ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ཨུ། རྒྱལ་སྲིད་སྤྱི་ཁྱབ་ཁང་གི་ཙུང་ལི་ཝུན་ཅ་པའོ་ཚེས་བཅུ་བདུན་དང་ཚེས་བཅོ་བརྒྱད་ཉིན་གཉིས་ལ་ཧི་ནན་ཞིང་ཆེན་གྱི་ལོ་ཧི་རྫོང་དང་ལེན་ཡིན་རྫོང་། བུའུ་ཡང་རྫོང་བཅས་ཀྱི་ཞིང་ཁ་དང་ཞིང་བའི་ཁྱིམ་ཚང་། ཚན་རྩལ་ཞིབ་འཇུག་ཁང་བཅས་ལ་ཕེབས་ཏེ། རྒྱ་ཆེའི་ཞིང་བ་མང་ཚོགས་དང་གཞི་རིམ་ཞིང་ལས་ཚན་རྩལ་མི་སྣར་འཚམས་འདྲི་མཛད་པར་མ་ཟད་དཔྱི་ཀའི་ཞིང་ལས་ཐོན་སྐྱེད་གནས་ཚུལ་ལ་རྟོག་ཞིབ་མཛད། ཝུན་ཅ་པའོ་ཡིས་གསུངས་རྒྱུར། ཚན་རྩལ་ཁྱད་སྟོབས་འདོན་སྤེལ་གང་ལེགས་བྱེད་པ་དང་དཔྱིད་ཀའི་ཞིང་ཁའི་དོ་དམ་བྱ་བ་དམ་འཛིན་བྱེད་པ། གནོད་འཚེའི་སྔོན་འགོག་གྲོས་གཞི་གཏན་འཁེལ་བྱས་ནས། ཐབས་བརྒྱ་ཇུས་སྟོང་སྒོས་ད་ལོར་ཞིང་ལས་ཐོན་སྐྱེད་ཐད་ནས་ལོ་ལེགས་ཆེན་པོ་ལེན་དགོས་ཟེར།

ཚེས་བཅུ་བདུན་ཉིན་གྱི་སྔ་དྲོར། ཝུན་ཅ་པའོ་ལེན་ཡིན་རྫོང་ཀུའུ་ཞང་ཞང་ཞོ་ཧྲི་སྡེ་བའི་ཞིང་ཁར་ཕེབས་ཏེ་ཞིང་ས་ལ་སེར་ཡོད་མེད་དང་ལོ་ཏོག་འབུས་ཡོད་མེད་ཀྱི་གནས་ཚུལ་ལ་རྟོག་ཞིབ་མཛད། སྡེ་བ་དེ་ན་ཞིང་སའི་དོ་དམ་ལ་མཛུབ་སྟོན་བྱེད་པའི་ཧི་ནན་ཞིང་ཆེན་གྱི་ཞིང་ལས་དགེ་རྒན་ཆེན་མོ་གོ་ཐེན་ཚེ་ཡིས་ཙུང་ལིས་ལ་བཤད་རྒྱུར། ད་ལོའི་ཞིང་སའི་གནས་ཚུལ་དང་མྱུ་གུ་འབུས་བའི་གནས་ཚུལ་ལ་དམིགས་ཏེ་ཁོས་ཚིག་བཞི་སྤྱི་བསྡོམས་བྱས་པ་ནི་མྱུ་གུ་དང་གནམ་གཤིས། སེར་ཡོད་མེད་བཅས་ལ་ལྟ་བ་དང་ཚན་རིག་དང་མཐུན་པར་ལུད་འཇོག་པ་དང་ཆུ་གཏོང་བ། ནད་འབུ་འགོག་བཅོས། ལོ་ཏོག་གི་རྩ་བ་རྒྱས་ཤིང་ལོ་ལེགས་སྨིན་པ་བཅས་ཡིན་ཟེར། ཝུན་ཅ་པའོ་ཡིས་གསུངས་རྒྱུར། ཁྱོད་ཀྱིས་སྤྱི་བསྡོམས་བྱས་པ་ཚན་རིག་དང་མཐུན་ལ། བདག་གིས་མྱུ་གུ་དང་གནམ་གཤིས། སེར་ཡོད་མེད་བཅས་ལ་ལྟ་བའི་ཚིག་འབྲིའི་སྟེང་དུ་མི་ལའང་ལྟ་དགོས་པའི་ཡིག་འབྲི་གཉིས་ཁ་སྣོན་བྱེད་པ་ཡིན། ལོ་ལེགས་འབྱུང་བར་ཞིང་བ་མང་ཚོགས་ཀྱིས་དཀའ་སྤྱད་སྒོས་ངལ་རྩོལ་བྱས་པར་འབྲེལ་ཐབས་མེད་པ་དང་ཁྱོད་ལྟ་བུའི་ཞིང་ལས་ཆེད་མཁས་པའི་མཛུབ་སྟོན་ལའང་འབྲེལ་ཐབས་མེད་ཟེར། བུའུ་ཡང་རྫོང་ལིན་ཧྭ་གྲོང་བརྡལ་གྱི་ཞིང་བ་ཞིག་གིས་ཙུང་ལིས་ལ་ཆུ་ལོག་འགོག་ཐུབ་པ་དང་ཐན་པ་སེལ་ཐུབ་པའི་བྱ་བ་ལེགས་སྒྲུབ་བྱས་ཡོད་ནའང་། ཆུ་འདྲེན་འཕྲུལ་ཆས་ཀྱིས་བཀོལ་བ་ནི་ཁྲེ་སྣུམ་ཡིན་པ་དང་འགྲོ་གྲོན་གློག་བཀོལ་བ་ལས་མཐོ་བས། གློག་བཀོལ་བའི་སྒྲིག་ཆས་གནད་དོན་མྱུར་དུ་ཐག་གཅོད་ཅེས་བཤད། ཝུན་ཅ་པའོ་ཡིས་ཁོ་དང་འགྲོ་རོགས་བྱེད་པའི་རྒྱལ་ཁབ་འབྲེལ་ཡོད་སྡེ་ཁག་གི་འགན་འཁུར་བར་གནད་དོན་འདི་ཞིང་སྡེའི་གློག་དྲ་སྒྱུར་བཀོད་བཟོ་སྐྲུན་ཁྲོད་དུ་བཞག་ནས་ཐག་གཅོད་དགོས་པ་དང་ཡང་ན་བྱེད་ཐབས་གཞན་པ་སྤྱད་ནས་ཐག་གཅོད་དགོས་པའི་ཐུགས་རེ་བཏོན། ཝུན་ཅ་པའོ་ཡིས་སྡེ་མི་རྣམས་ལ་གསུངས་རྒྱུར། གལ་ཏེ་སྣུམ་གོང་ཇེ་མཐོར་བཏང་ཚེ་རྒྱལ་ཁབ་ཀྱིས་ད་དུང་ཐད་ཀར་དུ་སྒོར་མོའི་ཁ་གསབ་བྱེད་ངེས་ཡིན་ལ། རྒྱུ་མཚན་ནི་གཞི་ཁྱོན་ཆེ་བའི་ཞིང་སར་འཕྲུལ་ཆས་བཀོལ་སྐབས་ཁྲེ་སྣུམ་བཀོལ་དགོས་པ་དེ་ཡིན་ཟེར།

ཝུན་ཅ་པའོ་ཡིས་ད་དུང་ཞིང་ལས་འཕྲུལ་ཆས་བཀོལ་སྤྱོད་བྱེད་པའི་གནས་ཚུལ་མཚམས་སྦྱོར་བྱས་པར་གསན་པར་མ་ཟད། ཚན་རྩལ་མི་སྣས་གློག་ཀླད་བཀོལ་ནས་ཞིང་བཀོལ་གནམ་གྲུ་སྐོར་བ་དང་ཞིང་ནང་དུ་སྨན་གཏོར་བ་གསལ་སྟོན་བྱས་པར་གཟིགས། ཁོང་གིས་ཚན་རྩལ་མི་སྣར་ཞིང་ལས་ཚན་རྩལ་གསར་སྐྲུན་ལ་ཤུགས་བསྣན་ཏེ། ཞིང་ལས་འཕྲུལ་ཆས་ཀྱི་ཇུས་འགོད་དང་སྲུང་སྐྱོབ། བཀོལ་སྤྱོད། ཕྱིར་བཙོང་སོགས་ཀྱི་བྱ་བ་དམ་འཛིན་བྱས་ནས། ཞིང་ལས་གཞི་ཁྱོན་ཅན་གྱི་བདག་གཉེར་ཐད་ལ་ཞིང་ལས་འཕྲུལ་ཆས་ཀྱི་འགན་སྲུང་འདོན་སྤྲོད་བྱེད་དགོས་པའི་སྐུལ་མ་བཏང་།

རྟོག་ཞིབ་མཛད་སྐབས་ཙུང་ལིས་ཝུན་ཅ་པའོ་ཆེད་དུ་ལོ་ཧི་གྲོང་ཁྱེར་གྱི་ཞིང་ལས་ཚན་རིག་ཁང་དུ་ཕེབས་ནས་གཞི་རིམ་གྱི་ཞིང་ལས་ཚན་རྩལ་ཁྱབ་གདལ་མི་སྣ་དང་མཉམ་དུ་བཞུགས་མོལ་མཛད། མཐོ་རིམ་ཞིང་ལས་ལག་རྩལ་དགེ་རྒན་ཀྲིག་པེན་ཁྲིན་གྱིས་བཤད་རྒྱུར། ལོ་ཏོག་གི་ཐོན་ཚད་སྔར་ལས་ཇེ་མཐོར་གཏོང་དགོས་ན་གཙོ་བོ་ས་སོན་གྱི་རྒྱུ་སྤུས་བཟང་བ་གྲ་སྒྲིག་བྱེད་དགོས། ཐོ་བརྒལ་རང་བཞིན་གྱི་སོན་བཟང་ལ་ཞིབ་འཇུག་བྱེད་དགོས་པ་དང་ཤུགས་ཆེན་པོས་ཞིང་ལས་ཀྱི་སྔོན་ཐོན་ལག་རྩལ་ཁྱབ་གདལ་དུ་གཏོང་དགོས་ཟེར། ཝུན་ཅ་པའོ་ཡིས་གསུངས་རྒྱུར། སོན་བཟང་དང་འདེབ་ཚུལ་ལེགས་པ་ནི་ཞིང་ལས་ཚན་རྩལ་གྱི་བྱ་བ་གཙོ་བོ་གཉིས་ཡིན། མི་གྲངས་དུང་ཕྱུར་བཅུ་གསུམ་གྱི་ཟ་མའི་གནད་དོན་ཐག་གཅོད་དགོས་ན་དེང་རབས་ཞིང་ལས་འཕེལ་རྒྱས་སུ་གཏོང་དགོས་པ་དང་། ཚན་རྩལ་བྱ་བ་དེ་ངེས་པར་དུ་དམ་འཛིན་བྱེད་དགོས། ཚན་རྩལ་མཇུག་མཐའི་སྤྱི་ལེ་གཅིག་ལ་ཁྱབ་གདལ་དུ་གཏོང་སྐབས་ཞང་གྲོང་ནི་གཙོ་བོ་ཡིན་པ་དང་། གཞི་རིམ་གྱི་ཚན་རྩལ་ཁྱབ་གདལ་ནུས་པ་དང་ཞིང་ལས་ལག་རྩལ་མི་སྣའི་སྒྲིག་ཆས་ཆུ་ཚད་ཇེ་མཐོར་གཏོང་རྒྱུ་དེ་ཞིང་ལས་དེང་རབས་ཅན་དུ་སྒྱུར་བའི་བྱེད་ཐབས་གཙོ་བོ་ཞིག་ཡིན་ཟེར།

ལིན་ཧྭ་གྲོང་བརྡལ་ཧན་ཀྲེ་སྡེ་བའི་སྡེ་མི་ལིག་ཧན་ཡེ་ཡིས་ཙུང་ལིས་ལ་བཤད་རྒྱུར། ཅང་མ་འགོར་བའི་སྔོན་ལ་སྲིད་གཞུང་གིས་ཁོའི་ཨ་མ་ལ་རྒན་གསོ་མ་དངུལ་ལེན་པའི་དེབ་ཆུང་བྱིན་ཟེར། ཝུན་ཅ་པའོ་ཡིས་གསུངས་རྒྱུར། དེ་ནི་སྲིད་གཞུང་གིས་ད་ལོར་བསྒྲུབ་པའི་དོན་ཆེན་ཞིག་ཡིན་པ་དང་། ཞིང་སྡེ་ཡི་ཞིང་བ་རྒན་པ་ཚང་མར་སྟེང་རྒྱུ་ཡིན་ལ། ང་ཚོས་ཧུར་ཐག་སྒོས་དེབ་ཆུང་ནང་གི་སྒོར་མོ་ལོ་རེར་ཇེ་མང་དུ་གཏོང་ཞིང་། ཞིང་ལས་ཁ་གསབ་ལོ་རེར་ཇེ་མང་དུ་བཏང་ནས་མང་ཚོགས་ཀྱི་ཁུར་བོ་མེད་པར་གཏོང་བ་དང་ཁ་གསབ་ཇེ་མང་དུ་གཏོང་རྒྱུ་ཡིན་ཟེར།

ཝུན་ཅ་པའོ་ཡིས་གསུངས་རྒྱུར། ན་ནིང་གི་ཟླ་དགུ་བར་རྒྱལ་སྲིད་སྤྱི་ཁྱབ་ཁང་གིས་ཧི་ནན་ཞིང་ཆེན་གྱིས་དབུས་རྒྱུད་དཔལ་འབྱོར་ས་ཁུལ་མྱུར་དུ་འཛུགས་སྐྲུན་བྱེད་པར་རྒྱབ་སྐྱོར་བྱེད་པའི་སྐོར་གྱི་མཛུབ་སྟོན་བསམ་འཆར་གཏན་འཁེལ་བྱས་པ་དང་དེ་དབུས་རྒྱུད་དཔལ་འབྱོར་ས་ཁུལ་འཕེལ་རྒྱས་སུ་གཏོང་བར་ཁྱོན་ཡོངས་རང་བཞིན་གྱི་དོན་སྙིང་ཡོད། དབུས་རྒྱུད་དཔལ་འབྱོར་ས་ཁུལ་འཛུགས་སྐྲུན་བྱེད་དོན་ནི་གྲོང་གསེབ་ལ་གཅིག་གྱུར་སྒོས་འཆར་འགོད་བྱེད་པ་དང་། བཟོ་ལས་ཅན་དང་མཁར་གྲོང་ཅན། ཞིང་ལས་དེང་རབས་ཅན་བཅས་མཉམ་དུ་གནས་པར་བྱེད་རྒྱུ་དེ་ཡིན་ཟེར།