ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ3པའི་ཚེས14ཉིན་འབྱོར་བའི་གློག་འཕྲིན། སྐབས་བཅུ་གཅིག་པའི་རྒྱལ་ཡོངས་འཐུས་མི་ཚོགས་ཆེན་ཐེངས་བཞི་པས་གོང་ཚེས་ཉིན་པེ་ཅིན་མི་དམངས་ཚོགས་ཁང་ཆེན་མོར་གསར་འགོད་པའི་ཚོགས་འདུ་འཚོགས་པ། རྒྱལ་སྲིད་སྤྱི་ཁྱབ་ཁང་གི་ཙུང་ལི་ཝུན་ཅ་པའོ་ཡིས་ཚོགས་ཆེན་གྱི་མགྲིན་ཚབ་པ་ལི་ཀྲའོ་ཞིང་གིས་གདན་འདྲེན་ཞུ་བར་ལྟར་རྒྱལ་ཁབ་ཕྱི་ནང་གི་གསར་འགོད་པར་མཇལ་འཕྲལ་གནང་ཅིང་ཁོ་ཚོའི་འདྲི་བར་ལེན་འདེབས་ཡོད།
     མི་དམངས་ཉི་རེའི་ཚགས་པར་ཁང་གི་གསར་འགོད་པས་འདྲི་བར། ལོ་ལྔའི་འཆར་གཞི་བཅུ་གཉིས་པའི་འཆར་འགོད་ནང་གཏན་འབེབས་བྱས་པའི་འབྱུང་འགྱུར་གྱི་ལོ་ལྔའི་ནང་རང་རྒྱལ་གྱི་དཔལ་འབྱོར་འཕར་སྣོན་གཏོང་བའི་སྔོན་དཔག་དམིགས་ཚད་ནི་ལོ་རེར་བརྒྱ་ཆ7ཡིན་པ་དེ་ལོ་ལྔའི་འཆར་གཞི་བཅུ་གཅིག་པའི་འཆར་འགོད་དང་བསྡུར་ན་བརྒྱ་ཆའི་གྲངས་ཀ0.5མར་ཆགས་ཡོད། ཙུང་ལི་ལགས། རང་རྒྱལ་གྱིས་མ་སྐུལ་དང་བླངས་ཀྱིས་དཔལ་འབྱོར་འཕར་སྣོན་གཏོང་ཚད་མར་ཆགས་བཅུག་དོན་ཅི་ཡིན་ནམ་དང་། གལ་སྲིད་འབྱུང་འགྱུར་རང་རྒྱལ་གྱི་དཔལ་འབྱོར་འཕར་སྣོན་གཏོང་ཤུགས་ལྷོད་དུ་བཏང་ན། ལས་ཞུགས་རྒྱ་ཆེར་གཏོང་བ་དང་དམངས་འཚོ་ལེགས་བཅོས་བྱ་རྒྱུ་སོགས་ཀྱི་ཐད་ལ་གནོད་སྐྱོན་ཨེ་ཡོད།
     ཙུང་ལི་ཝུན་ཅ་པའོ་ཡིས་ལན་འདེབས་པར། རང་རྒྱལ་གྱིས་མ་སྐུལ་དང་བླངས་ཀྱིས་ལོ་ལྔའི་འཆར་གཞི་བཅུ་གཉིས་པའི་སྐབས་ཀྱི་དཔལ་འབྱོར་འཕེལ་རྒྱས་གཏོང་ཚད་མར་ཆགས་བཅུག་པ་དེ་རང་རྒྱལ་གྱི་ཆོད་སེམས་དང་འདོད་བློ་བཏོན་ཡོད་པ་མ་ཟད། ད་དུང་ནི་གལ་འགངས་ཆེ་བའི་བྱེད་ཐབས་ཤིག་རེད། འདི་འདྲ་བཤད་ཆོག་པ་ནི་འབྱུང་འགྱུར་གྱི་ལོ་ལྔ་དང་ཐ་ན་ཀྲུང་གོའི་དཔལ་འབྱོར་འཕེལ་རྒྱས་གཏོང་རྒྱུའི་དུས་ཡུན་ཧ་ཅང་རིང་པོར་ང་ཚོས་དཔལ་འབྱོར་འཕེལ་རྒྱས་གཏོང་སྟངས་འཕོ་འགྱུར་བྱེད་པ་དེ་ལས་འགན་གཙོ་བོ་བྱས་ཏེ་ཀྲུང་གོའི་དཔལ་འབྱོར་དེ་ཚན་རྩལ་ལ་བརྟེན་ནས་ཡར་ཐོན་ཡོང་བ་དང་ལས་རྩོལ་པའི་བྱང་ཚད་མཐོ་རུ་གཏོང་རྒྱུའི་ཐོག་འགྱུར་ཐུབ་པ་བྱ་རྒྱུ་དང་། ཤུགས་ཆེན་པོས་དཔལ་འབྱོར་འཕར་སྣོན་གཏོང་རྒྱུའི་སྤུས་ཚད་དང་ཕན་ནུས་ལ་དོ་སྣང་བྱ་རྒྱུ་རེད།
     ཧྥ་རན་སེའི《གཟར་འཁོར་རེའི་འདུ་ཤེས》དུས་དེབ་ཀྱི་གསར་འགོད་པས་འདྲི་བར། ཝུན་ཙུང་ལི་ལགས། མི་ཁ་ཤས་ཀྱིས་ཀྲུང་གོ་ཡིས་ཆབ་སྲིད་དང་། དཔལ་འབྱོར། རིག་གནས་སོགས་ཁྱབ་ཁོངས་སུ་རང་ཉིད་ཀྱི་འཕེལ་རྒྱས་གཏོང་བའི་མ་དཔེ་ཞིག་བསྐྲུན་ཡོད་ཅེས་ངོས་འཛིན་བྱས་ཡོད། འབྱུང་འགྱུར་ཀྲུང་གོའི་འཕེལ་རྒྱས་གཏོང་བའི་མ་དཔེ་དེ་འགྱུར་ལྡོག་བྱུང་བཞིན་པའི་རྒྱལ་ཁབ་ཕྱི་ནང་གི་ཁོར་ཡུག་དང་གང་འདྲ་ཞིག་མཐུན་ཐུབ་རྒྱུ་རེད་དམ། གཞན་དག་རྒྱལ་ཁབ་ཀྱིས་ཀྲུང་གོའི་འཕེལ་རྒྱས་གཏོང་བའི་མ་དཔེ་ཐོག་ནས་གོ་བ་གང་འདྲ་ཞིག་ལེན་ཐུབ་རྒྱུ་རེད་དམ།
     ཙུང་ལི་ཝུན་ཅ་པའོ་ཡིས་ལན་འདེབས་པར། བཅོས་བསྒྱུར་སྒོ་འབྱེད་བྱས་ནས་ལོ30ལྷག་པ་ནས་བཟུང་། ཀྲུང་གོའི་དཔལ་འབྱོར་དང་སྤྱི་ཚོགས་ལ་འཕེལ་རྒྱས་མགྱོ གས་པོ་བྱུང་ཡོད་ཅིང་། མི་དམངས་ཀྱི་འཚོ་བའང་ལེགས་བཅོས་མངོན་གསལ་དོད་པོ་ཐོབ་པ་དེར་འཛམ་གླིང་ཡོངས་ཀྱིས་ཐུན་མོང་དུ་ངོས་འཛིན་བྱས་ཡོད་ལ། རང་རེའི་སྲིད་གཞུང་གིས་དེང་སྐབས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་རིམ་གནས་པའི་གནད་དོན་ཐག་གཅོད་ནན་ཏན་བྱས་ཡོད་པ་དེའང་མི་སེར་གྱིས་ཐུན་མོང་དུ་མཐོང་ཐུབ་པའི་དོན་དངོས་རེད། རང་རྒྱལ་གྱིས་སྔར་བཞིན་བཅོས་བསྒྱུར་དང་འཛུགས་སྐྲུན་བྱ་རྒྱུའི་ཐམས་ལམ་འཚོལ་ཞིབ་བྱེད་བཞིན་པས། ང་ཚོས་དུས་དང་རྣམ་པར་ཀུན་ཏུ་རང་རྒྱལ་ལ་འཕེལ་རྒྱས་གཏོང་བའི་མ་དཔེ་ཞིག་ཆགས་ཡོད་པར་ངོས་འཛིན་གཏན་ནས་བྱེད་མ་མྱོངས། དེ་དང་འདྲ་བར། ང་ཚོས་རྒྱལ་ཁབ་གང་ཡིན་ནའང་འདྲ་ཚང་མར་རང་ཉིད་རྒྱལ་ཚུལ་དང་མཐུན་པའི་འཕེལ་རྒྱས་གཏོང་བའི་ལམ་བུ་ཡོད་པར་ངོས་འཛིན་བྱེད་བཞིན་ཡོད། ང་ཚོས་རྒྱལ་ཁབ་སོ་སོའི་མི་དམངས་ཀྱིས་གདམ་ག་རྒྱག་པར་བརྩི་བསྐུར་བྱ་རྒྱུ་དང་། ང་ཚོས་རྒྱལ་ཁབ་སོ་སོའི་གཅིག་བུ་མེད་པའི་འཕེལ་རྒྱས་གཏོང་བའི་ལམ་བུ་བར་ཕན་ཚུན་བརྩི་བཀུར་དང་། སློབ་སྦྱོང་། དཔེ་ལྟ་ས་བཅས་བྱེད་ཆོག་པར་ངོས་འཛིན་བྱས་ཡོད།
     ཞང་ཀང་སྐུད་ཡོད་བཪྙན་འཕྲིན་ཁང་གི་གསར་འགོད་པས་འདྲི་བར། ལོ་ལྔའི་འཆར་གཞི་བཅུ་གཉིས་པའི་འཆར་འགོད་སྙན་སེང་གི་ལེ་ཚན་གཅིག་ནང་ཆེད་དུ་ཞང་ཀང་དང་ཨའོ་མན་དང་འབྲེལ་བའི་དོན་དག་བཤད་ཡོད་ཅིང་། ཀྲུང་དབྱང་གིས་ཟམ་མི་ཆད་པར་ཞང་ཀང་ནི་རྒྱལ་སྤྱིའི་དངུལ་རྩ་ལྟེ་གནས་བྱེད་པར་རོགས་སྐྱོར་བྱ་རྒྱུ་དང་། ཀོང་ཏུང་དང་ཞང་ཀང་ས་ཁུལ་གཉིས་ཀྱིས་རྨང་གཞི་སྒྲིག་ཆས་ཀྱི་ཆེ་གྲས་རྣམ་གྲངས་མཉམ་ལས་ལག་བསྟར་བྱ་རྒྱུར་གཏན་འབེབས་བྱེད་རིམ་བསམ་བློ་གང་འདྲ་གཏོང་ཡོད་དམ།
     ཙུང་ལི་ཝུན་ཅ་པའོ་ཡིས་ལེན་འདེབས་པར། ཐེངས་འདིར་ལོ་ལྔའི་འཆར་གཞི་བཅུ་གཉིས་པའི་འཆར་འགོད་རྩ་གནད་ནང་ཆེད་དུ་ཞང་ཀང་དང་ཨའོ་མན་སྐོར་གྱི་དོན་དག་དེ་ལེ་ཚན་ཞིག་ཏུ་བགོད་དེབ་བཤད་པ་ནི་ཀྲུང་དབྱང་སྲིད་གཞུང་གིས་ཞང་ཀང་དང་ཨའོ་མན་ས་ཁུལ་གཉིས་ཀྱིས་ཡུན་རིང་གི་དར་རྒྱས་དང་བརྟན་བརླིང་སྲུང་སྐྱོང་བྱེད་པར་བློ་བརྟན་འགྱུར་མེད་ཀྱིས་རོགས་སྐྱོར་བྱ་རྒྱུའི་ཆོད་སེམས་བཏོན་ཡོད། འདི་འདྲ་བྱེད་པ་ནི་དམིགས་བསལ་གྱི་སྲིད་འཛིན་ས་ཁུལ་གཉིས་ཀྱི་སྲིད་གཞུང་དང་ལས་རིགས་ཁག་གི་མི་སྣའི་བླང་བྱ་ཡིན་ཞིང་། ཞང་ཀང་དང་ཨའོ་མན་གྱི་དུས་ཡུན་རིང་པོའི་འཕེལ་རྒྱས་གཏོང་བར་ཕན་ཐོགས་ཡོད་པ། ང་ཚོས་རྒྱལ་ཁབ་གཅིག་ནང་ལམ་ལུགས་གཉིས་ཡོད་པ་དང་། ཞང་ཀང་མི་ཡིས་ཞང་ཀང་བདག་བཅོས་བྱེད་པ། ཚད་མཐོན་པོས་རང་བཅོས་བྱ་རྒྱུའི་བྱེད་ཕྱོགས་བཅས་རྒྱུན་འཁྱོངས་བྱས་ནས་གཞི་རྩའི་བཅའ་ཁྲིམས་བརྩི་སྲུང་ནན་པོ་བྱ་རྒྱུ་ཡིན། ཀྲུང་དབྱང་གིས་གཏན་འཁེལ་བྱས་པའི་ལོ་ལྔའི་འཆར་གཞི་བཅུ་གཉིས་པའི་འཆར་འགོད་དེ་ཞང་ཀང་དང་ཨའོ་མན་འཕེལ་རྒྱས་གཏོང་བར་རོགས་སྐྱོར་བྱ་རྒྱུ་དང་། ཀྲུང་དབྱང་གིས་འཆར་འགོད་བྱེད་པ་དེ་ཞང་ཀང་རང་ཉིད་ཀྱི་འཆར་འགོད་ཀྱི་ཚབ་གཏན་ནས་བྱ་རྒྱུ་མེད།
     ཨ་རིའི《ཧྭ་ཨའེ་ཁྲུམ་ལམ་གྱི་ཉི་རེའི་ཚགས་པར》གྱི་གསར་འགོད་པས་འདྲི་བར། ཝུན་ཙུང་ལི་ལགས། དངུལ་ལོར་ཚད་བརྒལ་འགྲེམ་པ་ནི་ད་ལྟར་ཀྲུང་གོ་སྤྱི་ཚོགས་ནང་གི་ཉིན་རེ་ལས་ཉིན་རེ་མངོན་གསལ་དོད་པའི་གནད་དོན་དུ་གྱུར་ཡོད། ཟོག་གོང་དང་ཁང་རིན་མཐོ་བ་དེས་ཐད་ཀར་མི་སེར་གྱི་རྒྱུན་ལྡན་འཚོ་བར་གནོད་སྐྱེལ་ཡོད། ཁྱེར་རང་གིས་ཀྲུང་གོའི་སྲིད་གཞུང་གིས་གོང་གསལ་གྱི་གནད་དོན་ཐག་གཅོད་བྱེད་ཆེད་བླངས་པའི་བྱེད་ཐབས་ལ་གདེང་འཇོག་གང་འདྲ་བྱ་རྒྱུ་ཡིན་ནམ།
     ཙུང་ལི་ཝུན་ཅ་པའོ་ཡིས་ལན་འདེབས་པར། དངུལ་ལོར་ཚད་བརྒལ་འགྲེམ་པ་ནང་ཟོག་གོང་དང་ཁང་རིན་གཏོགས་པ་དེ་མི་དམངས་མང་ཚོགས་ཀྱི་འཚོ་བ་དང་འབྲེལ་བ་ཡོད་ལ། ཁོ་ཚོའི་ཕུགས་རྩའི་ཁེ་ཕན་དང་འབྲེལ་བའང་ཡོད། དེར་བརྟེན། ད་ལོར་ང་ཚོས་སྲིད་གཞུང་གི་རྣམ་གྲངས་ཁག་གི་ལས་ཀ་ནང་དངུལ་ལོར་ཚད་བརྒལ་འགྲེམ་པར་ཚོད་འཛིན་བྱ་རྒྱུ་དེ་ཨང་དང་པོའི་ཐོག་བཞག་ཡོད། རང་ཉིད་ཀྱིས་ཀྲུང་གོ་སྲིད་གཞུང་གིས་དངུལ་ལོར་ཚད་བརྒལ་འགྲེམ་པར་ཚོད་འཛིན་བྱ་རྒྱུའི་ནུས་པ་དང་ཆོད་སེམས་ལྡན་པར་ཡིད་ཆེས་ཡོད།
     ཀྲུང་དབྱང་མི་དམངས་ཀུན་ཁྱབ་གློག་འཕྲིན་ཁང་གི་གསར་འགོད་པས་འདྲི་བར། ཙུང་ལི་ལགས། ད་ལོར་ཁྱེད་ཀྱིས་སྲིད་གཞུང་ལས་ཀའི་སྙན་སེང་ནང་བློ་བརྟན་འགྱུར་མེད་ཀྱིས་ཁང་རིན་ཚོད་འཛིན་བྱ་རྒྱུ་ཡིན་པའི་གསུངས་ཡང་བསྐྱར་གནང་ཡོད། ཕྱིན་ཆད་དུ་ཀྲུང་གོ་སྲིད་གཞུང་གིས་ཁང་རིན་ཚོད་འཛིན་བྱ་རྒྱུའི་བྱེད་ཐབས་འདི་དག་དོན་འཁྱོལ་བྱེད་ཨེ་ཐུབ།
     ཙུང་ལི་ཝུན་ཅ་པའོ་ཡིས་ལན་འདེབས་པར། ཀྲུང་དབྱང་ལ་ཆ་བཞག་ནས་བཤད་ན། དེང་སྐབས་སུ་ཁང་རིན་ཚོད་འཛིན་བྱེད་པའི་སྲིད་ཇུས་དང་བྱེད་ཐབས་ཁག་དོན་འཁྱོལ་བྱས་ཚུལ་ལ་ཞིབ་བཤེར་བྱེད་ཤུགས་ཆེ་རུ་གཏོང་དགོས་དང་། འགོ་ཁྲིད་ཀྱི་འགན་འཁྲི་བདའ་འདེད་གཏོང་བའི་ལམ་ལུགས་ལག་ལེན་ངོ་མ་བསྟར་དགོས། དུས་མཚུངས་སུ། ས་ཁང་བདག་ཁོངས་ཚོང་ར་འཕེལ་རྒྱས་གཏོང་བའི་རྣམ་པར་རྗེས་དེད་ཀྱིས་དབྱེ་ཞིབ་བྱས་ཏེ་སྔར་ལས་ལྷག་པར་དམིགས་ཚད་རང་བཞིན་ལྡན་པའི་སྤྱི་ཁོག་གི་ཚོད་འཛིན་དང་སྒྲིག་སྦྱོར་གྱི་བྱེད་ཐབས་ཞིབ་འཇུག་བྱེད་དགོས། འདི་འདྲ་རྒྱུན་འཁྱོངས་བྱས་ན་ཁང་རིན་མཐོན་པའི་གནད་དོན་ཐག་གཅོད་ཐུབ་རྒྱུ་རེད།
     ཆུ་ཚོད་གཉིས་ནང་ཙུང་ལི་ཝུན་ཅ་པའོ་ཡིས་ད་དུང་རྒྱལ་ཁང་ཕྱི་ནང་གི་གསར་འགོད་པས་འབྱུང་འགྱུར་ཀྲུང་གོ་སྲིད་གཞུང་གིས་རིག་གནས་ཁྱབ་ཁོངས་སུ་སྲིད་ཇུས་དངོས་ཅི་བཏོན་རྒྱུ་དང་རིག་གནས་གང་ཕྱོགས་ལ་འཕེལ་རྒྱས་གཏོང་རྒྱུ། ལོ་ལྔའི་འཆར་གཞི་བཅུ་གཉིས་པའི་འཆར་འགོད་ནང་མཚོ་འགོག་ངོགས་གཉིས་བར་དཔལ་འབྱོར་མཉམ་ལས་བྱ་རྒྱུའི་ཟམ་གདན་གྲོས་མོལ་གྱི་ཡིག་གེ་བགོད་པ་དེ་མཚོ་འགོག་ངོགས་གཉིས་ཀྱི་དཔལ་འབྱོར་དང་ཉོ་འཚོང་མཉམ་ལས་བྱ་རྒྱུར་སྐུལ་འདེད་ཅི་འདྲ་གཏོང་ཐུབ་རྒྱུ། མི་དམངས་ཤོག་སྒོར་གྱི་རིན་ཐང་ཡར་འཕར་རྒྱུ་སོགས་ཀྱི་གནད་དོན་འདྲི་བར་ལན་འདེབས་ཡོད།