ནུབ་བྱང་མི་རིགས་སློབ་ཆེན་གྱི་སྐབས་དང་པོའི་བོད་ཀྱི་རིག་གནས་དུས་ཆེན་གྱི་མཛད་སྒོ་བསྡུ་བཞིན་པ།


མཛད་སྒོ་སྤེལ་བཞིན་པའི་ཡུལ་དངོས།
 

ཟླ6པའི་ཚེས12ཉིན། ནུབ་བྱང་མི་རིགས་སློབ་ཆེན་གྱི“མི་རིགས་མཐུན་སྒྲིལ་ལ་སྐུལ་བ་དང་འཆམ་མཐུན་གྱི་མི་རིགས་སློབ་ཆེན་བསྐྲུན་པ”ཞེས་པའི་སྐབས་དང་པོའི་བོད་ཀྱི་རིག་གནས་དུས་ཆེན་ཀྱི་མུ་འབྲེལ་བྱ་འགུལ་འགོ་བརྩམས་པ་རེད། སློབ་གྲྭའི་འབྲེལ་ཡོད་ཀྱི་འགོ་ཁྲིད་དང་དགེ་རྒན་རྣམས་མཛད་སྒོའི་སྟེང་ཞུགས་ཤིང་། བོད་ཀྱི་སྐད་ཡིག་དང་རིག་གནས་སློབ་གླིང་གི་གླིང་གཙོ་དཔལ་ཆེན་རྒྱལ་ལགས་ཀྱིས་མཛད་སྒོར་མདོ་འཛིན་གནང་བ་རེད།
　　མཛད་སྒོ་མཇུག་རྫོགས་རྗེས“གངས་ཀྱི་རོལ་དབྱངས”ཞེས་པའི་སྙན་ངག་གྱེར་འདོན་འགྲན་སྡུར་སྐབས་དགུ་བ་བསྡུས་ཤིང་། བོད་ཀྱི་སྐད་ཡིག་དང་རིག་གནས་སློབ་གླིང་གི་གླིང་གཙོ་གཞོན་པ་པདྨ་དབང་ཆེན་ལགས་དང་། དགེ་རྒན་ཆེན་མོ་བདུད་ལྷ་རྒྱལ་ལགས། དགེ་རྒན་ཆེན་མོ་གཞོན་པ་དཔལ་མོ་ལགས་སོགས་དཔྱད་འདེམས་པར་གདན་འདྲེན་ཞུས་པ་རེད། འགྲན་ཞུགས་པ་རྣམས་ཀྱིས་བོད་ཀྱི་སྲོལ་རྒྱུན་རིག་གནས་དང་མི་ཆོས་གནས་ལུགས་སོགས་སོ་སོའི་ཁྱད་ཆོས་གཟེངས་སུ་ཐོན་པའི་ངང་འགྲན་སྡུར་སྤེལ་བས་ཡུལ་དངོས་ཀྱི་སློབ་གྲོགས་རྣམས་ཀྱི་དགའ་བསུ་ཆེན་པོ་ཐོབ། དུས་ཚོད་གཉིས་ཀྱི་རིང་དུ་ཚ་ཚ་འུར་འུར་གྱིས་འགྲན་སྡུར་བྱས་མཐར་སློབ་གྲོགས་སྙིང་མོ་ཚེ་རིང་ལགས་ལ་བྱ་དགའ་ཨང་དང་པོ་ཐོབ་པ་དང་། སློབ་གྲོགས་ལྕགས་མོ་རྒྱལ་ལགས་དང་པདྨ་དོན་འགྲུབ་ལགས། སྒྲོལ་མ་རྒྱལ་ལགས་བཅས་ལ་བྱ་དགའ་ཨང་གཉིས་པ་ཐོབ། སློབ་གྲོགས་སྐལ་དབང་རྒྱལ་ལགས་དང་། རྡོ་རྗེ་ཚེ་བརྟན་ལགས། ཁྲོ་འབུམ་རྒྱལ་ལགས་སོགས་ལ་བྱ་དགའ་ཨང་གསུམ་པ་ཐོབ་པ་རེད།
　　འགྲན་སྡུར་མཇུག་རྫོགས་རྗེས་དགེ་རྒན་ཆེན་མོ་བདུད་ལྷ་རྒྱལ་ལགས་ཀྱིས་བཤད་རྒྱུར། སྐབས་སོ་སོའི་སྙན་ངག་གྱེར་འདོན་འགྲན་སྡུར་ཡོངས་བདེ་བླག་ངང་སྤེལ་ཞིང་སློབ་གྲོགས་རྣམས་ཀྱི་གྱེར་འདོན་བྱེད་པའི་ཆུ་ཚད་དང་གྱེར་འདོན་བྱེད་སྟངས་སོགས་ལ་མཐོར་འདེགས་ཆེན་པོ་བྱུང་ཞེས་བསྔགས་བརྗོད་བྱས་པ་དང་མཉམ་དུ། རྗེས་སོར་སློབ་གྲོགས་དེ་ལས་མང་པོ་ཞིག་འགྲན་སྡུར་ཁྲོད་ཞུགས་རྒྱུའི་རེ་བ་བཏོན་པ་རེད།
　　ཐེངས་འདིའི་བྱ་འགུལ་ནི་ནུབ་བྱང་མི་རིགས་སློབ་ཆེན་གྱི་གླིང་གཅིག་ལ་དུས་ཆེན་གཅིག་དང་ཁྱད་ཆོས་གཅིག་ཅེས་པའི་བྱ་འགུལ་འཛུགས་སྐྲུན་གྱི་ལས་གཞི་ཞིག་ཡིན་ཞིང་། སློབ་གྲྭའི་ཐོན་ཨུ་དང་། བོད་ཀྱི་སྐད་ཡིག་དང་རིག་གནས་སློབ་གླིང་གིས་མཉམ་དུ་གཙོ་སྒྲུབ་བྱས་པ་ཡིན། བྱ་འགུལ་གྱི་སྤྱིའི་འཆར་བཀོད་ལྟར་ན་རྗེས་མའི་ཟླ་གཅིག་ནང་དུ་བོད་རིགས་སློབ་ཆེན་པ་མ་ཡིན་པའི་བོད་ཀྱི་ཁ་སྐད་ཁ་བརྡའི་འགྲན་སྡུར་དང་མི་རིགས་རིག་གནས་ཀྱི་རིག་གཞུང་སྙན་ཞུ་གྲོས་ཚོགས་སོགས་བསྡུ་རྒྱུ་རེད།