རྒྱུས་ལོན་པ་ལྟར་ན། 2016ལོའི་དཔྱིད་འགོའི་སློབ་སྐབས་ནས་བཟུང་། མཚོ་སྔོན་ཞིང་ཆེན་གྱིས་ལོ15ཡི་རིན་མེད་སློབ་གསོ་སྤེལ་རྒྱུ་ཡིན་ཞིང་། “ལོ་ལྔའི་འཆར་འགོད་བཅུ་གསུམ”གྱི་མཇུག་ཏུ་ཞིང་ཆེན་ཡོངས་སུ་ཁེབས་པར་བྱ་རྒྱུ་རེད།ཉེ་ཆར་བསྡུས་པའི་མཚོ་སྔོན་ཞིང་ཆེན་སློབ་གསོ་ཐིན་གྱི་བྱ་བའི་གྲོས་ཚོགས་སུ་སློབ་གསོའི་དམངས་ཕན་གྱི་གསར་འགྱུར་འགའ་ཁྱབ་བསྒྲགས་བྱས་ཤིང་། ལོ15ཡི་རིན་མེད་སློབ་གསོ་སྤེལ་རྒྱུ་དེ་ནི་དེའི་གྲས་ཤིག་ཡིན། 2016ལོའི་དཔྱིད་འགོའི་སློབ་སྐབས་ནས་བཟུང་། མཚོ་སྔོན་ཞིང་ཆེན་གྱི་མཚོ་ལྷོ་ཁུལ་དང་། མཚོ་བྱང་ཁུལ། རྨ་ལྷོ་ཁུལ། མགོ་ལོག་ཁུལ། ཡུལ་ཤུལ་ཁུལ་བཅས་བོད་རིགས་རང་སྐྱོང་ཁུལ5དང་། མཚོ་ནུབ་སོག་རིགས་བོད་རིགས་རང་སྐྱོང་ཁུལ་གྱི་སློབ་མ་ཡོངས། དེ་མིན་ཟི་ལིང་གྲོང་ཁྱེར་དང་། མཚོ་ཤར་གྲོང་ཁྱེར་གྱི་དབུལ་ཕོངས་ཁྱིམ་ཚང་གི་སློབ་མ་བཅས་ཀྱིས་སློབ་སྔོན་སློབ་གསོ་དང་སློབ་ཆུང་གི་སློབ་གསོ། སློབ་འབྲིང་སློབ་གསོ་བཅས་འདུས་པའི་ལོ15ཡི་རིན་མེད་སློབ་གསོ་མྱོང་ཐུབ་ཅིང་། “ལོ་ལྔའི་འཆར་འགོད་བཅུ་གསུམ”གྱི་མཇུག་ཏུ་ཞིང་ཆེན་ཡོངས་སུ་ཁེབས་པར་བྱ་རྒྱུ་རེད།