ཉིན་ཤས་གོང་།རྒྱལ་ཁབ་འཕེལ་རྒྱས་དང་བཅོས་བསྒྱུར་ཨུ་ཡོན་ལྷན་ཁང་གིས་བརྡ་ཐོ་བཏང་སྟེ།སྤྱི་ཟླ9པའི་ཚེས1ཉིན་ནས་བཟུང་གློག་ནུས་བཙོངས་རིན་གྱི་སྤྱིའི་ཆུ་ཚད་ལ་འགྱུར་བ་མི་གཏོང་བའི་གནས་ཚུལ་འོག རྡོ་སོལ་འབར་རྒྱུར་སྤྱོད་པའི་གློག་འདོན་ཁེ་ལས་ཀྱི་གློག་རིན་འོས་འཚམས་ཀྱིས་དམའ་རུ་གཏོང་རྒྱུ་དང་། དམའ་རུ་བཏང་བའི་དངུལ་ལྷག་མ་དེ་ཁོར་ཡུག་སྲུང་སྐྱོང་གི་གློག་རིན་གྱི་འགལ་ཟླ་སེལ་རྒྱུའི་ཐད་གཏོང་རྒྱུ་ཡིན་པ་རེད།　རྒྱལ་ཁབ་འཕེལ་རྒྱས་དང་བཅོས་བསྒྱུར་ཨུ་ཡོན་ལྷན་ཁང་གིས་དེའི་གོང་འགྲེམས་སྤེལ་བྱས་པའི་ཁོར་ཡུག་སྲུང་སྐྱོང་གི་གློག་རིན་གྱི་འགལ་ཟླ་སེལ་བའི་འབྲེལ་ཡོད་གནད་དོན་སྐོར་གྱི་བརྡ་ཐོར་གཞིགས་ཏེ། ཐེངས་འདིའི་གློག་རིན་ལེགས་སྒྲིག་བྱེད་པའི་ཁྲོད། རྒྱལ་ཡོངས་ཀྱི་རྡོ་སོལ་འབར་རྒྱུར་བརྟེན་པའི་གློག་འདོན་ཁེ་ལས་ཀྱི་གློག་རིན་ཆ་སྙོམས་ཏུའུ་རེ་ནས་སྐར་9དང་ལི་3ཆག་པ་དང་། རིན་གོང་ཆག་པའི་ཆ་ཤས་དེ་གཙོ་བོ་ཟེ་ཚྭ་འདོན་པ་དང་། རྡུལ་ཕྱེ་གཙང་སེལ་སོགས་ཁོར་ཡུག་སྲུང་སྐྱོབ་བྱེད་པའི་གློག་རིན་གྱི་འགལ་ཟླ་སེལ་རྒྱུའི་ཐད་གཏོང་རྒྱུ་ཡིན་པ་རེད།
　མིག་སྔའི་བར་སླེབས་སྐབས། རྒྱལ་ཡོངས་སུ་རིམ་བརྩིས་བྱས་ན། གློག་འདོན་ཚད་ཆན་ཝ་དུང་ཕྱུར་བདུན་དང་བྱེ་བ་གཅིག་ཟིན་པའི་རྡོ་སོལ་འབར་རྒྱུ་སྤྱོད་པའི་གློག་འདོན་འཕྲུལ་ཆས་ཀྱི་ཟེ་ཚྭ་འདོན་པ་དང་། རྡུལ་ཕྱེ་གཙང་སེལ་བྱེད་པར་གློག་རིན་ཁ་གསབ་སྤྲོད་པའི་གནད་དོན་ཐག་གཅོད་བྱུང་ཡོད་པ་དང་། དེས་རྡོ་སོལ་འབར་རྒྱུ་སྤྱོད་པའི་གློག་འདོན་འཕྲུལ་ཆས་ཀྱི་གློག་གཤོང་ཚད་ཧྲིལ་པོའི་བརྒྱ་ཆ95ཡན་ཟིན་ཡོད། རྒྱལ་ཁབ་གོང་འཕེལ་དང་བསྒྱུར་བཅོས་ཨུ་ཡོན་ལྷན་ཁང་གི་འབྲེལ་ཡོད་འགན་འཁུར་བས། ད་ཐེངས་རྡོ་སོལ་འབར་རྒྱུ་སྤྱོད་པའི་གློག་འདོན་ཁེ་ལས་ཀྱི་གློག་རིན་ལེགས་སྒྲིག་བྱས་པ་དེས། ཁོར་ཡུག་སྲུང་སྐྱོབ་ཐད་ཀྱི་གློག་རིན་དུས་ཐོག་ཏུ་མཇུག་རྩིས་རྒྱག་པ་དང་། རྡོ་སོལ་འབར་རྒྱུ་སྤྱོད་པའི་གློག་འདོན་ཁེ་ལས་ཀྱིས་ཟེ་ཚྭ་འདོན་པ་དང་། རྡུལ་ཕྱེ་གཙང་སེལ་བྱེད་པའི་སྒྲིག་ཆས་ལེགས་བཅོས་བྱེད་པ། རླུང་ཁམས་ཆེན་མོའི་སྤུས་ཚད་ལེགས་བཅོས་བྱེད་པ་བཅས་ལ་རྒྱབ་སྐྱོར་བྱེད་རྒྱུར་ཕན་ཐོགས་ཡོད་ཅེས་གསུངས་ཡོད་པ་རེད།