ཟླ7པའི་ཚེས24སྟེ་ལུགས་རྙིང་གི་ཟླ6པའི་ཚེས6ཉིན། མཚོ་སྔོན་ཞིང་ཆེན་མཚོ་ལྷོ་ཁུལ་མང་རྫོང་མང་ཆུ་གྲོང་རྡལ་ནང་སོ་སྡེ་བའི་ནུབ་ཕྱོགས་ཀྱི་ཤེའུ་ལུང་འགྲམ་དུ་མང་ཆུ་གྲོང་རྡལ་གྱི་སྲོལ་རྒྱུན་དུས་སྟོན་ཏེ་དྲུག་པའི་ལྷ་རྩེད་དང་གྲོང་རྡལ་འདིའི་ཤ་རྭ་དང་ནང་སོ།  ཐོ་ལེ་བཅས་སྡེ་བ་གསུམ་གྱི་དམངས་ཁྲོད་དྲུག་པའི་ལྷ་རྩེད་བསྡུས་ཏེ་མང་རྫོང་དམངས་སྲོལ་དུས་སྟོན་རིག་གནས་བྱ་འགུལ་ཚ་ཚ་འུར་འུར་གྱིས་འགོ་བརྩམས།

 

         ཐེངས་འདིའི་དུས་ཆེན་ནི་ཆོས་ལུགས་ཀྱི་ཆོ་ག་དང་རིག་རྩལ་བྱ་འགུལ།  ངལ་གསོའི་རྩེད་འཇོ་བཅས་ལྷན་དུ་སྦྱར་བའི་དམངས་སྲོལ་དུས་ཆེན་ཞིག་ཡིན་ཞིང་།  དུས་ཆེན་འདིར་ལྷ་གསོལ་བསྙེན་བཀུར་དང་གསོལ་སྨོན།  ལོ་ལེགས་འབྱུང་བའི་བྱེད་སྒོ་སོགས་སྲོལ་རྒྱུན་གྱི་ཆོས་ལུགས་བྱ་འགུལ་ལས་གཞན་ད་དུང་ལྒང་ལི་དང་ཐག་འཐེན། མདའ་འཕེན།  མེ་མདའ་རྒྱག་པ། བོད་ལུགས་ཀྱི་ལྕི་ཚད(བྱེ་ཁུག་འདེགས་པ)འགྲན་བསྡུར་སོགས་དམངས་སྲོལ་དུས་ཆེན་གྱི་བྱ་འགུལ་མང་པོ་འདུས་ཤིང་། ཡུལ་དངོས་སུ་དགའ་སྐྱིད་ཀྱི་རྣམ་པས་ཡོངས་སུ་ཁེངས་འདུག
 ལོ་རེའི་ལུགས་རྙིང་གི་ཟླ6པ་ནས་ཟླ7པའི་བར།  མང་རྫོང་གི་གྲོང་རྡལ་སོ་སོ་དང་སྡེ་བ་སོ་སོས་ཚད་དང་གཞི་རྒྱ་མི་མཚུངས་པའི་དམངས་ཁྲོད་དུས་ཆེན་རིག་གནས་ཀྱི་བྱ་འགུལ་མང་པོ་བསྡུས་ཀྱི་ཡོད།  རྒྱུས་ལོན་པ་ལྟར་ན། ད་ལོར་བསྟུད་མར་ཐར་ཤུལ་ཡུལ་ཚོའི་ཐར་ཤུལ་སྡེ་བའི་སྐྱབས་རྗེ་ཡོངས་འཛིན་རིན་པོ་ཆེ་སྐུ་འཁྲུངས་པའི་རྗེས་དྲན་བྱ་འགུལ་དང་།  མང་ར་ཡུལ་ཚོའི་སྲོལ་རྒྱུན་དྲུག་པའི་ལྷ་རྩེད།  མགོ་མང་གཞོངས་ས་ཁུལ་གྱི“བརྒྱད་གཅིག”ལུས་རྩལ་བྱ་འགུལ་སོིགས་དམངས་ཁྲོད་སྲོལ་རྒྱུན་དུས་ཆེན་གྱི་རིག་གནས་བྱ་འགུལ་བསྡུ་རྒྱུ་ཡིན་པ་རེད།