ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།　ཡེ་མིན་སྲིད་གཞུང་གི་འཐུས་ཚབ་ཚོགས་པས་ཟླ་ལྔ་བའི་ཚེས་གཅིག་ཉིན་མཉམ་འབྲེལ་རྒྱལ་ཚོགས་ཀྱི་ཡེ་མིན་དམིགས་བསལ་ཕོ་ཉ་ཞེ་ཧི་ཨེ་ཧཱ་མེད་ཏི་ལ་བརྡ་བཏང་སྟེ། ཧུའུ་སེ་དྲག་ཆས་པས་འཁྲུག་རྩོད་མཚམས་འཇོག་པའི་གྲོས་མཐུན་ལ་གཏོར་བརླག་བྱས་པའི་དབང་གིས་ཡེ་མིན་སྲིད་གཞུང་ཕྱོགས་ཁི་ཝེ་ཐིའི་ཞི་བའི་གྲོས་མོལ་ལ་ཞུགས་མཚམས་འཇོག་རྒྱུ་ཡིན་ཟེར།

མིང་བཤད་མི་འདོད་པའི་སྲིད་གཞུང་གི་དཔོན་རིགས་ཤིག་གིས་གསར་འགོད་པར་བཤད་རྒྱུར། སྲིད་གཞུང་གི་འཐུས་ཚབ་ཚོགས་པ་ཁྲིད་པའི་ཡེ་མིན་གྱི་ཕྱི་འབྲེལ་བློན་ཆེན་ཨ་པུའུ་ཏུའུ་ལེ་མཱ་ལེ་ཁི་ཡིས་མཉམ་འབྲེལ་རྒྱལ་ཚོགས་ཀྱི་ཆེད་མངག་ཕོ་ཉར་དངོས་སུ་བརྡ་བཏང་སྟེ། ཧུའུ་སེ་དྲག་ཆས་པས་ཨ་མུའུ་ལན་ཞིང་ཆེན་ནས་ཐཱ་དབྱེ་ཙི་ཞིང་ཆེན་ནས་འཁྲུག་རྩོད་མཚམས་འཇོག་པའི་གྲོས་མཐུན་ལ་གཏོར་བརླག་བྱས་པ་དང་། ཡེ་མིན་སྲིད་གཞུང་ཕྱོགས་ཞི་བའི་གྲོས་མོལ་ལ་ཞུགས་མི་སྲིད་ལ། ཧུའུ་སེ་དྲག་ཆས་པའི་རྒྱུན་ཆད་མེད་པའི་དམག་དོན་འགུལ་སྐྱོད་དང་མེ་སྒྱོགས་ཀྱི་འཇབ་རྒོལ་ལ་རྒོལ་ལན་སྤྲོད་རྒྱུ་ཡིན་ཟེར།

བསྒྲགས་པའི་གནས་ཚུལ་ལྟར་ན། ཧུའུ་སེ་དྲག་ཆས་པས་ཟླ་བཞི་བའི་ཚེས་སུམ་ཅུའི་ཉིན་ཡེ་མིན་སྲིད་གཞུང་གི་ཨ་མུའུ་ལན་ཞིང་ཆེན་དུ་ཡོད་པའི་དམག་དོན་རྟེན་གཞི་ཞིག་ལ་འཇབ་རྒོལ་བྱས་ཏེ། དམག་མི་བཅུ་ཕྲག་འགའ་རྐྱེན་ལམ་དུ་ཤོར་བ་དང་། མཚོན་ཆ་ཆེ་གྲས་མང་བོ་འཕྲོག་ཟེར།

དེའི་སྔོན་ཞེ་ཧི་ཨེ་ཧཱ་མེད་ཏི་ཡིས་བསྟན་དོན། ཡེ་མིན་གནད་དོན་དེ་དུས་ཡུན་ཐུང་ངུའི་ནང་ཐག་གཅོད་བྱེད་ཐབས་མེད་པ་དང་། བྲེལ་མྱུར་གྱིས་བཏོན་པའི་ཇུས་གཞི་དེར་ཞན་ཆ་ཡོད་པ་དང་ཡུན་རིང་མི་སྲིད་ཟེར།