ཉེ་ལམ། རྒྱལ་སྲིད་སྤྱི་ཁྱབ་ཁང་གཞུང་སྒྲུབ་ཐིན་གྱིས་གླ་གཏོང་རླངས་འཁོར་ལས་རིགས་ལ་བཅོས་སྒྱུར་ཟབ་སྤེལ་བྱས་ནས་འཕེལ་རྒྱས་སུ་གཏོང་བའི་སྐོར་གྱི་མཛུབ་སྟོན་བསམ་འཆར་འགྲེམ་སྤེལ་བྱས་ཏེ། འགྲུལ་བ་མ་རྩ་བྱེད་པ་དང་བཅོས་སྒྱུར་གསར་གཏོད་དང་གཅིག་གྱུར་སྒོས་འཆར་འགོད་དང་བཀོད་སྒྲིག་བྱེད་པ། ཁྲིམས་ལྟར་ལག་བསྟར་བྱེད་པ། ཁོངས་གཏོགས་ས་གནས་ཀྱིས་དོ་དམ་བྱེད་པ་བཅས་ཀྱི་རྩ་དོན་ལྟར། གླ་གཏོང་རླངས་འཁོར་ལས་རིགས་ལ་བཅོས་སྒྱུར་ཟབ་སྤེལ་བྱེད་པའི་དམིགས་འབེན་དང་ལས་འགན། བྱེད་ཐབས་བཅས་བཏོན།

མཛུབ་སྟོན་བསམ་འཆར་ལས་ཐོག་མར་སྤྱི་སྤྱོད་འགྲིམ་འགྲུལ་འཕེལ་རྒྱས་སུ་གཏོང་བ་དང་འོས་འཚམ་སྒོས་གླ་གཏོང་རླངས་འཁོར་ལས་རིགས་འཕེལ་རྒྱས་སུ་གཏོང་བའི་གཞི་རྩའི་བསམ་ཕྱོགས་རྒྱུན་འཁྱོངས་བྱས་ཏེ། ཧུར་ཐག་སྒོས་སྣ་མང་ཅན་དང་ཁྱད་པར་ཅན་གྱི་ཞབས་ཕྱིའི་མ་ལག་གསར་སྐྲུན་བྱེད་དགོས། ས་གནས་སོ་སོས་རང་བདག་དབང་ཆ་དང་གསར་གཏོད་རང་བཞིན་འདོན་སྤེལ་གང་ལེགས་བྱས་ནས། ས་གནས་རང་གི་གླ་གཏོང་རླངས་འཁོར་ལས་རིགས་འཕེལ་རྒྱས་ཀྱི་དོན་དངོས་དང་འཚམ་པའི་དོ་དམ་རྣམ་པ་འཚོལ་ཞིབ་བྱེད་དགོས་པ་གཏན་འཁེལ་བྱས་ཡོད།