ཟླ་བཞི་བའི་ཚེས་ཉེར་དགུ་ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕེན་གྱི་གཟབ་ཏན་ཏན་ཏིག་ཏིག་གསུམ་གྱི་མཆན་བཀོད་མཛུབ་སྟོན་གྱི་དགོངས་དོན་ལག་ལེན་མཐར་ཕྱིན་བྱེད་ཆེད། མཚོ་སྔོན་ཞིང་ཆེན་ལས་བྱེད་པ་རྒན་པ་ཅུའུ་དང་ཞིང་ཆེན་མི་རབས་རྗེས་མར་སེམས་ཁུར་བྱེད་པའི་བྱ་བའི་ཨུ་ཡོན་ལྷན་ཁང་གཉིས་ཀྱིས་མགོ་བཟུང་ནས་སྒྲུབ་པའིམཚོ་སྔོན་ཞིང་ཆེན་གྱི་ཚང་མས་མཉམ་དུ་གཙང་གསུམ་འབྱུང་ཡུལ་ལ་སྲུང་སྐྱོབ་བྱེད་པའི་སྡོང་འཛུགས་འགུལ་སྐྱོད་སྐབས་གཉིས་པ་དེ་རྨ་ལྷོ་བོད་རིགས་རང་སྐྱོང་ཁུལ་དམེ་ཤུལ་ནགས་ར་ནས་སྤེལ་མགོ་བརྩམས་པ་དང་། མཚོ་སྔོན་ཞིང་ཆེན་མི་རབས་རྗེས་མར་སེམས་ཁུར་བྱེད་པའི་བྱ་བའི་ཨུ་ཡོན་ལྷན་ཁང་གི་ཀྲུའུ་རིན་སངས་རྒྱས་རྒྱལ་དང་རྒྱུན་ལས་ཀྲུའུ་རིན་གཞོན་པ་ལིས་མེན་ཅིན། ཀྲུའུ་རིན་གཞོན་པ་ལིག་ཞའོ། ཧན་ཡུས་ཀོས། ཞིང་ཆེན་ལས་བྱེད་པ་རྒན་པ་ཅུའུ་དང་ཞིང་ཆེན་ནགས་ལས་ཐིན། གུང་གཞོན་ཚོགས་པ་མཚོ་སྔོན་ཞིང་ཆེན་ཨུ་ཡོན་ལྷན་ཁང་། གཙང་གསུམ་འབྱུང་ཡུལ་སྲུང་སྐྱོབ་ཐེབས་རྩ་ཚོགས་པ། རྨ་ལྷོ་ཁུལ་ཏང་ཨུ་དང་ཁུལ་སྲིད་གཞུང་བཅས་འབྲེལ་ཡོད་སྡེ་ཁག་མགོ་ཁྲིད་དང་རྒན་པ་ལྔ། ན་གཞོན་ལོ་ཆུང་སློབ་མའི་འཐུས་མི་བཅས་བྱ་འགུལ་ཁྲོད་ཞུགས།

བྱ་འགུལ་སྐབས་སུ། སངས་རྒྱས་རྒྱལ་གྱིས་སྐུལ་སློང་གཏམ་བཤད་སྤེལ། ཁོས་བསྟན་དོན། མཚོ་སྔོན་གྱི་རྒྱལ་ཡོངས་སྐྱེ་ཁམས་དཔལ་ཡོན་འཛུགས་སྐྲུན་ཁྲོད་ཁྱད་འཕགས་དང་གལ་ཆེ་བའི་གོ་གནས་ཟིན་ཡོད་པས། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་མཚོ་སྔོན་གྱི་སྐྱེ་ཁམས་འཛུགས་སྐྲུན་ཐད་ཧ་ཅང་མཐོང་ཆེན་བྱེད་བཞིན་ཡོད། ཐེངས་འདིའི་སྡོང་འཛུགས་འགུལ་སྐྱོད་ཀྱིས་ཞིང་ཆེན་ཡོངས་ཀྱི་རྒྱ་ཆེའི་རྒན་པ་ལྔ་དང་ན་གཞོན་ལོ་ཆུང་གིས་ལྗང་བསྒྱུར་གྱི་འགན་འཁྲི་བརྒྱུད་སྒྲོག་དང་ལྗང་བསྒྱུར་གྱི་སྙིང་སྟོབས་རྒྱུད་འཛིན་བྱེད་པའི་ཐད་དོན་སྙིང་གལ་ཆེན་ལྡན་པ་དང་། ས་ཆ་སོ་སོ་དང་འབྲེལ་ཡོད་སྡེ་ཁག་སོ་སོས་མུ་མཐུད་དུ་ཕན་ཡོད་བྱེད་ཐབས་བཀོལ་སྤྱོད་བྱས་ནས། ན་གཞོན་ལོ་ཆུང་ཚོའི་ཆུང་དུས་ནས་ཁོར་ཡུག་སྲུང་སྐྱོབ་ཀྱི་འདུ་ཤེས་འཛུགས་པ་དང་། བདེ་ཐང་གི་འཚོ་བའི་རྣམ་པ་གདམ་བསེས་བྱེད་པར་སྣེ་ཁྲིད་བྱེད་པ་དང་། ནུས་ཁུངས་གྲོན་ཆུང་བྱེད་པའི་གོམས་སྲོལ་བཟང་བོ་སྐྱེད་སྲིང་བྱེད་པ། ཐཱན་ཉུང་འཛད་སྤྱོད་དར་སྤེལ་གཏོང་བ་དང་ལྗང་མདོག་ཡུལ་སྐོར་ལ་སྐུལ་འདེད་བཏང་སྟེ། རབ་མཛེས་མཚོ་སྔོན་འཛུགས་སྐྲུན་དང་མཛེས་སྡུག་གི་ཀྲུང་གོ་འཛུགས་སྐྲུན་བྱེད་པའི་ཐད་སྟོབས་ཤུགས་འདོན་དགོས་ཟེར།

རྒྱུས་ལོན་བྱུང་བ་ལྟར་ན། འགུལ་སྐྱོད་དེ་ན་ནིང་ནས་སྤེལ་བའི་ཚུན་ནས། ལས་བྱེད་པ་རྒན་པ་ཚོས་དཔེ་སྟོན་དང་སྣེ་ཁྲིད་འོག བློ་མཐུན་རྒན་པ་དང་ན་གཞོན་ལོ་ཆུང་མང་པོ། སྤྱི་ཚོགས་རིགས་སོ་སོའི་སྟོབས་ཤུགས་གཙང་གསུམ་འབྱུང་ཡུལ་གྱི་སྐྱེ་ཁམས་ཁོར་ཡུག་ལ་སྲུང་སྐྱོབ་བྱེད་པའི་བཟོ་སྐྲུན་ཆེན་པོ་ཁྲོད་ཞུགས་ནས། སྤྱི་ཚོགས་ཕན་འབྲས་བཟང་བོ་བླངས།