ཀྲུང་གོ་བོད་ཀྱི་དྲ་བའི་འཕྲིན། སྔོན་ཐོན་རིག་གནས་དགོན་སྡེར་ཁྱབ་པ་བྱེད་པའི་འབྲེལ་ཡོད་སྲིད་ཇུས་ལག་བསྟར་དོནའཁྱོལ་བྱེད་པ་དང་། ཤང་གྲོང་རིག་གནས་ཁང་དང་ས་ཚིགས་ཀྱི་རྣམ་གྲངས་འཛུགས་སྐྲུན་ལ་སྐུལ་སྤེལ་གཏོང་ཆེད་བོད་ལྗོངས་ལྷོ་ཁ་ས་ཁུལ་གྱིས་ཉིན་ཤས་གོང་སྔོན་ཐོན་རིག་གནས་དགོན་སྡེར་ཁྱབ་པ་དང་། ཤང་གྲོང་རིག་གནས་ཁང་དང་ས་ཚིགས་འཛུགས་སྐྲུན་གྱི་ལྟ་སྦྱོང་བྱེད་སྒོ་སྤེལ་བ་དང༌། ས་ཁུལ་གྱི་འབྲེལ་ཡོད་དབུ་ཁྲིད་དང་རྫོང་བཅུ་གཉིས་ནས་ཕེབས་པའི་འབྲེལ་ཡོད་འགན་འཁུར་བས་ལྟ་སྦྱོང་བྱེད་སྒོའི་ནང་ཞུགས་པ་རེད།

 ཁོང་རྣམ་པ་ཟངས་རི་རྫོང་གི་མཁར་དམར་སྟེང་དགོན་པའི་དཔེ་དེབ་ཁང་དུ་ཕེབས་སྐབས་དམར་མདངས་བཀྲ་བའི་སྐར་ལྔའི་དར་དམར་རྒྱལ་སྒོ་ཐོག་བཀལ་ཡོད་པ་དང་། པར་སྒྲོམ་ནང་བླུགས་པའི་གཙོ་འཛིན་གྱི་སྐུ་པར་དཔེ་དེབ་ཁང་གི་མངོན་གསལ་དོད་ཤོས་སུ་བཀལ་ཡོད་པ། ཟངས་རི་རྫོང་ཨུད་ཀྱི་རྒྱུན་ལས་ཨུ་ཡོན། འཐབ་ཕྱོགས་གཅིག་འགྱུར་པུའི་པུའུ་ཀྲང་ནོར་བུ་ཚེ་རིང་གིས་ངོ་སྤྲོད་གནང་སྐབས། དེ་ནི་ང་ཚོས་རང་སྐྱོང་ལྗོངས་ཀྱི་དགོན་སྡེའི་ཡོད་པ་དགུའི་སྲིད་ཇུས་ལག་བསྟར་བྱེད་པའི་ཁྲོད་ཀྱི་བྱ་ཐབས་གལ་ཆེན་ཞིག་རེད།

ལྷོ་ཁ་ས་ཁུལ་རིག་གནས་ཅུས་ཏང་ཙུའུ་ཡི་ཧྲུའུ་ཅི་ཕུར་བུས་གསར་འགོད་པར། ད་རེས་ཀྱི་ལྟ་སྦྱོང་བྱེད་སྒོའི་དམིགས་ཡུལ་ནི་རྫོང་ཁག་གིས་རིག་གནས་འཛུགས་སྐྱོང་གི་འབྲེལ་ཡོད་ལས་དོན་ཡག་པོ་སྒྲུབ་ཏེ་བརྙན་འཕྲིན་དང་གློག་བརྙན། ཏང་གི་ཚགས་པར། དཔེ་དེབ་ཁང་སོགས་སྔོན་ཐོན་རིག་གནས་དགོན་སྡེར་ཁྱབ་རྒྱུར་སྐུལ་སྤེལ་གཏོང་བ་དང་། དགོན་སྡེའི་གྲ་ཤག་ཚང་མར་ཁྱབ་པའི་ལས་གཞིར་སྐུལ་སྤེལ་གཏིང་ཟབ་གཏོང་བ། རྫོང་ཁག་གི་རིག་གནས་ཁང་འཛུགས་སྐྲུན་ཡག་པོ་བྱེད་པ། རྒྱ་ཆེའི་ཞིང་འབྲོག་མང་ཚོགས་ཀྱི་ལས་ཞོར་འཚོ་བ་ཕུན་སུམ་ཚོགས་སུ་གཏོང་རྒྱུ་བཅས་ཀྱི་ཆེད་དུ་རེད་ཅེས་གསུངས་པ་རེད།  །