རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་ཟླ་བཞི་བའི་ཚེས་དྲུག་ཉིན་མགོ་འཛིན་མཛད་དེ་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་བསྡུས་ནས། «སྒྲིག་ཆས་བཟོ་སྐྲུན་ལས་རིགས་ཆུ་ཚད་ཅན་དུ་བསྒྱུར་བ་དང་རྒྱུ་སྤུས་མཐོར་འདེགས་བྱེད་པའི་འཆར་འགོད»ལག་བསྟར་བྱས་ཏེ། ཀྲུང་གོའི་བཟོ་སྐྲུན་རིམ་སྤོར་ལ་སྣེ་ཁྲིད་བྱེད་རྒྱུའི་ཐད་བཅད་པ་དང་། མཉམ་འབྲེལ་དྲ་རྒྱ་དང་འགྲོ་རྒྱུག་འགུལ་སྐྱོད་སྤེལ་ནས། མ་རྩ་ཇེ་དམའ་རུ་གཏོང་བ་དང་ནང་མཁོ་རྒྱ་བསྐྱེད་པ། ལས་ཞུགས་ཚད་ཇེ་མཐོར་གཏོང་བར་སྐུལ་འདེད་བྱེད་པ། 2016ལོའི་སྨན་བཅོས་འཕྲོད་བསྟེན་སྒྲིག་གཞིའི་བཅོས་བསྒྱུར་གཏིང་ཟབ་ཏུ་སྤེལ་བའི་གཙོ་གནད་གཏན་ཁེལ་བྱས་ཏེ། སྨན་བཅོས་བཅོས་བསྒྱུར་ཐད་ཀྱི་ཁེ་སྤོགས་ཀྱིས་མི་དམངས་མང་ཚོགས་ལ་ཕན་འདོགས་ཐུབ་པ་བཅས་བྱས།

ཚོགས་ཐོག་ནས་ཚད་གཞིས་སྣེ་ཁྲིད་བྱེད་པར་རྒྱུན་འཁྱོངས་བྱས་ནས། བཟོ་སྐྲུན་ཐད་ཀྱི་སྟོབས་ལྡན་རྒྱལ་ཁབ་འཛུགས་སྐྲུན་བྱེད་རྒྱུ་ནི། གྲུབ་ཚུལ་རང་བཞིན་གྱི་བཅོས་བསྒྱུར་དང་ལྷག་པར་དུ་མཁོ་འདོན་ལོགས་ཀྱི་གྲུབ་ཚུལ་རང་བཞིན་གྱི་བཅོས་བསྒྱུར་གྱི་ནང་དོན་གཙོ་བ་ཡིན་ལ། དེས་མཁོ་འདོན་ལེགས་བསྒྱུར་དང་། དགོས་མཁོ་རྒྱ་བསྐྱེད་པའི་ཐད་ཕན་བཏགས་ཏེ། ཐོན་རྫས་ཐོན་ལས་ཚད་རིམ་མཐོ་འབྲིང་དུ་བསྐྱོད་པར་སྐུལ་འདེད་བྱེད་དགོས་ཟེར། ཚོགས་ཐོག་ནས་སྒྲིག་ཆས་བཟོ་སྐྲུན་ལས་རིགས་ཚད་ལྡན་ཅན་དུ་བསྒྱུར་བ་དང་རྒྱུ་སྤུས་མཐོར་འདེགས་བྱེད་པའི་འཆར་འགོད་ལ་གྲོས་འཆམ་བྱུང་བ་དང་། ཀྲུང་གོའི་བཟོ་སྐྲུན2025ལ་སྦྲེལ་མཐུད་བྱེད་པའི་རེ་བ་བཏོན་ལ། རྒྱལ་སྤྱིའི་སྔོན་ཐོན་ཆུ་ཚད་ལ་དམིགས་ནས། བཟོ་ལས་རྨང་གཞིའི་རིག་ནུས་བཟོ་སྐྲུན་དང་ལྷད་མེད་བཟོ་སྐྲུན་ཚད་ལྡན་ཅན་དུ་བསྒྱུར་བ་དང་རྒྱུ་སྤུས་མཐོར་འདེགས་བྱེད་པའི་བཟོ་སྐྲུན་ལག་བསྟར་བྱེད་པ་དང་། གནད་འགག་ལག་རྩལ་ཚད་ལྡན་དུ་བསྒྱུར་བ་དང་ཞིབ་འཇུག་སྒྲིག་བཟོ་བྱེད་པ། འཕྲུལ་ཆས་མི་དང་སྔོན་ཐོན་ལྕགས་ལམ་འགྲིམ་འགྲུལ་སྒྲིག་ཆས། ཞིང་ལས་འཕྲུལ་ཆས། རྩོལ་ནུས་མཐོ་བའི་སྨན་བཅོས་འཕྲུལ་ཆས་སོགས་ཁྱབ་ཁོངས་གཙོ་བོ་ཚད་ལྡན་དུ་བསྒྱུར་བའི་ཐད་ནས་མཆོང་བརྒལ་གསར་བ་བྱེད་པར་སྐུལ་འདེད་བྱས་ཏེ། 2020ལོའི་བར་དུ་ཁྱབ་ཁོངས་གཙོ་བོའི་རྒྱལ་སྤྱིའི་ཚད་ལྡན་ཅན་དུ་བསྒྱུར་བའི་ཚད་དེ་མིག་སྔར་གྱི་བརྒྱ་ཆའི་བདུན་ཅུ་ནས་བརྒྱ་ཆའི་དགུ་བཅུའི་ཡན་དུ་མཐོར་འདེགས་བྱེད་པར་བརྩོན་ལེན་བྱེད་རྒྱུ་རེད།

ཚོགས་ཐོག་ནས་བསྟན་དོན། མཉམ་འབྲེལ་དྲ་རྒྱ་དང་འགྲོ་རྒྱུག་འགུལ་སྐྱོད་ལག་བསྟར་བྱེད་རྒྱུ་ནི་འགྲོ་རྒྱུག་ཐད་ཀྱི་གསར་བརྗེ་དང་། དམངས་ཀྱིས་བྱ་གཞག་བསྐྲུན་པ་དང་ཀུན་གྱིས་གསར་གཏོད་བྱེད་པར་སྐུལ་འདེད་བྱེད་པ། དཔལ་འབྱོར་གསར་བ་འཕེལ་རྒྱས་སུ་གཏོང་བའི་བྱེད་ཐབས་གཙོ་བོ་ཡིན་ལ། དེས་མ་རྩ་ཇེ་དམའ་རུ་གཏོང་བ་དང་ཕན་འབྲས་ཇེ་མཐོར་བཏང་སྟེ། འཛད་སྤྱོད་དང་ལས་ཞུགས་ལ་སྐུལ་འདེད་བྱེད་ཐུབ་ཟེར།

ཚོགས་ཐོག་ནས་བསྟན་དོན། སྐོར་ཐེངས་གསར་བའི་སྨན་བཅོས་བཅོས་བསྒྱུར་ཐད་ནས་གྲུབ་འབྲས་མངོན་གསལ་བླངས་བ་དང་། མི་དམངས་ཀྱི་བདེ་ཐང་ཆུ་ཚད་དང་མི་རེའི་ཆ་སྙོམས་ཀྱི་ཚེ་ཚད་སྔར་ལས་ཇེ་མཐོར་བཏང་ཟེར། ཚོགས་ཐོག་ནས2016ལོའི་སྨན་བཅོས་བཅོས་བསྒྱུར་ཐད་ཀྱི་གཙོ་གནད་གཏན་ཁེལ་བྱས་པ་སྟེ། གཅིག་ནི་གྲོང་ཁྱེར་གྱི་གཞུང་བཙུགས་སྨན་ཁང་གི་ཕྱོགས་བསྡུས་བཅོས་བསྒྱུར་ཚོད་ལྟའི་གྲོང་ཁྱེར་གྱི་གྲངས་ཀ་དེ་མིག་སྔར་བརྒྱ་ནས་ཉིས་བརྒྱ་རུ་རྒྱ་བསྐྱེད་པ་དང་། གཉིས་ནི་རྒྱལ་ཡོངས་ཀྱི་བརྒྱ་ཆའི་བདུན་ཅུའི་ཡས་མས་ཀྱི་ས་ཁུལ་དང་གྲོང་ཁྱེར་ནས་རིམ་པ་བགོས་ནས་སྨན་བཅོས་བྱེད་པའི་ཚོད་ལྟ་སྤེལ་བ་དང་། གཞུང་བཙུགས་སྨན་ཁང་དུ་བྱ་བ་སྒྲུབ་བཞིན་པ་དང་ཡང་ན་ལས་ཁྱུར་ངལ་གསོ་བྱས་པའི་སྨན་པ་གཞི་རིམ་གྱི་སྨན་བཅོས་སྡེ་ཁག་ཏུ་སོང་ནས་སྨན་བཅོས་བྱ་བ་བསྒྲུབ་པ་དང་ཡང་ན་བྱ་བ་ཁང་འཛུགས་པའི་ཚོད་ལྟའི་བྱ་བ་སྤེལ་བ། གསུམ་ནི་ཁ་གསབ་རྐྱེན་སྲོལ་འཐུས་ཚང་དུ་བཏང་སྟེ། གསར་བཙུགས་ཚོད་ལྟའི་གྲོང་ཁྱེར་གྱི་གཞུང་བཙུགས་སྨན་ཁང་གི་སྨན་རྫས་རིན་གོང་ཇེ་དམའ་རུ་གཏོང་བ་དང་། སྨན་བཅོས་བརྟག་དཔྱད་ཐད་ཀྱི་རིན་གོང་ལ་ཚོད་འཛིན་བྱེད་པ། བཞི་ནི་གཞུང་བཙུགས་སྨན་ཁང་གི་སྨན་རྫས་གཅིག་བསྡུས་སྒོས་ཉོ་བསྡུ་བྱེད་པ་དང་། སྨན་རྫས་བཟོ་གྲྭ་ནས་ཕྱིར་འཚོང་བའི་རིན་གོང་ཐད་ཀྱི་ཆ་འཕྲིན་ཕུགས་འདེགས་བྱེད་པའི་རྐྱེན་སྲོལ་འཛུགས་པ། ལྔ་ནི་གཞི་རིམ་སྨན་བཅོས་སྡེ་ཁག་གི་གྲུབ་འབྲས་ལ་བལྟས་ནས་ཟླ་ཕོགས་སྟེར་བའི་ལམ་ལུགས་འཐུས་ཚང་དུ་གཏོང་བ་དང་། ཚོད་ལྟའི་གྲོང་ཁྱེར་གྱིས་གཞུང་བཙུགས་སྨན་ཁང་གི་གྲུབ་འབྲས་ལ་བལྟས་ནས་ཟླ་ཕོགས་སྟེར་བའི་སྤྱིའི་གྲངས་ཀ་གཏན་འབེབས་བྱེད་པའི་བྱེད་ཐབས་འཛུགས་པར་སྐུལ་འདེད་བྱེད་པ་བཅས་རེད།

ཚོགས་ཐོག་ནས་ད་དུང་བྱ་བ་གཞན་པར་ཞིབ་འཇུག་བྱས།