ཞིན་ཧྭ་གསར་འགྱུར་ཁང་ལྷ་ས་ནས་ཟླ་5ཚེས་26ཉིན་འབྱོར་བའི་གཏམ་གསར། ཀྲུང་གོ་མི་དམངས་དངུལ་ཁང་ལྷ་ས་ལྟེ་བའི་ཡན་ལག་དངུལ་ཁང་གིས་བསྡོམས་བརྩིས་བྱས་པར་གཞིགས་ན། ད་ལོའི་ཟླ་བ3པའི་ཟླ་མཇུག་བར་བོད་ལྗོངས་དངུལ་རྩ་སྒྲིག་གཞིའི་སྤྱིའི་རྒྱུ་ནོར་མ་དངུལ་སྒོར་དུང་ཕྱུར2171.55ཟིན་པ་དེ་ད་ལོའི་དུས་མཚུངས་ལས་སྒོར་དུང་ཕྱུར534.28འཕར་བ་དང་སྤྱིའི་བུ་ལོན་ཟུག་ཚད་སྒོར་དུང་ཕྱུར2128.31ཟིན་པ་དེ་ན་ལོའི་དུས་མཚུངས་ལས་སྒོར་དུང་ཕྱུར511.06འཕར་སྣོན་བྱུང་ཡོད་པ་རེད།
    གྲངས་གཞི་ལས་མངོན་པར་གཞིགས་ན། ད་ལོའི་ཟླ་བ3པའི་ཟླ་མཇུག་བར་བོད་ལྗོངས་དངུལ་རྩ་སྒྲིག་གཞིའི་མི་དམངས་ཤོག་སྒོར་དང་ཕྱི་རྒྱལ་གྱི་དངུལ་ལོར་བཅོལ་བའི་ལྷག་གྲངས་དངུལ་སྒོར་དུང་ཕྱུར2048.24ཟིན་པ་དེ་ལོ་སྟོད་ལས་སྒོར་དུང་ཕྱུར6ཉུང་དུ་ཕྱིན་ནས་བརྒྱ་ཆ0.29ཆག་ཡོད། དངུལ་བུན་ཁག་གི་ལྷག་གྲངས་སྒོར་དུང་ཕྱུར700ལས་བརྒལ་ནས་སྒོར་དུང་ཕྱུར743.10ཟིན་པ་དེ་ལོ་སྟོད་ལས་སྒོར་དུང་ཕྱུར་78.79འཕར་བ་དང་འཕར་ཚད་བརྒྱ་ཆ11.86ཟིན་ཡོད། གྲངས་གཞི་དེའི་ཐོག་ནས་བོད་ཀྱི་དངུལ་རྩ་སྒྲིག་གཞིའི་མ་དངུལ་གྱི་ཡོང་ཁུངས་ཡག་པོ་ཡིན་པ་དང་བོད་ཀྱི་བཅོལ་དངུལ་དང་དངུལ་བུན་ཁག་གི་ཆུ་ཚད་མཐོ་ཚད་གསར་པ་ཞིག་ཏུ་སླེབས་པ་གང་ལེགས་མངོན་གྱི་ཡོད་པ་རེད།