ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། གསར་འགོད་པས་ཞིང་ལས་པུའུ་ནས་ཤེས་རྟོགས་བྱུང་གསལ། མིག་སྔར་སྟོན་འབྲུའི་ཐོན་སྐྱེད་ཀྱི་འགག་རྩའི་དུས་སུ་སླེབས་པས་ཞིང་ལས་པུས་ས་ཁུལ་ཁག་གཅིག་གི་སྟོན་འབྲུའི་ཐོན་སྐྱེད་ལ་ཐན་པའི་ཤུགས་རྐྱེན་ངན་པ་ཐེབས་སྲིད་པར་མཐོང་ཆེན་བྱེད་ཅིང་། རིགས་གཅིག་མཁས་ཅན་གྱི་དབྱེ་ཞིབ་དང་འབྲེལ་ཡོད་ཞིང་ཆེན་དང་རང་སྐྱོང་ལྗོངས་ཀྱི་གནས་ཚུལ་སྙན་སེང་ལ་གཞིགས་ན། མིག་སྔར་ས་ཁུལ་ཁག་གཅིག་ལ་ཐན་པ་བསྟན་ཡོད་ཀྱང་དེས་རྒྱལ་ཡོངས་ཀྱི་སྟོན་འབྲུའི་ཐོན་སྐྱེད་ལ་ཤུགས་རྐྱེན་དེ་ཙམ་ཆེན་པོ་མེད་པ་རེད།

དེའང་གཅིག་ནས། ཐན་སྐྱོན་ཕོག་པའི་རྒྱ་ཁྱོན་དེ་རྒྱུན་གཏན་ལས་ཆུང་བ་ཡོད་ཅིང་། མིག་སྔར་རྒྱལ་ཡོངས་ཀྱི་ཞིང་ལས་སྐྱེ་དངོས་ལ་ཐན་སྐྱོན་ཕོག་པའི་རྒྱ་ཁྱོན་དེ་ན་ནིང་གི་དུས་མཚུངས་ལས་མུའུ་ཁྲི1078ཉུང་བ་དང2006ལོ་ནས2010ལོའི་བར་གྱི་ལོ་ལྔའི་དུས་མཚུངས་ལས་ཆ་སྙོམས་མུའུ་ཁྲི3361ཉུང་བ་ཡོད་པས་ཐན་སྐྱོན་ཕོག་ཚུལ་སྤྱིར་ན་ཆུང་ཙམ་ཡོད་པ་དང་། གཉིས་ནས། ཐན་སྐྱོན་ཕོག་པའི་ས་ཁོངས་ཅུང་གཅིག་སྡུད་ཡིན་ཞིང་། མིག་སྔར་ཐན་པ་གཙོ་བོ་དེ་ཀུའེ་ཀྲོའུ་དང་། ཧུའུ་ནན།ཡུན་ནན། ནང་སོག་སོགས་ཞིང་ཆེན་དང་རང་སྐྱོང་ལྗོངས་ཀྱི་ས་ཆ་ཁག་ཏུ་གཅིག་སྡུད་ཡིན་པ་དང་ཞིང་ཆེན་དང་རང་སྐྱོང་ལྗོངས་བཞིའི་ཞིང་ལས་སྐྱེ་དངོས་ལ་ཐན་སྐྱོན་ཕོག་པའི་རྒྱ་ཁྱོན་གྱིས་རྒྱལ་ཡོངས་ཀྱི་ཐན་སྐྱོན་ཕོག་པའི་རྒྱ་ཁྱོན་བསྡོམས་འབོར་གྱི71%ཟིན་པ་དང་། ས་ཆ་གཞན་མང་ཆེ་བར་ཐན་པ་བསྟན་མེད་པ་དང་ལྷག་དོན་དུ་བྱང་ཤར་དང་། རྨ་ཆུ། ཧོའེ་ཧོ་ཆུ་བོ་སོགས་ཐོན་ཁུལ་གཙོ་བོར་ཆར་ཆུ་འབེལ་པོ་བྱུང་ནས་སྟོན་འབྲུའི་ལོ་ཏོག་སྐྱེ་ཚུལ་བཟང་པོ་ཡོད་པ། གསུམ་ནས། ཐན་པ་བསྟན་ཁུལ་མང་ཆེ་བ་ནི་འབྲུ་རིགས་ཐོན་ཁུལ་གཙོ་བོ་མིན་ཞིང་། ཐན་སྐྱོན་ཅུང་ཚབས་ཆེན་ཕོག་པའི་ཞིང་ཆེན་དང་རང་སྐྱོང་ལྗོངས་བཞིའི་ཁྲོད་ཀུའེ་ཀྲོའུ་དང་ཡུན་ནན་གཉིས་ནི་སྟོན་འབྲུའི་ཐོན་ཁུལ་ཞིང་ཆེན་གཙོ་བོ་མིན་པ་དང་ཞིང་ཆེན་དེ་གཉིས་ཀྱི་སྟོན་འབྲུའི་ཐོན་ཚད་ཀྱིས་རྒྱལ་ཡོངས་ཀྱི་སྟོན་འབྲུའི་ཐོན་ཚད་བསྡོམས་འབོར་གྱི་བསྡུར་གྲངས་བཟུང་ཚད6%ཡང་ཟིན་གྱི་མེད་པ་དང་། ཧུའུ་ནན་གྱི་ཐན་སྐྱོན་ཚབས་ཆེན་ཕོག་ཁུལ་གཙོ་བོ་ནི་ཆུའི་ཐོན་ཁུངས་དཀོན་པའི་རི་ཁུལ་དང་རི་མ་ཐང་ཁུལ་དུ་ཡིན་པ་དང་ཐང་གཤོངས་དང་མཚེའུ་ཁུལ་སོགས་ཆུ་འབྲས་ཐོན་ཁུལ་གཙོ་བོའི་ཐན་པ་བསྟན་ཚུལ་བལྟོས་བཅས་ཀྱིས་ཆུང་བ་ཡོད། ནང་སོག་ཏུ་ཐན་སྐྱོན་ཕོག་པའི་ས་ཆ་གཙོ་བོ་དབུས་ནུབ་རྒྱུད་ཀྱི་འབྲུ་རིགས་ཐོན་ཁུལ་གཙོ་བོ་མིན་པའི་ས་ཆར་ཡིན་པ་བཅས་རེད།

ཞིང་ལས་པུའི་འབྲེལ་ཡོད་འགན་འཁུར་བས་ཀུའེ་ཀྲོའུ་དང་།ཧུའུ་ནན།ཡུན་ནན།ནང་སོག་བཅས་ས་ཁུལ་གྱི་ཐན་པ་བསྟན་ཚུལ་ལ་དོ་ཁུར་ཟབ་མོ་བྱེད་པའི་ཁར་གནམ་གཤིས་དང་ཆུ་བེད་སྡེ་ཚན་དང་མཐུན་སྦྱོར་བྱེད་ཤུགས་ཆེ་རུ་བཏང་སྟེ་ཉེན་ཟོན་སྔོན་བརྡའི་ཆ་འཕྲིན་དུས་ཐོག་ཏུ་སྤེལ་བ་དང་། སྔོན་ཇུས་འཕྲལ་སྡོམ་བྱ་སྤྱོད་དུས་ཐོག་ཏུ་སྤེལ་ནས་ཐན་འགོག་ཐད་རྒྱབ་སྐྱོར་བྱེད་ཤུགས་ཆེ་རུ་གཏོང་བ་དང་། ལས་དོན་ཚོགས་ཆུང་མུ་མཐུད་ཐན་སྐྱོན་ཚབས་ཆེན་ཕོག་ཁུལ་དུ་མངགས་གཏོང་གིས་ཐན་འགོག་གེགས་སེལ་དང་ཐོན་སྐྱེད་སླར་གསོའི་ལས་དོན་ལ་གཞོགས་འདེགས་བྱ་རྒྱུ་ཡིན་ཞེས་བརྗོད་པ་དང་། དེ་དང་ཆབས་ཅིག་ཐན་སྐྱོན་ཕོག་པའི་ས་ཁུལ་ཁག་གི་ཞིང་ལས་སྡེ་ཚན་དང་ཐན་འགོག་བྱེད་སྟངས་ཀྱི་བྱེད་ཐབས་ཁག་དོན་འཁྱོལ་བྱ་རྒྱུར་དམ་འཛིན་བྱེད་པའི་ཐོག་རིགས་དབྱེའི་མཛུབ་ཁྲིད་ལ་ཤུགས་སྣོན་བརྒྱབ་ནས་ཐན་སྐྱོན་གྱི་ཤུགས་རྐྱེན་ངན་པ་ཆུང་དུ་ཏན་ཏིག་བཏང་སྟེ་སྟོན་འབྲུའི་ཐོན་འབབ་བརྟན་པོའི་ངང་འཕར་བའི་རྣམ་པ་བཟང་པོ་རྒྱུན་འཁྱོངས་བྱེད་ཐུབ་པའི་འགན་ལེན་བྱེད་དགོས་པའི་བླང་བྱ་བཏོན་ཡོད་པ་རེད།  །