག་ནི་དཔལ་འབྱོར་བརྟན་འཇགས་སྒོས་འཕར་བའི་རྨང་གཞི་དེ་འདྲ་བརྟན་པོ་མིན་པ་དང་།དཔལ་འབྱོར་གྱི་དཀའ་ཁག་ད་དུང་དུས་ཡུན་ཞིག་ལ་གནས་རྒྱུ་དེ་རེད།གནས་ཚུལ་འདིའི་འོག་ཏུ་ང་ཚོར་ཡིད་ཆེས་མཁོ་བ་དང་།རིམ་པ་སོ་སོའི་མགོ་ཁྲིད་དང་རྒྱ་ཆེའི་ཁེ་ལས།དེ་མིན་སྤྱི་ཚོགས་ཡོངས་ལའང་ཡིད་ཆེས་མཁོ་བ་དང་། ཀྲུང་དབྱང་གི་གཅིག་གྱུར་བཀོད་སྒྲིག་ལྟར་གནས་བབ་ལ་དབྱེ་ཞིབ་བྱས་ནས་དཔལ་འབྱོར་འཁོར་རྒྱུག་ཁྲོད་ཀྱི་གནས་ཚུལ་གསར་བ་དང་གནད་དོན་གསར་བ་གསལ་བོར་རྟོགས་དགོས་པར་མ་ཟད།རང་ས་གནས་དང་རང་སྡེ་ཁག་གི་དངོས་ཡོད་གནས་ཚུལ་དང་ཟུང་འབྲེལ་བྱས་ཏེ་གསར་སྐྲུན་རང་བཞིན་གྱི་སྒོ་ནས་བྱ་བ་བསྒྲུབ་དགོས་ཟེར།

ཝུན་ཅ་པའོ་བང་ཡེ་ཀུང་སི་དང་ཀྲུང་ཁུང་ཚན་རྩལ་སྡེ་ཚོགས། ནོ་ལི་འཕྲུལ་ཆས་ཀུང་སི་དང་ཧེ་ཞིན་གློག་ཆས་ཀུང་སི།ཝུའུ་ཧྥོན་ཀྲེད་ཀུང་སི་དང་ཡ་དབྱིན་གྱོན་ཆས་ཀུང་སི་སོགས་སུ་ཕེབས་ཏེ། ཁེ་ལས་ཀྱི་ཐོན་སྐྱེད་ཚོང་གཉེར་གནས་ཚུལ་ལ་རྒྱུས་ལོན་ཞིབ་མོ་མཛད་པར་མ་ཟད། ཁེ་ལས་སུ་བཞུགས་མོལ་ཚོགས་འདུ་ཐེངས་གསུམ་ལ་བསྡུས་ནས་ལས་རིགས་ཁག་གི་ཁེ་ལས་འགན་ཁུར་བ་བཅུ་ཁ་ལྷག་དང་མཉམ་དུ་བརྗེ་རེས་མཛད། ཡུལ་དངོས་ནས་རྟོག་ཞིབ་མཛད་པ་དང་ཚང་མས་འདོན་སྤྲོད་བྱས་པའི་གནས་ཚུལ་ལ་གཞིགས་ན། ད་སྔ་ཁེ་ལས་ཀྱི་འཕེལ་རྒྱས་ལ་ད་དུང་དཀའ་ཁག་དང་གནོན་ཤུགས་མི་ཉུང་བ་ཞིག་ཡོད་མོད། འོན་ཀྱང་དགེ་མཚན་ཡང་མི་ཉུང་བ་ཞིག་ཡོད།ཁེ་ལས་མང་ཤོས་ཤིག་གིས་དཀའ་བ་ཁྱད་དུ་བསད་ནས་རང་འགུལ་སྒོས་སྙོམས་སྒྲིག་བྱེད་པ་དང་།ཐབས་བརྒྱ་ཇུས་སྟོང་སྒོས་ཚོང་ར་རྒྱ་བསྐྱེད་དེ་ཕན་འབྲས་མི་ཉུང་བ་བླངས་ཡོད་ཟེར།

ཝུན་ཅ་པའོ་ཡིས་བསྟན་དོན།ང་ཐེངས་འདིར་རྟོག་ཞིབ་བྱེད་དུ་ཡོང་བའི་དམིགས་ཡུལ་ནི་ཡིད་ཆེས་ཆེ་རུ་བསྐྱེད་དེ་ལས་ཞུགས་ལ་དོ་སྣང་བྱེད་པ་དེ་ཡིན་ཏེ།ད་ལོའི་ཚུན་ལ་ང་ཚོས་བརྟན་འཇགས་སྒོས་གོང་འཕེལ་གཏོང་བ་དང་གྲུབ་ཚུལ་ལེགས་སྒྲིག་བྱེད་པ། དམངས་འཚོ་ལ་ཕན་པའི་རྩ་དོན་ལྟར།རྒྱལ་སྤྱིའི་དངུལ་ལོར་ཉམས་ཉེན་དང་ནང་སྒོས་སུ་ཡོ་རོབ་བུ་ལོན་ཉམས་ཉེན་གྱི་ཤུགས་རྐྱེན་མི་ལེགས་པར་ཁ་གཏད་དེ་ཚོད་འཛིན་ལེགས་སྒྲིག་བྱེད་པའི་བྱེད་ཐབས་རབ་དང་རིམ་པ་ཞིག་སྤྱད་ཡོད།གཅིག་ནི་གྲུབ་ཚུལ་རང་བཞིན་གྱི་དཔྱ་ཁྲལ་ཇེ་ཉུང་དུ་གཏོང་བའི་ནུས་ཤུགས་རྒྱ་བསྐྱེད་པ་དང་།ནང་སྒོས་སུ་ཚོང་ཁྲལ་དེ་གནས་ཐང་འཕར་བའི་ཁྲལ་དུ་བསྒྱུར་བར་ཚོད་ལྟ་བྱས་ནས་ཚོད་ལྟའི་ཁྱབ་ཁོངས་ཞིང་ཆེན་དང་གྲོང་ཁྱེར་བཅུ་ལ་རྒྱ་བསྐྱེད་པ་དང་།ཁེ་ལས་ཆུང་འབྲིང་གི་དཔྱ་ཁྲལ་ཁུར་བོ་ཇེ་ཡང་དུ་གཏོང་བའི་སྲིད་ཇུས་དང་བྱེད་ཐབས་ཀྱང་རབ་དང་རིམ་པ་ཞིག་ལག་བསྟར་བྱས།གཉིས་ནི་བརྟན་འཇགས་ཀྱི་དངུལ་ལོར་སྲིད་ཇུས་ལག་བསྟར་བྱས།ཐེངས་གཉིས་ལ་གསོག་དངུལ་གྱི་སྐྱེད་ཀའི་ཚད་ཇེ་དམའ་རུ་བཏང་བ་མ་ཟད།སྐྱེད་ཀའི་ཚད་དང་ནང་སྒོས་སུ་སྐྱི་དངུལ་གྱི་སྐྱེད་ཀའི་ཚད་ཀྱི་བར་སྟོང་རྒྱ་བསྐྱེད་དེ་གསོག་དངུལ་གྱི་སྐྱེད་ཀའི་ཚད་ཇེ་དམའ་རུ་བཏང་།གསུམ་ནི་རྒྱལ་ཡོངས་སུ་ཐེངས་གཉིས་ལ་གཞི་རྒྱ་ཆེ་བའི་སྒོ་ནས་ཁེ་ལས་ཀྱི་ལག་རྩལ་བསྒྱུར་བཀོད་བྱེད་པར་རྒྱབ་སྐྱོར་བྱས་པ་དང་།ཀྲུང་དབྱང་ནོར་སྲིད་ཀྱིས་མ་དངུལ་སྒོར་ཐེར་ཆེན་གཉིས་ཐེར་འབུམ་དྲུག་དུང་ཕྱུར་བརྒྱད་བཏང་ནས་སྐྱེད་སྤོགས་ཁ་གསབ་བྱེད་པའི་རྣམ་པས་ཁེ་ལས་ཀྱི་ལག་རྩལ་བསྒྱུར་བཀོད་ལ་རྒྱབ་སྐྱོར་བྱས།བཞི་ནི་དམངས་ཁྲོད་ཀྱི་དངུལ་གཏོང་ལ་སྐུལ་འདེད་བྱས་པ་དང་།དོན་ཚན་སོ་དྲུག་གི་ལག་བསྟར་སྒྲིག་སྲོལ་ཞིབ་ཕྲ་ཞེ་གཉིས་བཏོན་པ་དང་།ད་སྔ་དམངས་ཁྲོད་ཀྱི་དངུལ་གཏོང་གཏན་འཇགས་རྒྱུ་ནོར་གྱི་མ་དངུལ་ལས་བརྒྱ་ཆའི་རེ་གཉིས་ཟིན་པ་དང་།གོང་འཕར་གྱི་མགྱོགས་ཚད་རྒྱལ་དབང་མ་དངུལ་ལས་ཀྱང་མཐོ།ལྔ་ནི་ནུས་གྲོན་གློག་ཆས་ཀྱི་ལས་གཞི་ལག་བསྟར་བྱས་པ་དང་།ཕྱོགས་གཅིག་ནས་འཛད་སྤྱོད་རྒྱ་བསྐྱེད་པ་དང་ཕྱོགས་གཅིག་ནས་འབྲེལ་ཡོད་ཁེ་ལས་ཀྱི་ཐོན་སྐྱེད་ལ་སྐུལ་འདེད་བྱས།དྲུག་ནི་དམངས་འཚོ་དང་འབྲེལ་བའི་རྨང་བཀོད་སྒྲིག་ཆས་འཛུགས་བསྐྲུན་བྱེད་པར་ཤུགས་བསྐྱེད།བྱེད་ཐབས་འདི་དག་གིས་ད་སྔ་དང་མ་འོངས་པར་དཔལ་འབྱོར་མུ་མཐུད་དུ་འཕེལ་རྒྱས་དང་གྲུབ་ཚུལ་སྙོམས་སྒྲིག འཕེལ་སྟངས་བསྒྱུར་བ་དང་དམངས་ཀྱི་འཚོ་བ་ཇེ་ལེགས་སུ་གཏོང་བར་ནུས་པ་གལ་ཆེན་འདོན་སྤྲོད་བྱེད་ཐུབ་ཟེར།

ཝུན་ཅ་པའོ་ཡིས་བསྟན་དོན།ཉེ་བའི་ཟླ་འགའི་ནང་དང་ནང་སྒོས་སུ་ཟླ་བདུན་པའི་ཚུན་ལ།དཔལ་འབྱོར་འཁོར་རྒྱུག་ལ་འགྱུར་ལྡོག་ཁ་ཤས་བྱུང་ཡོད།གཅིག་ནི་དངུལ་གཏོང་དང་འཛད་སྤྱོད་བརྟན་འཇགས་ངང་འཕར་ནས་ནང་མཁོའི་འདེགས་སྐྱོར་གྱི་ནུས་པ་སྔར་ལས་ཇེ་དྲག་ཏུ་སོང་ཡོད།གཉིས་ནི་ཤར་རྒྱུད་ས་ཁུལ་གྱི་རྣམ་པ་ཅན་གྱི་བཟོ་ལས་གྱི་འཕར་ཚད་རིམ་གྱིས་ཇེ་མགྱོགས་སུ་འགྲོ་བཞིན་ཡོད།གསུམ་ནི་ངལ་རྩོལ་ནུས་ཤུགས་ཚོང་ར་སྤྱིའི་ཆ་ནས་བརྟན་འཇགས་ཡིན།བཞི་ནི་གྲུབ་ཚུལ་སྙོམས་སྒྲིག་བྱེད་པར་ནུས་པ་མངོན་གསལ་ཐོན་ཡོད།ད་སྔ་སྤྱིའི་ཆ་ནས་བཤད་ན་ཡང་བའི་བཟོ་ལས་ལྗིད་བའི་བཟོ་ལས་ལས་བཟང་བ་དང་།མཐོ་གསར་ལག་རྩལ་ཐོན་ལས་སྲོལ་རྒྱུན་ཐོན་ལས་ལས་བཟང་བ།ས་ཁུལ་འཕེལ་རྒྱས་ཀྱི་རོགས་འདེགས་རང་བཞིན་སྔར་ལས་ཇེ་དྲག་ཏུ་སོང་ནས་གྲུབ་ཚུལ་སྙོམས་སྒྲིག་གི་ནུས་པ་མངོན་ཡོད།ལྔ་ནི་དངོས་པོའི་རིན་གོང་བསྟུད་མར་མར་བབས་ནས་དངུལ་ལོར་སྲིད་ཇུས་ཀྱི་བཀོད་སྤྱོད་བྱེད་པའི་བར་སྟོང་ཆེར་སོང་བ་དང་།དངུལ་ལོར་གྱིས་དཔལ་འབྱོར་ལ་རྒྱབ་སྐྱོར་བྱེད་པའི་ནུས་པ་ཆེར་འགྲོ་བཞིན་ཡོད་ཟེར།

རྟོག་ཞིབ་མཛད་པའི་སྐབས་སུ་ཝུན་ཅ་པའོ་ཡིས་ཁེ་ལས་ཀྱི་ལས་བཟོ་བ་བསྡུ་བ་དང་ལས་བཟོ་བའི་འཚོ་བ་སོགས་ཀྱི་གནས་ཚུལ་ལ་ཐུགས་ཞིབ་མོས་རྒྱུས་ལོན་མཛད།བཞུགས་མོལ་ཚོགས་འདུའི་སྟེང་དུ་ཁོང་གིས་ད་དུང་ཀྲིག་ཅང་ཞིང་ཆེན་དང་ཧང་ཀྲིག་གྲོང་ཁྱེར།ཧུའུ་ཀྲིག་གྲོང་ཁྱེར་དང་ཅ་ཞིན་གྲོང་ཁྱེར་བཅས་ཀྱི་ལས་ཞུགས་ཞབས་ཞུ་སྡེ་ཁག་དང་།དེ་མིན་ཁེ་ལས་ཀྱི་འགན་ཁུར་བས་ལས་ཞུགས་གནས་ཚུལ་གྱི་དབྱེ་ཞིབ་དང་བསམ་འཆར་ལ་གསན།