མིའི་མགོ་བོ་བརྗེ་བའི་གཤགས་བཅོས་ཐོག་མ་དེ་བྱེད་གྲབས་ཡོད། མགོ་བོ་བརྗེ་བར་ཆུ་ཚོད36དགོས་ཤིང་སྒོར་མོ་དུང་ཕྱུར་གཅིག་དང་བྱེ་བ་གསུམ་ལྷག་དགོས།

2016-05-22

ཀྲུང་གོའི་བོད་སྐད་རླུང་འཕྲིན་དྲ་བ་ནས་གནས་ཚུལ་ཤེས་རྟོགས་བྱུང་དོན།《གསར་འགྱུར་གཟའ་འཁོར་དུས་དེབ》ཐོག་སྤེལ་བའི་གནས་ཚུལ་ལྟར་ན།མིའི་རིགས་ཀྱི་ལོ་རྒྱུས་སྟེང་གི་མིའི་མགོ་བོ་ཕན་ཚུན་བརྗེ་བའི་གཤགས་བཅོས་ཐོག་མ་དེ་ཉིད2017ལོའི་ལོ་མཇུག་ལ་བྱེད་གྲབས་ཡོད་ཅིང་།མིའི་མགོ་བོ་ཕན་ཚུན་བརྗེ་བར་ཆུ་ཚོད36དགོས་པ་རེད།ཐེངས་འདིའི་གཤགས་བཅོས་ལག་བསྟར་བྱེད་མཁན་ནི་དབྱི་ཐ་ལིའི་དབང་རྩའི་ཕྱི་ནད་ཚན་ཁག་གི་སྨན་པ་སེར་ལྗོ་ཁཱ་ནཱ་ཝེ་རོ་ཡིན།（Sergio Canavero）གཤགས་བཅོས་ཁག་གཉིས་སུ་ཕྱེ་ཡོད།ཁག་དང་པོ་ནི་མགོ་བོ་མཐུད་སྦྱོར་བྱ་རྒྱུ་དང་།ཁག་གཉིས་པ་ནི་རྒྱུངས་པའི་མཉམ་འདྲེས་བྱ་རྒྱུ་དེ་ཡིན།མགོ་བརྗེ་གཤགས་བཅོས་བྱེད་མཁན་གྱི་དང་བླངས་པ་ཝ་ལེ་རེའུ་སི་ཕེར་ཏོ་ནོ་（Valery Spiridonov）ནི་ཨུ་རུ་སིའི་འཕྲུལ་རྩིས་བཟོ་འགོད་པ་ཞིག་ཡིན།ལོ31སོན་པའི་ཁོ་རང་ཤ་ནད་བཀུམ་པའི་ནད་ཕོག་ཡོད་ཅིང་།ཁོང་ལ་ལུས་པོ་ཞལ་འདེབས་རྒྱག་མཁན་ནི་ཀླད་ཤི་ནད་པ་ཞིག་ཡིན།སྨན་པ་ཁཱ་ནཱ་ཝེ་རོའི་འཆར་གཞི་ལྟར་ན།ཐེངས་འདིའི་གཤགས་བཅོས་ལ་ཆུ་ཚོད36དགོས་ཤིང་།འགྲོ་གྲོན་ཨ་སྒོར་ཁྲི་2000དང་།གཤགས་བཅོས་བརྒྱུད་རིམ་ཁྲོད་སྨན་པ་དང་།ནད་གཡོག ལག་རྩལ་མི་སྣ།སེམས་ཁམས་རིག་པ་བ་དང་རྟོག་བཟོས་མངོན་སུམ་བཟོ་བཀོད་བཅས་ཉུང་མཐར་ཡང་མི150ཞུགས་དགོས།ཐེངས་འདིའི་གཤགས་བཅོས་ནི་ཚོགས་པ་གཉིས་ཀྱིས་གཤགས་བཅོས་དུས་མཚུངས་སུ་ལས་ཀ་མཉམ་སྒྲུབ་བྱ་དགོས་ཤིང་།ཚོགས་པ་གཅིག་གིས་སི་ཕེར་ཏོ་ནོ་ལ་ལྟ་རྟོག་བྱེད་དགོས་པ་དང་།ཚོགས་པ་གཞན་ཞིག་གིས་ལུས་པོ་ཞལ་འདེབས་རྒྱག་མཁན་ལ་ལྟ་རྟོག་བྱེད་དགོས།དེའི་ཁྲོད་སི་ཕེར་ཏོ་ནོ་ཡི་མགོ་བོ་གྲང་འགྱུར་བྱེད་དགོས་པས་གནས་སྐབས་ཀྱི་ཀླད་ཤི་འབྱུང་སྲིད།ཤེས་རྟོགས་བྱུང་བར་གཞིགས་ན།འཛམ་གླིང་གི་སྲོག་ཆགས་ཀྱི་མགོ་བོ་བརྗེ་བའི་གཤགས་བཅོས་ཐོག་མ་ནི1970ལོར་བྱས་ཤིང་།ཚོད་ལྟ་བྱ་ཡུལ་ནི་སྤྲེའུ་ཞིག་ཡིན་ལ་སྤྲེའུ་དེ་གཤགས་བཅོས་སྟེགས་བུར་གནས་སྐབས་འཚོ་ཡང་ཉིན་ཤས་འདས་རྗེས་མགོ་ལུས་མཐུས་འདྲེས་ཇི་བཞིན་མ་བྱུང་བས་ཤི་བ་རེད།སྨན་པ་ཁཱ་ནཱ་ཝེ་རོས་གཤགས་བཅོས་དང་བླངས་པ་ཝ་ལེ་རེའུ་སི་ཕེར་ཏོ་ནོ་ལ་མགོ་བོ་བརྗེ་བའི་གཤགས་བཅོས་བྱས་རྗེས་མགོ་ལུས་ཇི་བཞིན་མཐུད་འདྲེས་འབྱུང་ཐུབ་པར་མ་ཟད་ལོ་གཅིག་གི་རྗེས་སུ་འགྲོ་ཐུབ་པའི་སྔོན་དཔག་བྱས་པ་རེད།དུས་མཚུངས་སུ་གཤགས་བཅོས་ལས་ཀ་དེ་ལམ་དུ་ལྷོང་མི་སྲིད་པའི་འདོད་ཚུལ་བྱུང་ཞིང་།མི་ཆོས་ཀྱི་ཀུན་སྤྱོད་ཐད་ཀྱི་གནད་དོན་ཡང་སྤྱི་ཚོགས་ཡོངས་ཀྱི་རྩོད་གླེང་གི་གཞིར་གྱུར་པ་རེད།།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10