ཀྲུང་གོའི་བོད་ཀྱི་དྲ་བའི་འཕྲིན། གསར་འགོད་པར་མཚོ་བོད་ལྕགས་ལམ་གྱི་ལྷ་སའི་མེ་འཁོར་བབས་ཚུགས་ནས་ཤེས་རྟོགས་བྱུང་བར་གཞིགས་ན།2012ལོའི་ཟླ་5ཚེས་31ཉིན་གྱི་ཆུ་ཚོད་18བར་གངས་ལྗོངས་ས་མཐོར་ཡོད་པའི་ལྷ་ས་མེ་འཁོར་བབས་ཚུགས་ཀྱིས་བདེ་འཇགས་ངང་སྐྱེལ་འདྲེན་ཉིན་1500བྱེད་ཐུབ་པ་བྱུང་བ་དེ་ཐོག་ནས་ལྷ་ས་བབས་ཚུགས་ཀྱི་བདེ་འཇགས་ཐོན་སྐྱེད་དང་།གཉེར་སྐྱོང་དོ་དམ།དཔུང་ཁག་འཛུགས་སྐྲུན།མི་རིགས་མཐུན་སྒྲིལ།ཞི་མཐུན་བརྟན་ལྷིང་སོགས་ཀྱི་ལས་དོན་ཁག་སྐས་རིམ་གསར་པ་ཞིག་ཏུ་སླེབས་པ་མཚོན་ཡོད།

བསྡོམས་རྩིས་ལ་གཞིགས་ན།ལྷ་ས་མེ་འཁོར་བབས་ཚུགས་ཀྱིས་ལོ་དྲུག་སྐྱེལ་འདྲེན་བྱས་པའི་ནང་དངོས་ཟོག་དང་འགྲུལ་པ་དབོར་འདྲེན་བྱེད་ཚད་དེ་ལོ་རེར་ཆ་སྙོམས་49%དང་28%མང་དུ་སོང་བ་དེས་མཚོ་བོད་ལྕགས་ལམ་གྱིས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་བོད་ཀྱི་མི་རིགས་ཁག་གི་མི་དམངས་ལ་བདེ་སྐྱིད་བསྐྲུན་རྒྱུར་ཞབས་འདེགས་ཞུ་བའི་མཐུན་སྒྲིལ་གྱི་ལམ་དང་།དཔལ་འབྱོར་གྱི་ལམ།བདེ་སྐྱིད་ཀྱི་ལམ།སྣོད་བཅུད་ཀྱི་ལམ་བཅས་ཀྱི་ནུས་པ་ཉིན་བཞིན་མངོན་གསལ་དོད་དུ་ཕྱིན་ཡོད།  །