མིག་སྔར། རི་དྭགས་གཙོད་ཀྱིས་ཨ་ཆེན་གངས་རྒྱབ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ས་ཁུལ་གྱི་གཙོད་གནས་མཚོ་དང་ཉི་མ་མཚོ་རུ་གཙོད་ཕྲུག་རྩེབས་ནས་ཟླ་གཅིག་ཙམ་གྱི་རིང་ལ་གསོ་སྐྱོང་བྱས་རྗེས་ད་ལྟ་ཕྱིར་རང་གནས་སུ་ལོག་འགོ་བརྩམས་ལ། གཙོད་ཕྲུག་རྣམས་ཀྱང་ལམ་ཐག་རིང་བོར་གཙོད་མའི་རྗེས་བསྙེགས་ནས་འགྲོ་ཐུབ་པར་གྱུར་ཡོད།

གསར་འགོད་པས་ཨ་ཆེན་གངས་རྒྱབ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ས་ཁུལ་དོ་དམ་ཁང་ནས་རྒྱུས་ལོན་བྱུང་བའི་གནས་ཚུལ་ལྟར་ན། གཙོད་གནས་མཚོ་རུ་གཙོད་ཕྲུག་རྩེབས་རྗེས་ཕྱིར་གཙང་གསུམ་འབྱུང་ཡུལ་གྱི་ངལ་གསོ་སར་ལོག་པའི་གཙོད་རྣམས་སྨུག་པ་ལ་སྒང་དུ་ཐོན་རྗེས། སྔ་གཞུག་ཏུ་ཆུ་དམར་དང་། མཚོ་བོད་གཞུང་ལམ། མཚོ་བོད་ལྕགས་ལམ་བརྒྱུད་དགོས། ཟླ་བདུན་པའི་ཚེས་ཉེར་གསུམ་ཉིན་ནས་བཟུང་། རི་དྭགས་གཙོད་སྟོང་ལྷག་ཆུ་དམར་ཆུ་བོའི་འགྲམ་རྒྱུད་དུ་འདུ་འཛོམས་བྱེད་འགོ་བརྩམས་པ་དང་། དེའི་འཕྲོར་ཉིན་རེ་རེར་རི་དྭགས་གཙོད་སྟོང་ལྷག་ཆུ་དམར་ཆུ་བོའི་ཉེ་འགྲམ་དུ་འཛོམས་ནས་མཉམ་དུ་ཆུ་བོ་བརྒལ་ནས་ཕྱིར་རང་གནས་སུ་ལོག་བཞིན་ཡོད། རི་དྭགས་གཙོད་ལ་སྲུང་སྐྱོབ་བྱེད་ཆེད། འགྲིམ་འགྲུལ་སྡེ་ཁག་དང་སྲུང་སྐྱོབ་ས་ཁུལ་དོ་དམ་ཁང་གིས་མཚོ་བོད་གཞུང་ལམ་གྱི་གཙོད་མང་པོ་བརྒལ་སའི་ལམ་ཁ་རུ་འགྲིམ་འགྲུལ་ཕྱོགས་སྟོན་གློག་སྒྲོན་བཙུགས་ནས་གཙོད་རྣམས་བདེ་འཇགས་ངང་གཞུང་ལམ་བརྒལ་བར་སྟབས་བདེ་བཟོས། མཚོ་བོད་ལྕགས་ལམ་ལས་པའི་སྐབས་སུའང་རི་སྐྱེས་སྲོག་ཆགས་བགྲོད་ས་སུམ་ཅུ་སོ་གསུམ་ལས་པ་དེས་རི་དྭགས་གཙོད་གནས་སྤོ་བར་སྟབས་བདེ་གང་ལེགས་བསྐྲུན་ཡོད།