ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ8པའི་ཚེས25ཉིན་འབྱོར་བའི་གཏམ་གསར།སློབ་གསོ་པུའུ་ཡིས་གོང་ཚེས་ཉིན་བརྡ་ཐོ་བཏང་ནས་ས་གནས་ཁག་དང་ཐད་གཏོགས་མཐོ་རིམ་སློབ་གྲྭར་རོགས་དངུལ་སྤྲོད་པ་དང་རོགས་སྐྱོར་བྱ་རྒྱུའི་སྲིད་ཇུས་ཁག་དོན་འཁྱོལ་བྱེད་པའི་ལས་ཀ་དམ་འཛིན་བྱས་ཏེ་སློབ་མ་གསར་པ་ཡོད་ཚད་ཁྱིམ་ཚང་གི་ཆ་རྐྱེན་ཞན་པ་དང་འཚོ་བར་དཀའ་ངལ་ཡོད་པ།སློབ་སྦྱོང་ལ་དཀའ་ངལ་ཡོད་པའི་རྐྱེན་གྱིས་སློབ་ཤོར་མི་བྱེད་པར་ཁག་ཐེག་བྱེད་དགོས་པར་མ་ཟད།ད་རུང་སློབ་མ་རྣམས་སློབ་གྲྭའི་ར་བའི་འཚོ་བ་གསར་པར་མགྱོགས་སུ་འཕྲོད་ཐུབ་པར་རོགས་རམ་བྱེད་དགོས་ཤིང་།དེ་དང་མཉམ་དུ་དུས་ཐོག་ཏུ་སློབ་མའི་ཐོ་འགོད་བྱས་ཚུལ་རྟོགས་པ་དང་།གཟབ་ནན་གྱིས་སློབ་མ་གསར་པའི་ཐོབ་ཐང་དང་ཐོ་འགོད་ཐོབ་ཐང་ལ་བསྐྱར་ཞིབ་བྱས་ཏེ་གཏན་འཁེལ་ལྟར་སློབ་མ་གསར་པར་གློག་རྡུལ་སློབ་ཁོངས་ཐོ་འགོད་བྱས་ཏེ་སློབ་གྲྭ་གཅིག་དང་སློབ་མ་གཅིག་ཀྱང་མི་ལུས་པ་དང་སློབ་ཁོངས་ཆ་འཕྲིན་ཡང་དག་ཅིང་ནོར་འཁྲུལ་མེད་པར་ཁག་ཐེག་བྱེད་དགོས་པའི་རེ་འདུན་བཏོན་ཡོད་པ་རེད།
    སློབ་གྲྭ་གང་རུང་གཉེར་བ་དང་སློབ་མ་གང་རུང་བསྡུས་པ།སློབ་ཡོན་གང་རུང་བསྡུས་པ་སོགས་སྤྱི་ཚོགས་ཀྱིས་དོ་སྣང་ཆེན་པོ་བྱེད་པ་དང་མང་ཚོགས་ཀྱིས་ཡང་ཡང་ཞུས་པའི་དམིགས་བསལ་གྱི་གནད་དོན་གྱི་ཐད་ལ།སློབ་གསོ་པུའུ་ཡིས་སློབ་ཡོན་སྒྲིག་སྦྱོར་བྱེད་པར་ངེས་པར་དུ་ཁྲིམས་ལུགས་ཀྱི་གོ་རིམ་ལ་བརྟེན་ཏེ་ནན་ཏན་གྱིས་སློབ་གསོའི་སློབ་ཡོན་བསྡུས་ཚུལ་ཡོངས་སུ་བསྒྲགས་པའི་ལམ་ལུགས་ལག་བསྟར་ནན་པོ་བྱེད་དགོས་པ་ལས།ཁྲིམས་འགལ་གྱིས་ཞབས་ཞུ་རང་བཞིན་གྱིས་སློབ་ཡོན་བསྡུས་པ་དང་ཚབ་བྱས་མ་དངུལ་བསྡུས་མི་ཆོག  སློབ་གོས་མངག་ཉོ་བྱ་རྒྱུ་ཚད་ལྡན་བྱེད་དགོས་པ་མ་ཚད་སྤུས་ཀར་ཁག་ཐེག་བྱེད་དགོས།ཁྲིམས་འགལ་གྱིས་སློབ་མ་བསྡུས་པ་དང་གཞན་མིང་རང་དུ་རྫུས་ཏེ་རྒྱུགས་སྤྲད་པ་དང་སློབ་གྲྭར་ཡོང་བའི་བྱ་སྤྱོད་ལ་རྟོག་ཞིབ་ནན་པོ་བྱེད་དགོས་པའི་རེ་འདུན་བཏོན་པ་རེད།
    དེ་དང་མཉམ་དུ།སྤྱི་ཚོགས་ཀྱིས་དོ་སྣང་བྱེད་པའི་སློབ་གྲྭའི་ར་བའི་ཉེན་མེད་ཀྱི་གནད་དོན་ཐད་ལ་བརྡ་ཐོའི་ཐོག་ས་གནས་ཁག་གིས་ཏན་ཏིག་གིས་སློབ་གྲྭའི་རླངས་འཁོར་ཉེན་མེད་བདེ་འཇགས་དོ་དམ་བྱ་རྒྱུར་ཤུགས་སྣོན་རྒྱག་དགོས་ཤིང་།འབྲེལ་ཡོད་སྡེ་ཁག་དང་ཉམས་དུ་བཅའ་ཁྲིམས་ལྟར་སྒྲིག་བཟོ་རླངས་འཁོར་དང་བེད་མེད་རླངས་འཁོར།སློབ་གྲྭ་རླངས་འཁོར་གཏོང་ཆོག་པའི་ཆོག་མཆན་ཐོབ་མེད་མཁན་གྱིས་རླངས་འཁོར་བཏང་སྟེ་སློབ་མ་སྐྱེལ་བར་ཞིབ་བཤེར་ནན་པོ་བྱེད་དགོས་པ་དང་།སློབ་གྲྭ་རླངས་འཁོར་གཏོང་ཆོག་པའི་ཁ་ལོ་དཔང་ཡིག་ཐོབ་མེད་མཁན་གྱིས་སློབ་གྲྭའི་ཁ་ལོ་གཏོང་བ་དང་འགྲོས་བརྒལ།སྒྲིག་ཁོངས་མི་གྲངས་ལས་བརྒལ་བ།འགྲོ་མི་ཆོག་པའི་ལམ་དུ་རླངས་འཁོར་གཏོང་བ་སོགས་ཁྲིམས་འགལ་གྱི་བྱ་སྤྱོད་བཅས་ལ་ཞིབ་བཤེར་ཐག་གཅོད་བྱེད་དགོས་པ།དེ་མིན་སྔོན་རྟོག་ནང་རྐྱེན་བསྐྲུན་ནས་ཧུར་བརྩོན་གྱིས་ཨེ་པོ་ལ་ནད་དུག་འགོག་སྲུང་དང་ཚོད་འཛིན་བྱ་རྒྱུའི་ལས་ཀ་ལེགས་པོ་སྒྲུབ་དགོས་པའི་བླང་བྱ་བཏོན་ཡོད་པ་རེད།