གསར་འགོད་པས་བོད་རང་སྐྱོང་ལྗོངས་རིག་གནས་ཅུའུ་ནས་རྒྱུས་ལོན་བྱུང་བའི་གནས་ཚུལ་ལྟར་ན། རིག་དངོས་ཐོན་ཁུངས་ཕུན་སུམ་ཚོགས་པའི་བོད་ལྗོངས་སུ། ལོ་མང་པོའི་རིང་ལ་རིག་དངོས་སྲུང་སྐྱོབ་ལས་དོན་ལ་ཤུགས་ཆེན་པོས་ཡར་སྐུལ་བྱས་པ་དེས། བོད་ལྗོངས་སུ་རིམ་པ་སོ་སོའི་རིག་དངོས་སྲུང་སྐྱོབ་ལས་ཁུངས་བརྒྱད་བརྒྱ་ཙམ་ཡོད་ལ། དེ་ལས་བོད་ལྗོངས་ནི་རང་རྒྱལ་གྱི་རིག་དངོས་སྲུང་སྐྱོབ་ལས་ཁུངས་ཅུང་མང་པོའི་ས་ཆ་ཞིག་ཡིན་པ་མཚོན་ཡོད།
 རིག་དངོས་ཅུའུ་ཡིས་འདོན་སྤྲོད་བྱས་པའི་གྲངས་ཀ་ལྟར་ན། བོད་ལྗོངས་ཀྱི་རིག་དངོས་སྲུང་སྐྱོབ་ལས་ཁུངས་བརྒྱད་བརྒྱའི་ཁྲོད། རྒྱལ་ཁབ་རིམ་པའི་རིག་དངོས་སྲུང་སྐྱོབ་ལས་ཁུངས་སུམ་ཅུ་སོ་ལྔ་ཡོད་པ་དང་། རང་སྐྱོང་ལྗོངས་རིམ་པའི་རིག་དངོས་སྲུང་སྐྱོབ་ལས་ཁུངས་ཉིས་བརྒྱ་དང་ཉེར་བཞི་ཡོད་ལ། གྲོང་ཁྱེར་དང་། རྫོང་རིམ་པའི་རིག་དངོས་སྲུང་སྐྱོབ་ལས་ཁུངས་བཞི་བརྒྱ་དང་གྱ་བཞི་ཡོད།
 རིག་དངོས་སྡེ་ཁག་གི་འགན་འཁུར་མི་སྣས་མཚམས་སྦྱོར་བྱས་པ་ལྟར་ན། རིག་དངོས་ས་ཚིགས་ཇེ་མང་དུ་སོང་བ་དང་བསྟུན་ནས། བོད་ལྗོངས་ཀྱིས་རང་སྐྱོང་ལྗོངས་རིམ་པའི་རིག་དངོས་སྲུང་སྐྱོབ་ལས་ཁུངས་བརྒྱ་དང་བཅུ་གཉིས་ཀྱི་མིང་ཁྱབ་སྒྲོག་བྱས་པ་དང་། དེ་དང་ཆབས་ཅིག་ཏུ་རྒྱལ་ཡོངས་རིག་དངོས་གཙོ་བོའི་སྲུང་སྐྱོབ་ལས་ཁུངས་སོ་དྲུག་རྒྱལ་ཡོངས་ལ་སྙན་ཞུ་བྱས་ཟེར།
 མིག་སྔའི་བར། བཀྲ་ཤིས་ལྷུན་པོ་དགོན་པ་དང་། བོད་བརྒྱུད་ནང་བསྟན་ཆོས་ལུགས་ཀྱི་གནས་མཆོག་ལྷ་ལྡན་གཙུག་ལག་ཁང་། དགེ་ལུགས་པའི་དགོན་སྡེ་ཆེན་མོ་འབྲས་སྤུངས་དགོན་པ་སོགས་གནའ་བོའི་རིག་དངོས་གཙོ་བོ་འཛུགས་སྐྲུན་དང་སྲུང་སྐྱོབ་ཞིག་གསོའི་བཟོ་སྐྲུན་ཉེར་གཉིས་ཕྱོགས་ཡོངས་ནས་ལས་མགོ་བརྩམས་པ་དང་། མ་དངུལ་སྒོར་མོ་དུང་ཕྱུར་གསུམ་དང་བྱེ་བ་དྲུག་ས་ཡ་བརྒྱད་ལས་ཡུལ་དངོས་སུ་འབྱོར་ཡོད་ལ། མ་དངུལ་བཏང་ཚད་བརྒྱ་ཆའི་བདུན་ཅུ་ཙམ་ལ་བསླེབས་ཡོད།