ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་དང་ལྗོངས་ཏང་ཨུད་ཀྱི་སྲུང་བྱ་རྣམ་བཅུ་སོགས་འབྲེལ་ཡོད་གཏན་འབེབས་ལག་བསྟར་དོན་འཁྱོལ་སྔར་ལས་ལྷག་པ་བྱས་ཏེ།རྒྱུན་སྲིང་ལྷོད་མེད་ཀྱིས་སྤྱོད་ཚུལ་བཞི་ཡོ་བསྲང་བྱས་ནས་སྤྱི་ལོ2014ལོའི་ཞོ་སྟོན་དང༌།ཟླ་མཆོད་དུས་ཆེན།རྒྱལ་སྟོན་བཅས་ཀྱི་རིང་སྒྲིག་ལམ་ཁག་བརྩི་སྲུང་ནན་པོ་ཐུབ་པ་བྱེད་ཆེད།ལྗོངས་སྒྲིག་བཤེར་ཨུ་ཡོན་ལྷན་ཁང་གིས་ལྗོངས་བཟོ་ཚོང་ཅུས་དང༌ལྗོངས་སྤྱི་བདེ་ཐིང༌།ལྗོངས་ཁྲལ་དོན་ཅུས་སོགས་ཚན་པ་དང་མཉམ་དུ་མཉམ་འབྲེལ་ཞིབ་བཤེར་ཚོགས་ཆུང་སྒྲིག་འཛུགས་བྱས་ཏེ།ལྐོག་ཞིབ་ཀྱིས་གཙོ་བོ་བྱེད་པ་དང་མངོན་ཞིབ་ཀྱིས་རམ་འདེགས་བྱེད་པའི་བྱ་ཐབས་བཟུང་ནས་ཞོ་སྟོན་དང༌ཟླ་མཆོད་དུས་ཆེན།རྒྱལ་སྟོན་བཅས་རིང་ཆེད་དོན་ལྟ་སྐུལ་ཞིབ་བཤེར་བྱེད་རྒྱུ་རེད།
ཐེངས་འདིའི་ཆེད་དོན་ལྟ་སྐུལ་ཞིབ་བཤེར་གྱི་ནང་དོན་གཙོ་བོ་ནི།རིམ་ཁག་ཏང་སྲིད་རྩ་འཛུགས་དང་ཏང་ཡོན་ལས་བྱེད་པས།ཀྲུང་དབྱང་དང་ལྗོངས་ཏང་ཨུད།ལྗོངས་སྒྲིག་བཤེར་ཨུ་ཡོན་ལྷན་ཁང་གི་འབྲེལ་ཡོད་སྤྱོད་གཙང་རང་འདོམས་དང་གྲོན་ཆུང་བསྲི་ཚགས་སོགས་ཀྱི་གཏན་འབེབས་ཁག་དོན་འཁྱོལ་ནན་ཏན་བྱེད་ཐུབ་མིན་དང༌།གཞུང་དངུལ་བཏང་ནས་རྒྱས་ཟ་རྒྱས་འཐུང་བྱེད་པ།གཞུང་དངུལ་བཏང་ནས་མགྲོན་པོ་འབོད་རེས་བྱེད་པ།གཞུང་གི་རླངས་འཁོར་སྒེར་གྱིས་སྤྱོད་པ།རྒྱས་སྤྲོས་རྒྱས་གཤོམ་བྱེད་པ་སོགས་ཀྱི་སྣང་ཚུལ་གནས་ཡོད་མེད་བཅས་རེད།ཤེས་རྟོགས་བྱས་པར་གཞིགས་ན།ཞིབ་བཤེར་ཚོགས་ཆུང་གིས་ལྷ་ས་གྲོང་ཁུལ་གྱི་ཨར་ཁང་དང་འདུ་གནས།གླིང་ཁ།རླངས་འཁོར་འཇོག་ས་སོགས་སུ་མངོན་བཤེར་ལྐོག་ཞིབ་བྱེད་རྒྱུ་དང་།གཙོ་གནད་གསོལ་མགྲོན་ཁང་དང་རོལ་རྩེད་ཁང་དུ་གནས་སྡོད་ལྟ་སྲུང་བྱེད་པ།ཨར་ཁང་དང་རོལ་རྩེད་ཁང་།ཟ་འཐུང་བྱེད་གནས་ཀྱི་འཛིན་ཤོག་དང་གཞུང་དངུལ་བཏང་སྟེ་ཟླ་མཆོད་བག་ལེབ་ཉོ་བ་སོགས་ཀྱི་གནས་ཚུལ་ཞིབ་བཤེར་ཤེས་རྟོགས་བྱེད་རྒྱུ་མ་ཟད།འབྲེལ་ཡོད་སྤ་སེ་ཐོ་འགོད་དང་དཔར་ལོག་བརྒྱབ་སྟེ་སྒྲིག་འགལ་གྱི་གནད་དོན་ཤེས་རྟོགས་བྱེད་རྒྱུར་སྟབས་བདེ་ཡོང་བ་བྱེད་རྒྱུ་རེད།  །