རྒྱལ་ཁབ་ཀྱི་ཀྲུའུ་ཞི་ཧུའུ་ཅིན་ཐའོ་ཡིས་ཚེས23ཉིན་གྱི་ཕྱི་དྲོར་མི་དམངས་ཚོགས་ཁང་ཆེན་མོའི་ནང་ཀྲུང་གོ་དང་ཨ་རབ་རྒྱལ་ཁབ་མནའ་འབྲེལ་གྱི་དཔལ་འབྱོར་ཉོ་ཚོང་གླེང་སྟེགས་སྐབས་གཉིས་པར་ཞུགས་པར་ཡོང་བ་དང་ཞོར་དུ་ཀྲུང་གོར་འཚམས་འདྲིར་ཡོང་བའི་མའོ་ལེ་ཐ་ཉི་ཡའི་ཙུང་ཐུང་ཨ་ཆི་ཙི་ལ་མཇལ་འཕྲད་གནང་། ཧུའུ་ཅིན་ཐའོ་ཡིས་གསུངས་རྒྱུར། རྒྱལ་ཁབ་གཉིས་བར་འབྲེལ་བ་བཙུགས་ནས་ལོ་འཁོར46འགོར་བའི་རིང་ལ་ཕྱོགས་གཉིས་ཀྱི་འབྲེལ་བ་བདེ་བླག་ངང་འཕེལ་རྒྱས་སུ་སོང་ནས་ཆབ་སྲིད་ཐད་ཀྱི་ཡིད་ཆེས་རྒྱུན་ཆད་མེད་པར་ཇེ་ཟབ་ལ་སོང་བར་མ་ཟད། རྒྱལ་ཁབ་གཉིས་ཀྱི་ཉོ་ཚོང་མ་དངུལ་གྱི་གྲངས་འབོར་བསྟུད་མར་ལོ་རེར་འཕར་སྣོན་བྱུང་བ་དང་། ཁྱབ་ཁོངས་སོ་སོའི་མཉམ་ལས་ཀྱི་ཐད་ནས་གྲུབ་འབྲས་མངོན་གསལ་བླངས། ཀྲུང་གོ་དང་ཨ་རབ་རྒྱལ་ཁབ་མནའ་འབྲེལ། ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་བཅས་ཀྱི་ཐད་ནས་ཕན་ཚུན་ལ་འབྲེལ་བ་བཟང་བོ་སྲུང་འཛིན་དང་གཞོགས་འདེགས་དམ་ཟབ་བྱས། ཀྲུང་གོ་དང་མའོ་ལེ་ཐ་ཉི་ཡ་རྒྱལ་ཁབ་གཉིས་ཀྱི་མཛའ་མཐུན་འབྲེལ་བ་གོང་འཕེལ་དུ་གཏོང་བ་དེ་དུས་རབས་ཀྱི་འཕེལ་ཕྱོགས་དང་རྒྱལ་ཁབ་གཉིས་ཀྱི་མི་དམངས་ཀྱི་ཐུན་མོང་གི་འདོད་བློ་དང་མཐུན་ལ། ཀྲུང་གོ་དང་ཨ་རབ་རྒྱལ་ཁབ་མནའ་འབྲེལ་བར་གྱི་འབྲེལ་བ་དང་ཀྲུང་གོ་དང་ཨ་ཧྥེ་རི་ཁའི་འབྲེལ་བའི་འཕེལ་རྒྱས་ལ་སྐུལ་འདེད་གཏོང་བར་ཡང་ཕན་པ་ཆེན་པོ་ཡོད་ཟེར།

  ཧུའུ་ཅིན་ཐོ་ཡིས་བསྟན་དོན། ཀྲུང་གོ་ཕྱོགས་ཀྱིས་མའོ་ལེ་ཐ་ཉི་ཡ་ཕྱོགས་དང་མཉམ་དུ་འབད་བརྩོན་བྱས་ཏེ། རྒྱལ་ཁབ་གཉིས་ཀྱི་དངོས་གཉེར་མཉམ་ལས་འབྲེལ་བ་སྔར་ལས་ལྷག་པའི་སྒོ་ནས་མཐོར་འདེགས་སུ་གཏོང་འདོད་ཡོད་དེ། གཅིག་ནས་མཛའ་བརྩེའི་འགྲོ་འོང་ལ་ཤུགས་སྣོན་དགོས། གཉིས་ནས་ཉོ་ཚོང་མཉམ་ལས་རྒྱ་བསྐྱེད་དགོས། གསུམ་ནས་མི་དམངས་བར་གྱི་མཛའ་བརྩེ་ལ་སྐུལ་འདེད་གཏོང་དགོས། བཞི་ནས་ཕྱོགས་མང་པོའི་མཉམ་ལས་འབྲེལ་ཇེ་ཟབ་ཏུ་གཏོང་དགོས། ཀྲུང་གོ་ཕྱོགས་ཀྱིས་ད་དུང་མའོ་ལེ་ཐ་ཉི་ཡ་ཕྱོགས་དང་མཉམ་དུ་མཉམ་འབྲེལ་རྒྱལ་ཚོགས་ཀྱི་བཅོས་བསྒྱུར་དང་ནམ་ཟླའི་འགྱུར་ལྡོག དབུལ་སྐྱོར་གནོད་འགོག འབྲུ་རིགས་བདེ་འཇགས་སོགས་འཛམ་གླིང་རང་བཞིན་གྱི་གནད་དོན་ཐད་ནས་ཕན་ཚུན་ལ་མཐུན་སྦྱོར་དང་གཞོགས་འདེགས་བྱེད་འདོད་ཡོད་ཟེར།