ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། སྤྱི་ཚེས30ཉིན་རྒྱལ་ཡོངས་ཀྱི་ཤིན་ཅང་ལ་ཁ་གཏད་རོགས་སྐྱོར་བྱེད་པའི་ལས་དོན་གྲོས་ཚོགས་ཐེངས་གསུམ་པ་པེ་ཅིན་མི་དམངས་ཚོགས་ཁང་ཆེན་མོར་འཚོགས་ཡོད་པ་རེད། ཚོགས་འདུ་མ་ཚོགས་གོང་། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་ཧུའུ་ཅིན་ཐའོ་ཡིས་བྱམས་བརྩེའི་ངང་ཚོགས་ཞུགས་འཐུས་མི་དང་མཇལ་འཕྲད་གནང་བ་དང་། ཤིན་ཅང་ལ་ཁ་གཏད་རོགས་སྐྱོར་བྱེད་པའི་ལས་དོན་ནང་ཞུགས་པའི་ས་ཁུལ་ཁག་དང་སྡེ་ཚན་ཁག རྒྱ་ཆེའི་ལས་བྱེད་པ་དང་ལས་བཟོ་པ་རྣམས་ལ་ལྷག་བསམ་ཟོད་མེད་ཀྱི་འཚམས་འདྲི་དང་སྙིང་ཐག་པ་ནས་ཐུགས་རྗེ་ཆེ་ཞུས་ཡོད་པ་རེད།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ཝུན་ཅ་པའོ་དང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། རྒྱལ་ཁབ་ཀྱི་ཀྲུའུ་ཞི་གཞོན་པ། ཀྲུང་དབྱང་དམག་ཨུད་ཀྱི་ཀྲུའུ་ཞི་གཞོན་པ་ཞི་ཅིན་ཕིན་མཇལ་འཕྲད་ནང་ཞུགས་ཡོད་པ་རེད། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ལི་ཁེ་ཆང་མཇལ་འཕྲད་ལ་ཞུགས་པ་མ་ཟད། ཚོགས་འདུའི་ཐོག་གསུང་བཤད་ཀྱང་གནང་ཡོད་པ་རེད། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། ཀྲུང་དབྱང་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཀྲོའུ་ཡུང་ཁང་མཇལ་འཕྲད་ནང་ཞུགས་པ་མ་ཟད་གྲོས་ཚོགས་ལ་ཞུགས་ཡོད་པ་རེད།

ཕྱི་དྲོའི་ཆུ་ཚོད་གསུམ་པར། ཧུའུ་ཅིན་ཐའོ་སོགས་ཀྲུང་དབྱང་འགོ་ཁྲིད་བློ་མཐུན་མི་དམངས་ཚོགས་ཁང་ཆེན་མོའི་གསེར་མདོག་ཚོམས་ཆེན་དུ་ཚོགས་ཞུགས་འཐུས་མི་རྣམས་དང་མཇལ་འཕྲད་གནང་བར་ཕེབས་སྐབས། ཚོགས་ར་ཡོངས་སུ་སྤྲོ་སེམས་འཁོལ་བའི་ཐལ་མོའི་རྡེབ་སྒྲས་ཁེངས་ཡོད་པ་རེད། ཧུའུ་ཅིན་ཐའོ་སོགས་ནས་འཐུས་མི་རྣམས་ལ་ཕྱག་བཏང་བ་མ་ཟད་དྲན་རྟེན་གྱི་སྐུ་པར་བསྐྱོན་ཡོད་པ་རེད།  །