ལི་པུ་ཡཱའི་སྲིད་གཞུང་གིས་ཏི་ལེ་པོ་ལི་རུ་ཡོད་པའི་མཉམ་འབྲེལ་རྒྱལ་ཚོགས་ཀྱི་དོན་གཅོད་ལས་ཁུངས་སླར་གསོ་བྱེད་པར་འཐད་པ་བྱུང་བ།
བསོད་ནམས་ཚེ་རིང་། མཚོ་སྔོན་བོད་སྐད་རླུང་འཕྲིན། 2011-05-19
མཉམ་འབྲེལ་རྒྱལ་ཚོགས་ཀྱི་ལི་པུ་ཡཱའི་མི་ཆོས་རིང་ལུགས་ལས་དོན་གྱི་འགན་ཁུར་བའི་མཐུན་སྦྱོར་བ་མའོ་མུའུ་ཐིས་ཚི་ཡིས་ཚེས་བཅུ་བདུན་ཉིན་རི་ནེ་ཝ་ནས་བསྟན་དོན། ལི་པུ་ཡཱ་སྲིད་གཞུང་གིས་ཉེ་སྔོན་ལི་པུ་ཡཱའི་རྒྱལ་ས་ཏི་ལེ་པོ་ལི་རུ་ཡོད་པའི་མཉམ་འབྲེལ་རྒྱལ་ཚོགས་མི་ཆོས་རིང་ལུགས་རྒུད་སྐྱོབ་མི་སྣ་དང་ལེན་བྱེད་པ་དང་། འཕྲོག་བཅོམ་ཐེབས་ནས་བཙན་གྱིས་ཕྱིར་འཐེན་བྱས་པའི་དོན་གཅོད་ཁང་སླར་གསོ་བྱེད་པར་འཐད་པ་བྱུང་ཟེར།
མའོ་མུའུ་ཐིས་ཚི་ཡིས་ཚེས་བཅུ་དྲུག་ཉིན་ལི་པུ་ཡཱའི་འཚམས་འདྲི་མཇུག་རྫོགས་ནས་ཕྱིར་རི་ནེ་ཝ་རུ་ལོག་པ་དང་། ལི་པུ་ཡཱ་རུ་འཚམས་འདྲི་བྱེད་སྐབས་མའོ་མུའུ་ཐིས་ཚི་སྔ་གཞུག་ཏུ་ཏི་ལེ་པོ་ལི་དང་པན་ཅཱ་ཞི་རུ་སོང་ནས་ལི་པུ་ཡཱ་སྲིད་གཞུང་དང་ངོ་རྒོལ་ཕྱོགས་ཁག་བར་གྲོས་མོལ་བྱས་ཏེ། མཉམ་འབྲེལ་རྒྱལ་ཚོགས་ཀྱིས་ཕྱོགས་གཉིས་ཀྱི་ཚོད་འཛིན་བྱེད་པའི་ས་ཁུལ་གྱི་མི་ཆོས་རིང་ལུགས་རྒུད་སྐྱོབ་འགུལ་བསྐྱོད་ལ་མཐུན་སྦྱོར་བྱས།མའོ་མུའུ་ཐིས་ཚི་ཡིས་ལི་པུ་ཡཱའི་སྲིད་གཞུང་བར་གྲོས་མོལ་བྱེད་སྐབས་རྣམ་འགྱུར་བཟང་བོ་བསྟན། ཁོས་བལྟས་ན་གྲོས་མོལ་གྱི་མཇུག་འབྲས་ཧ་ཅང་བཟང་བར་འདོད། མའོ་མུའུ་ཐིས་ཚི་ཡིས་བཤད་རྒྱུར། ལི་པུ་ཡཱ་སྲིད་གཞུང་གིས་ཏི་ལེ་པོ་ལི་རུ་སྡོད་པའི་མཉམ་འབྲེལ་རྒྱལ་ཚོགས་ཀྱི་དོན་གཅོད་ཁང་ཟླ་འདིའི་ཟླ་མགོར་འཕྲོག་བཅོམ་ཐེབས་པའི་དོན་ལ་དགོངས་དག་ཞུས་པར་མ་ཟད། ལས་ཁུངས་དེའི་བདེ་འཇགས་ལ་འགན་སྲུང་བྱེད་འདོད་ཡོད་པའི་བསམ་ཚུལ་བསྟན་ཟེར།
ལི་པུ་ཡཱའི་དེང་སྐབས་ཀྱི་མི་ཆོས་རིང་ལུགས་རྒུད་སྐྱོབ་ཀྱི་གནས་བབ་གླེང་སྐབས། མའོ་མུའུ་ཐིས་ཚི་ཡིས་རྒྱལ་སྤྱིའི་སྤྱི་ཚོགས་ཀྱིས་ལི་པུ་ཡཱའི་ནུབ་ཕྱོགས་རི་ཁུལ་གྱི་ཡུལ་གྱར་བའི་གནད་དོན་ལ་དོ་སྣང་བྱེད་དགོས་པའི་དྲན་སྐུལ་བྱས། ཁོས་བསྟན་དོན། སྲིད་གཞུང་དམག་དཔུང་དང་སྲིད་གཞུང་ལ་ངོ་རྒོལ་བྱེད་པའི་དྲག་ཆས་པས་ནུབ་ཕྱོགས་རི་ཁུལ་ནས་བསྟུད་མར་འཁྲུག་རྩོད་བྱས་པ་དང་། ཉེ་སྔོན་ཡུལ་གྱར་བ་མི་ཁྲི་ལྔ་ཙམ་ས་ཁུལ་དེ་ནས་ཐུ་ནི་ཞི་ཡཱ་རྒྱལ་ཁབ་ཏུ་བྲོས་བྱོལ་བྱས་ཡོད་ཟེར།