ཞིན་ཧྭ་གསར་འགྱུར་ཁང་ལན་ཀྲུའུ་ནས་ཟླ4པའི་ཚེས6ཉིན་འབྱོར་བའི་གཏམ་གསར།  གོང་ཚེས་ཉིན་གྱི་སྔ་དྲོར།  ཀན་སུའུ་ཞིང་ཆེན་གྱི་འབྲེལ་དྲྭའི་སྨན་ཁང་དྲྭ་ཐོག་ཏུ་དངོས་སུ་འཁོར་སྐྱོད་བྱས་པ་རེད། ཤེས་རྟོགས་བྱུང་བར་གཞིགས་ན།  ཀན་སུའུ་ཞིང་ཆེན་གྱི་འབྲེལ་དྲྭའི་སྨན་ཁང་ནི་ནུབ་བྱང་ས་ཁུལ་གྱི་ཆེས་ཐོག་མའི་ཞིང་ཆེན་རིམ་པའི་འབྲེལ་དྲྭའི་སྨན་ཁང་ཡིན་པའི་ཆ་ནས་རང་རྒྱལ་གྱི་ནུབ་རྒྱུད་ཞིང་ཆེན་ས་ཁུལ་དང་ལྷག་པར་དུ་བོད་ཁུལ་གྱི་མང་ཚོགས་ལ་སྤུས་དག་ཅིང་སྟབས་བདེ་བའི་སྨན་བཅོས་ཞབས་འདེགས་མཁོ་སྤྲོད་བྱེད་ཐུབ་པ་རེད།མིག་སྔར། ཀན་སུའུ་ཞིང་ཆེན་གྱི་འབྲེལ་དྲྭའི་སྨན་ཁང་གིས་ཚན་པ་དང་པོར་ཀན་སུའུ་ཞིང་ཆེན་གྱི་མི་དམངས་སྨན་ཁང་ཨང་གཉིས་པ་དང་ཀན་སུའུ་ཝུའུ་ཝེ་སྐྲན་ནད་སྨན་ཁང་། ཀན་ལྷོ་བོད་རིགས་རང་སྐྱོང་ཁུལ་ཅོ་ནེ་རྫོང་སོགས་རྫོང20ལྷག་གི་མི་དམངས་སྨན་ཁང་དང་གཞི་རིམ་སྨན་བཅོས་ལས་ཁུངས་ཁ་ཤས་བཅས་ལ་དྲྭ་སྦྲེལ་བྱས་ཚར་བ་དང་། ཚན་པ་རྗེས་མའི་ནང་ལའང་སྨན་ཁང20ལ་དྲྭ་སྦྲེལ་བྱ་རྒྱུ་རེད། ངོ་སྤྲོད་བྱས་པར་གཞིགས་ན།  ཕྱིན་ཆད་ཀན་སུའུ་ཞིང་ཆེན་མ་ཚད་ནུབ་བྱང་ས་ཁུལ་གྱི་ནད་པའང་ཀན་སུའུ་ཞིང་ཆེན་གྱི་འབྲེལ་དྲྭའི་སྨན་ཁང་གི་ལས་སྟེགས་ཐོག་ཁ་པར་སོགས་བརྒྱུད་ནས་ཁ་ཆད་ཨང་ཐོ་འགོད་ཆོག་པ་དང་། དྲྭ་རྒྱའི་བརྙན་འཕྲིན་བརྒྱུད་ནས་ནད་བརྟག་སྨན་བཅོས་བྱེད་ཆོག་པ་དང་གློག་རྡུལ་གྱིས་སྨན་ཐོ་འགོད་པ་དང་སྨན་སྡེབ་ཀྱང་བྱེད་ཆོགཔ་རེད།ཀན་སུའུ་ཞིང་ཆེན་གྱི་འབྲེལ་དྲྭའི་སྨན་ཁང་མཉམ་འཛུགས་བྱེད་མཁན་ཀན་སུའུ་ཞིང་ཆེན་གྱི་མི་དམངས་སྨན་ཁང་ཨང་གཉིས་པའི་ཡོའན་ཀྲང་སྨི་ཏེང་ཧའེ་ཡིས་ཀན་སུའུ་ཞིང་ཆེན་གྱི་འབྲེལ་དྲྭའི་སྨན་ཁང་ནི་ནུབ་བྱང་ས་ཁུལ་གྱི་ཆེས་ཐོག་མའི་ཞིང་ཆེན་རིམ་པའི་འབྲེལ་དྲྭའི་སྨན་ཁང་ཡིན་པས།  འབྲེལ་དྲྭའི་སྨན་ཁང་གིས་རིམ་པ་སྟར་ཆགས་ཀྱིས་དྲྭ་སྦྲེལ་བྱས་པ་དེས་བོད་ཁུལ་དང་རྒྱང་རིང་ས་ཁུལ་བར་ལ་སྨན་བཅོས་ཀྱི་འགྲོ་ལམ་ཐོགས་པ་མེད་པ་ཞིག་བསྐྲུན་ཞིང་བོད་ཁུལ་མང་ཚོགས་ཀྱིས་ཐག་ཉེ་བའི་སྨན་ཁང་དང་ཐ་ན་རང་གི་དྲྭ་རྒྱའི་སྒྲིག་ཆས་ལ་བརྟེན་ནས་སྨན་ཁང་ཆེན་པོའི་ཆེད་རམས་པ་བཙལ་ཐུབ་པ་རེད་ཅེས་གསུངས།