ཀྲུང་གོ་བོད་ཀྱི་དྲ་བའི་འཕྲིན།ཟླ8པའི་ཚེས5ཉིན། ཀྲུང་གོ་དམངས་ཁྲོད་རིག་རྩལ་པའི་མཐུན་ཚོགས་དང་མཚོ་སྔོན་ཞིང་ཆེན་རྩོམ་རིག་མཉམ་འབྲེལ་ལྷན་ཚོགས་ཀྱིས་གཙོ་སྒྲུབ་བྱས་ཤིང་། ཆི་ལེན་རྫོང་སྲིད་གཞུང་གིས་འགན་སྒྲུབ་བྱས་པའི་སྐབས་དང་པོའི་ཀྲུང་གོའི་བོད་རིགས་ལ་གཞས་འགྲན་ཚོགས་དེ་ཆི་ལེན་རྫོང་ནས་སྤེལ་འགོ་བརྩམས་ཤིང་། སི་ཁྲོན་དང་ལྷ་ས། ཀན་སུའུ། ཡུན་ནན། མཚོ་སྔོན་སོགས་ཞིང་ལྗོངས་ལྔ་ནས་ཡོང་བའི་བོད་རིགས་ལ་གཞས་ལེན་མཁན52འགྲན་བསྡུར་ལ་ཞུགས།
    མཚོ་སྔོན་གྱི་བོད་རིགས་ལ་གཞས་རིག་གནས་རྒྱུད་འཛིན་བྱས་ཏེ། སྔར་ལས་མང་བའི་མི་རྣམས་ཀྱིས་གླུ་སྐད་ལ་བརྟེན་ནས་བདེ་སྐྱིད་ཀྱི་འཚོ་བར་བསྟོད་བསྔགས་བྱེད་ཆེད། རྒྱལ་ཡོངས་ཀྱི་ཞིང་ལྗོངས་ལྔ་ནས་ཡོང་བའི་བོད་རིགས་ལ་གཞས་ལེན་མཁན་རྣམས་གནས་འདིར་ལྷན་དུ་འཛོམས་ཏེ། སྙན་འཇེབས་ཀྱི་གླུ་སྐད་ཀྱིས་ཁོ་ཚོས་བདེ་སྐྱིད་ཀྱི་འཚོ་བར་ཡིད་སྨོན་དང་ཡིད་འོང་གི་མཛའ་མོར་བརྩེ་སེམས་ཕུལ། རྒྱུས་ལོན་པ་ལྟར་ན། བོད་རིགས་ལ་གཞས་ནི་མཐོ་སྒང་གི་བོད་རིགས་མི་དམངས་ཀྱིས་བརྩེ་དུང་ལ་བསྟོད་བསྔགས་དང་། བདེ་སྐྱིད་ཀྱི་འཚོ་བ་མངོན་པའི་གླུ་གཞས་རིགས་ཞིག་ཡིན་ཞིང་། མཐོ་སྒང་གི་ཁྱད་དུ་འཕགས་པའི་སྒྱུ་རྩལ་མཛེས་ཤུགས་ལྡན་ལ། བོད་རིགས་ཀྱི་རིག་གནས་སྒྱུ་རྩལ་གྱི་གཅེས་ནོར་ཡིན། 2003ལོ་ནས་བཟུང་། མཚོ་སྔོན་ཞིང་ཆེན་གྱིས་བདེ་བླག་ངང་ཞིང་ཆེན་ཡོངས་ཀྱི་ལ་གཞས་འགྲན་ཚོགས་ཐེངས་བདུན་ལ་སྤེལ་བ་དང་། འགྲན་ཚོགས་ལ་ཞུགས་པའི་གཞི་ཁྱོན་དང་འགྲན་ཞུགས་ཚད་གཞི་མུ་མཐུད་དུ་མཐོར་འདེགས་སུ་བཏང་ལ། སྤྱི་ཚོགས་ཀྱི་ཤུགས་རྐྱེན་ཀྱང་ལོ་རེར་ཇེ་ཆེར་སོང་བས། ལ་གཞས་ནི་མཚོ་སྔོན་གྱི“ཧྭ་ཨར”དང་འདྲ་བར་མཚོ་སྔོན་གྱི་རིག་གནས་ཆས་རྟགས་ལས་གཞི་ཞིག་ཏུ་གྱུར་ཡོད། །