ཀྲུང་གོ་བོད་ཀྱི་དྲ་བའི་འཕྲིན། 2011ལོའི་ཟླ12པའི་ཚེས30ཡི་ཉིན། མཚོ་སྔོན་ཞིང་ཆེན་མཚོ་ནུབ་སོག་བོད་རང་སྐྱོང་ཁུལ་མང་ནེ་དང་དཔའ་ཐུའུ་ཀུག་གི་དམངས་སྤྱོད་གནམ་གྲུ་ཐང་དངོས་སུ་རྨང་གཞི་འདིང་མགོ་བརྩམས། དེ་ནི་མཚོ་སྔོན་ཞིང་ཆེན་གྱིས་མདོ་དབུས་མཐོ་སྒང་དམངས་སྤྱོད་གནམ་གྲུ་ཐང་གསུམ་འཛུགས་ པའི་འཆར་གཞི་ཁྲོད་ཀྱི་གཅིག་རེད།

དཔའ་ཐུའུ་ཀུག་གནམ་གྲུ་ཐང་མཚོ་སྔོན་དང་ཞིན་ཅང་གཉིས་ཀྱི་ས་མཚམས་སུ་གནས་ཤིང་། མཚོ་ངོས་ལས་སྨི2945ཡོད་པ་དང་། མང་ནེའི་དཀྱིལ་སྙིང་ས་ཁུལ་བར་སྤྱི་ལེ15ཡོད་པས། ལོ་ལྔའི་འཆར་གཞི་བཅུ་གཅིག་པའི་སྐབས་སུ་འཆར་བཀོད་འཛུགས་སྐྲུན་བྱེད་པའི་རྒྱལ་ནང་གི་གནམ་གྲུ་ཐང་ནང་གི་གཅིག་རེད།

རྒྱུས་ལོན་པ་ལྟར་ན་དཔའ་ཐུའུ་ཀུག་གནམ་གྲུ་ཐང་དེ2013ལོའི་ལོ་མཇུག་ཏུ་ཕལ་ཆེར་འགྲུབ་རྒྱུ་ཡིན་པ་དང་། 2014ལོའི་ཟླ6པར་དངོས་སུ་གནམ་གྲུ་འབབ་མགོ་བརྩམ་ཐུབ། གནམ་གྲུ་ཐང་དེ་ཡོངས་འགྲུབ་བྱས་རྗེས་ཀྱི་དཔའ་ཐུའུ་ཀུག་གནམ་གྲུ་ཐང་དེའི་ཐོག་མའི་འཆར་གཞི་ཟི་ལིང་ནས་ན་གོར་མོ་གྲོང་ཁྱེར་དང་གཏེར་ལེན་ཁ། ཀན་སུའུ་ཡི་ཏུང་ཧོང་དང་ཞིན་ཅང་གི་ཁུའུ་ཨར་ལིག་སོགས་སུ་བསྐྱོད་རྒྱུ་རེད། 2020ལོར་མགྲོན་པོ་ཁྲི9ཡི་ཡན་སྐྱེལ་འདྲེན་བྱེད་པ་དང་། ལོ་རེར་དངོས་རྫས་ཏུན100ལྷག་སྐྱེལ་འདྲེན་བྱེད་ཐུབ།