ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ5པའི་ཚེས10ཉིན་འབྱོར་བའི་གློག་འཕྲིན།ཀྲུང་གུང་ཀྲུང་དབྱངས་སྤྱི་ཁྱབ་ཧྲུའུ་ཅི་ཧུའུ་ཅིན་ཐའོ་ཡིས་ཚེས་10ཉིན་གྱི་ཕྱི་དྲོར་ཏིའོ་ཡུས་ཐའེ་རྒྱལ་ཁབ་ཀྱི་མགྲོན་ཁང་དུ་ཀྲུང་གོ་གོ་མིན་ཏང་མཚན་འཛིན་ཀྲུའུ་ཞི་ཝུའུ་པོ་ཞུང་ལ་མཇལ་འཕྲད་གནང་བ་རེད།ཧུའུ་ཅིན་ཐའོ་ཡིས་གནས་བབ་གསར་པ་ལ་ཁ་གཏད་འཇལ་བ་དང་ང་ཚོས་མཚོ་འགག་ངོགས་གཉིས་བར་གྱི་འབྲེལ་བ་ཞི་བས་འཕེལ་རྒྱས་ཡོང་བའི་ཁྱོན་ཡོངས་བརྟན་པོ་འཛིན་པ།  ཆབ་སྲིད་ཀྱི་རྨང་གཞི་སྲ་བརྟན་གཏོང་བ།ཡང་དག་པའི་ཁ་ཕྱོགས་རྒྱུན་འཁྱོངས་བྱེད་པ།གྲོས་མོལ་བྱ་རྒྱུར་སྐུལ་མ་གཏོང་བ།མཉམ་ལས་སྤེལ་རེས་བྱ་རྒྱུར་རྒྱ་སྐྱེད་བཅས་བཏང་ནས།མཚོ་འགག་ངོགས་གཉིས་བར་གྱི་འབྲེལ་བ་འཕེལ་རྒྱས་ཡོང་བར་དེ་བས་ཡག་པོའི་ཆ་རྐྱེན་བསྐྲུན་དགོས་ཅེས་ནན་གསུང་གནང་བ་རེད།
　ཧུའུ་ཅིན་ཐའོ་ཡིས་མཚོ་འགག་ངོགས་གཉིས་བར་གྱི་འབྲེལ་བ་འཕེལ་རྒྱས་ཡོང་བའི་ཐད་བསམ་འཆར་བཞི་བཏོན་ཡོད་པ་སྟེ།
　གཅིགརྒྱུན་ཆད་མེད་པ་མཚོ་འགག་ངོགས་གཉིས་བར་གྱི་འབྲེལ་བ་དང་ཞི་བས་འཕེལ་རྒྱས་ཡོང་བའི་ཁྱོན་ཡོངས་ལ་ཡག་པོ་འཛིན་དགོས།དེར་བརྟེན་གོ་མིན་ཏང་དང་གུང་ཁྲན་ཏང་གཉིས།མཚོ་འགག་ངོགས་གཉིས་བར་ཕྱོགས་གཉིས་ཀས་“1992ལོར་མཉམ་དུ་གྲོས་མཐུན་བཞག་པའི་”ཀྲུང་གོ་གཅིག་གི་རྩ་དོན་རྒྱུན་འཁྱོངས་བྱེད་པ་དང་།མུ་མཐུད་དེ་“ཐའེ་ཝན་རང་བཙན་”གྱི་ཁ་བྲལ་བྱེད་སྒོ་ལ་མཐའ་གཅིག་ཏུ་ངོ་རྒོལ་བྱེད་དགོས།ཐུན་མོང་གི་ཆབ་སྲིད་རྨང་གཞི་དེ་སྲ་བརྟན་དུ་གཏོང་ན་ཕྱོགས་གཉིས་ཀས་མུ་མཐུད་དེ་མཚོ་འགག་ངོགས་གཉིས་ཀྱི་མཉམ་ལས་སྤེལ་རེས་དང་གྲོས་མཐུན་བཞག་པའི་དགོས་ངེས་ཀྱི་ཆ་རྐྱེན་སྐྲུན་ཆོག་པ་དང་ལག་གདང་སྦྲེལ་ནས་མཚོ་འགག་ངོགས་གཉིས་བར་གྱི་འབྲེལ་བ་དང་འཕེལ་རྒྱས་ཡོང་བར་རྣམ་པ་གསར་པ་གསར་གཏོད་བྱེད་ཆོག
　གཉིས།མུ་མཐུད་དེ་གོ་མིན་ཏང་དང་གུང་ཁྲན་ཏང་།མཚོ་འགག་ངོགས་གཉིས་བར་གྱི་ཕན་ཚུན་བྱ་བ་བཟང་པོ་སྒྲུབ་རྒྱུར་སྲུང་སྐྱོང་བྱེད་དགོས།ལོ་གསུམ་རིང་གོ་མིན་ཏང་དང་གུང་ཁྲན་ཏང་།མཚོ་འགག་ངོགས་གཉིས་བར་ཕྱོགས་གཉིས་ཀའི་ཕན་ཚུན་འབྲེལ་བ་བྱེད་པའི་གལ་ཆེའི་ཉམས་མྱོང་ཞིག་ནི་ཐུན་མོང་གི་ཆབ་སྲིད་རྨང་གཞིའི་ཐོག་ཕན་ཚུན་ཡིད་ཆེས་འཇོག་ནས།ཆེ་སར་གཅིག་མཐུན་ཡོང་ཐབས་དང་ཆུང་སར་མི་མཐུན་པ་སོར་འཇོག་བྱས་ཏེ་ཕན་ཚུན་བྱ་བ་བཟང་པོ་སྒྲུབ་རྒྱུ་དེ་ཡིན་པ་དང་།ཕྱོགས་གཉིས་ཀས་མཚོ་འགག་ངོགས་གཉིས་ཀྱི་འབྲེལ་བའི་ཐད་དགེ་མཚན་ལྡན་པ་དང་དྲང་ཕྱོགས་ཀྱི་ཆ་འཕྲིན་མང་པོ་གཏོང་བ་དང་དུས་ཐོག་ཏུ་བྱུང་སྲིད་པའི་གནད་དོན་ཐག་གཅོད་འོས་འཚམ་བྱེད་དགོས།
　གསུམ།མུ་མཐུད་དེ་མཚོ་འགག་ངོགས་གཉིས་ཀྱི་སྤེལ་རེས་མཉམ་ལས་ཀྱི་ལས་ཀ་བརྟན་པོའི་ངང་སྐུལ་འདེད་གཏོང་དགོས།མཚོ་འགག་ངོགས་གཉིས་ཀྱི་དཔལ་འབྱོར་མཉམ་ལས་ཀྱི་གྲོས་གཞིའི་རྗེས་མཐུད་ཀྱི་གྲོས་བསྡུར་སྣ་ཚོགས་འཛིན་སྟངས་ཡག་པོ་བྱེད་པ་དང་།སྔ་ཚེ་ནས་མ་དངུལ་འཇོག་རྒྱུའི་འགན་ལེན་གྲོས་མཐུན་བཞག་པ།མཚོ་འགག་ངོགས་གཉིས་ཀྱི་རིག་གནས་སློབ་གསོ་སྤེལ་རེས་བྱབ་རྒྱུ་སྐུལ་འདེད་ཤུགས་ཆེན་གཏོང་བ།མཚོ་འགག་ངོགས་གཉིས་ཀྱི་གཞོན་ནུ་དང་ལོ་ཆུང་བསམ་བློ་སྤེལ་རེས་བྱ་རྒྱུར་མཐོང་ཆེན་དང་ཤུགས་སྣོན་བརྒྱབ་ནས་ཀྲུང་ཧྭ་རིག་གནས་དང་ཀྲུང་ཧྭ་མི་རིགས་ལ་ཁས་ལེན་བྱ་རྒྱུ་ཇེ་དྲག་ཏུ་གཏོང་བ་བཅས་བྱེད་དགོས།
　བཞི།མུ་མཐུད་དེ་ཐའེ་ཝན་གཞི་རིམ་མང་ཚོགས་ཀྱི་ཐུན་མོང་དུ་མཚོ་འགག་ངོགས་གཉིས་ཀྱི་སྤེལ་རེས་མཉམ་ལས་ཀྱི་གྲུབ་འབྲས་འགན་ལེན་བྱེད་དགོས།ལོ་འདི་ཤས་རིང་ང་ཚོས་མཐའ་གཅིག་ཏུ་རང་སར་མི་བཞག་པ་དང་མི་སར་རང་བཞག་ནས་ཐའེ་ཝན་སྤུན་སྡེའི་དགོས་མཁོ་དངོས་ལ་བསམ་བཞིགས་མཛད་ནས་ཁོ་ཚོའི་བདེ་རྩར་ཐུག་པའི་ཁེ་ཕན་དང་འབྲེལ་བའི་གནད་དོན་དངོས་ཐག་གཅོད་ཡག་པོ་བྱས་པ།མཚོ་འགག་ངོགས་གཉིས་ཀྱི་སྤུན་ཟླས་ཐུན་མོང་དུ་མཚོ་འགག་ངོགས་གཉིས་ཀྱི་འབྲེལ་བ་འཕེལ་རྒྱས་ཡོང་བར་སྐུལ་འདེད་གཏོང་བ་དང་ཐུན་མོང་དུ་མཚོ་འགག་ངོགས་གཉིས་བར་ཀྱི་འབྲེལ་བ་འཕེལ་རྒྱས་ཡོང་བའི་གྲུབ་འབྲས་ལོངས་སྤྱོད་བྱེད་འོས།