མི་དམངས་དྲ་བའི་འཕྲིན། འདི་ལོར་ཀྲུང་དབྱང་མི་རིགས་སློབ་ཆེན་གྱིས་བོད་རྒྱ་སྐད་ཡིག་གཉིས་ཀྱི་གསར་འགྱུར་རིག་པའི་རྟེན་གཞིའི་འཛིན་གྲྭ་དང་པོ་བཙུགས་ནས་བོད་རྒྱ་སྐད་ཡིག་གཉིས་ཀ་ཤེས་པའི་གསར་འགྱུར་བརྒྱུད་བསྒྲགས་རིག་པའི་ཆེད་ལས་ཀྱི་ཤེས་ལྡན་མི་སྣ་གསོ་སྐྱོང་བྱ་རྒྱུ་ཡིན་པ་དང་། འཛིན་གྲྭ་དང་པོ་དེར་བོད་རིགས་སློབ་མ21བསྡུས་ཡོད་པ་རེད།
 ཤེས་རྟོགས་བྱུང་བར་གཞིགས་ན། མིག་སྔར་ཐད་ཀར་གསར་འགྱུར་བརྒྱུད་བསྒྲགས་རིག་པའི་ཆེད་ལས་ནས་ཐོན་པ་དང་ཆེད་ལས་སྦྱོང་བརྡར་ཡག་པོ་ཐོབ་པའི་བོད་རྒྱ་སྐད་ཡིག་གཉིས་ཀ་ཤེས་པའི་ཤེས་ལྡན་མི་སྣ་དང་། རྩོམ་སྒྲིག་སྙན་སྒྲོན་ཤེས་ལྡན་མི་སྣ། སྨྱན་སྦྱོར་གསར་པའི་གཉེར་སྐྱོང་ཤེས་ལྡན་མི་སྣ་བཅས་ཀྱི་རིགས་བོད་རང་སྐྱོང་ལྗོངས་སུ་ཅུང་དཀོན་པོ་ཡོད་པ་རེད། ཀྲུང་དབྱང་མི་རིགས་སློབ་ཆེན་གྱིས་བརྟག་ཞིབ་གཏིང་ཟབ་བྱས་པ་བརྒྱུད་བོད་རྒྱ་སྐད་ཡིག་གཉིས་ཀྱི་གསར་འགྱུར་རིག་པའི་རྟེན་གཞིའི་འཛིན་གྲྭ་ཆེད་མངགས་བཙུགས་ནས་རིག་སྟོབས་ཀྱིས་བོད་སྐྱོར་བྱ་ཐབས་ཤུགས་ཆེ་རུ་བཏང་སྟེ་སློབ་གཉེར་དང་ཁྲོམ་ར་ཐད་ཀར་འབྲེལ་མཐུད་ཐུབ་པ་དང་། བོད་སྐྱོར་གྱི་ཕན་འབྲས་རང་བཞིན་དང་དམིགས་སའི་རང་བཞིན་ཆེ་རུ་གཏོང་རྒྱུ་ཡིན་པ་རེད།
 གཞན་ཡང་ཤེས་རྟོགས་བྱུང་བར་གཞིགས་ན། འདི་ལོར་ཀྲུང་དབྱང་མི་རིགས་སློབ་ཆེན་གྱིས་ད་དུང་བོད་རྒྱ་སྐད་ཡིག་གཉིས་ཀྱི་ཁྲིམས་ལུགས་རིག་པའི་རྟེན་གཞིའི་འཛིན་གྲྭ་དང་བོད་རྒྱ་སྐད་ཡིག་གཉིས་ཀྱི་བཟོ་ལས་རིགས་ཀྱི་རྟེན་གཞིའི་འཛིན་གྲྭ་བཙུགས་ཡོད་ཅིང་། འཛིན་གྲྭ་རེར་བོད་རིགས་སློབ་མ20རེ་བསྡུས་ཡོད་པ་རེད།