ཟླ7པའི་ཚེས20ཉིན། ལོ་ངོ་དྲུག་བརྒྱ་ལྷག་གི་ལོ་རྒྱུས་ལྡན་པའི་བོད་ལྗོངས་རྒྱལ་རྩེ་རྫོང་གི་མདའ་དམག་དུས་ཆེན་དེ་རྒྱལ་རྩེ་གྲོང་རྡལ་དུ་འགོ་བརྩམས་ཤིང་། ཉིན་གསུམ་གྱི་རིང་དུ་བོད་ཀྱི་དམངས་ཁྲོད་ཀྱི་རིག་རྩལ་འཁྲབ་སྟོན་དང་། རྟ་རྒྱུག  གཡག་རྒྱུག  རྟ་ཐོག་མདའ་འཕེན་པ། ཐག་འཐེན་སོགས་ཚར་དུ་དངར་བའི་རིག་རྩལ་བྱ་འགུལ་ཕུན་སུམ་ཚོགས་པོ་སྤེལ་བ་རེད། 
　　ལོ་རྒྱུས་ཀྱི་བྱུང་བ་རིང་མོ་ལྡན་པའི་རྒྱལ་རྩེའི་མདའ་དམག་དུས་ཆེན་ནི་ས་སྐྱ་བས་བོད་ཡོངས་ལ་དབང་བསྒྱུར་སྐབས་ས་སྐྱའི་ནང་བློན་ཆེན་མོ་འཕགས་པ་བཟང་བོས་རྒྱལ་རྩེ་ཡུལ་ལ་འགོ་འཛིན་མཛད་ནས་མཚན་སྙན་རྒྱས་པས་ཁོང་འདས་རྗེས་ཡུལ་མི་རྣམས་ཀྱིས་ལོ་ལྟར་ཁོང་ལ་རྗེས་དྲན་བྱེད་ཆེད་འདས་མཆོད་སྒྲུབ་ཀྱིན་ཡོད། དེའི་རྗེས་བོད་ས་གནས་ཁག་ཏུ་བསྟུད་མར་དམག་འཁྲུག་བྱུང་ནས་འདས་མཆོད་ཀྱི་བྱེད་སྒོ་རེ་ཞིག་མཚམས་ཆད་པ་རེད།
　　ངག་སྒྲོས་ལྟར་ན་སྤྱི་ལོ1408ལོར་བློན་ཆེན་འཕགས་པ་བཟང་བོའི་སྲས་ཀུན་བཟང་རབ་བརྟན་གྱིས་རྒྱལ་རྩེའི་ཡུལ་དཔོན་གྱི་འགན་བཞེས་རྗེས། ཡབ་ཆེན་གྱི་ཞལ་ཆེམས་ལྟར་འདས་མཆོད་ཀྱི་བྱེད་སྒོ་བསྐྱར་སྤེལ་ཏེ་ལོ་རེའི་བོད་ཟླ་བཞི་བའི་ཚེས་བཅུ་དགུ་ནས་ཉི་ཤུ་བདུན་བར་མཆོད་འབུལ་གྱི་བྱེད་སྒོ་སྣ་ཚོགས་སྤེལ་པ་སྟེ། གོས་སྐུ་བཤམས་པ་དང་།  འཆམ་རྒྱག་པ། ལྷ་འབེབས་མོ་འདེབས་པ། རྟ་རྒྱུག་པ། རྩལ་འགྲན་པ། མདའ་འཕེན་པ་སོགས་བྱེད་ཀྱི་ཡོད།  རྟ་མ་རྒྱུག་སྔོན་ལ་རྟ་རྣམས་བང་སྒྲིག་སྟེ་རྟ་རྒྱུག་ལ་ཞུགས་ཆོག་མིན་བརྟག་དཔྱད་བྱས་ནས་དཔྱི་མགོའི་སྟེང་དུ་དམ་ཕྲུག་རེ་བརྒྱབ་པ་རྣམས་རྟ་རྒྱུག་ལ་ཞུགས་ཆོག་པའི་རྟགས་ཡིན་ལ།  རྟ་རྒྱུག་འགྲན་སྡུར་བྱེད་པའི་ཉིན་གསུམ་བཞིའི་རིང་དུ་མང་ཚོགས་རྣམས་སྤྲོ་སྐྱིད་གླིང་ཀར་སོང་ནས་དུས་ཆེན་རོལ་བ་ཡིན།