ཀྲུང་གོའི་བོད་ཀྱི་དྲ་བའི་འཕྲིན། ཟླ9བའི་ཚེས28ཉིན་གྱི་ཕྱི་དྲོ། ཐང་ག་ཕུལ་བྱུང་འགྲེམ་སྟོན་དང་། ཐང་ག་ཉོ་ཚོང་འགྲེམ་འཚོགས། ཐང་གའི་སྒྱུ་རྩལ་མཐོ་རིམ་གླེང་སྟེགས་བཅས་སྤེལ་བའི་སྐབས་དང་པོའི་ཀྲུང་གོའི་ཐང་གའི་སྒྱུ་རྩལ་དུས་ཆེན་ལྷ་ས་གྲོང་ཁྱེར་ནས་ཡོངས་སུ་མཇུག་རྫོགས།

ཀྲུང་གོ་བོད་རིག་པ་ཞིབ་འཇུག་ལྟེ་གནས་ཀྱི་སྤྱི་ཁྱབ་ལས་སྒྲུབ་པ་ལྷག་པ་ཕུན་ཚོགས་ཚོགས་འདུ་ལ་ཞུགས་ཤིང་། རང་སྐྱོང་ལྗོངས་སྲིད་གྲོས་ཀྱི་སྔོན་ཆད་ཀྱི་ཀྲུའུ་ཞི་གཞོན་པ་བདེ་སྐྱིད་ལྷ་མོས་ཚོགས་འདུ་ལ་འགོ་འཛིན་མཛད།

གསར་འགོད་པས་རྒྱུས་ལོན་བྱུང་བ་ལྟར་ན། སྐབས་དང་པོའི་ཀྲུང་གོའི་ཐང་ག་སྒྱུ་རྩལ་དུས་ཆེན་སྤེལ་འགོ་བརྩམས་པ་ནས་བཟུང་། སྤུས་ཚད་བཟང་ཞིང་། ཚད་གཞི་མཐོ་བའི་ཐང་གའི་སྒྱུ་རྩལ་དུས་ཆེན་སྐབས་ཀྱི་ཐང་ག་ཕུལ་བྱུང་འགྲེམ་སྟོན་བྱེད་པ་ལས་ཆེད་མཁས་པ་དང་། སློབ་མ། ལྷ་རིས་པ། ཐང་ག་བསྡུ་གཉེར་བྱེད་མཁན་མང་པོ་ལ་ལྟ་སྦྱོང་དང་སློབ་སྦྱོང་བྱེད་པའི་གོ་སྐབས་བསྐྲུན་པ་མ་ཟད། ཐང་ག་ལ་དགའ་མཁན་དང་། གནས་སྐོར་བ་སྐོར་ཞིག་གི་མིག་རྒྱ་ཇེ་ཆེར་བཏང་། དེ་དང་ཆབས་ཅིག བོད་ལྗོངས་ཕྱི་ནང་གི་ཆེད་མཁས་པ་དང་། རིག་གནས་པ། སྒྱུ་རྩལ་པ་གྲགས་ཅན་དག་སྐབས་དང་པོའི་ཀྲུང་གོའི་ཐང་གའི་སྒྱུ་རྩལ་དུས་ཆེན་གྱི་མཐོ་རིམ་གླེང་སྟེགས་ཁྲོད་ཞུགས་ཏེ། ཐང་གའི་སྲུང་སྐྱོང་དང་རྒྱུད་འཛིན། དུས་རབས་གསར་བའི་ཐང་ག་གསར་རྩོམ་དང་འཕེལ་རྒྱས་སོགས་ཀྱི་བརྗོད་བྱར་དམིགས་ནས་ཞིབ་འཇུག་དང་གྲོས་བསྡུར་བྱས་ཏེ། ཐང་གའི་གནས་བབ་དང་། འགྲན་སློང་། གོ་སྐབས་བཅས་ལ་རྒྱུས་ལོན་གསལ་མོ་བྱས།

མཇུག་བསྡུ་བའི་མཛད་སྒོ་སྟེང་སྐབས་དང་པོའི་ཀྲུང་གོའི་ཐང་གའི་སྒྱུ་རྩལ་དུས་ཆེན་སྐབས་ཀྱི་ཐང་ག་ཕུལ་བྱུང་འགྲེམ་སྟོན་ཁྲོད་གསར་གྱི་རྟགས་མ་དང་། དངུལ་གྱི་རྟགས་མ། ཟངས་ཀྱི་རྟགས་མ་ཐོབ་མཁན། ཐང་ག་བསྡུ་གཉེར་བྱེད་མཁན་དང་རྩ་འཛུགས་བྱེད་མཁན་བཅས་ལ་བྱ་དགའ་གནང་བ་རེད།  །