མི་དམངས་དྲ་བའི་འཕྲིན།གསར་འགོད་པས་མཚོ་བོད་ལྕགས་ལམ་ཀུང་སི་ནས་ཤེས་རྟོགས་བྱས་པ་ལྟར་ན།ཀྲུང་གོ་ལྕགས་ལམ་སྤྱི་ཁྱབ་ཀུང་སིའི་གཅིག་གྱུར་འཆར་འགོད་གཞིར་བཟུང་དཔྱིད་གསར་དུས་ཆེན་གོང་གི་ཟླ་2ཚེས་4ཉིན་བོད་ལྗོངས་ནས་བྱང་ཤར་དུ་ཐད་ཀར་སྐྱོད་པའི་འགྲུལ་སྐྱེལ་མེ་འཁོར་ཐོག་མ་གཏོང་རྩིས་ཡོད་པ་རེད།ཤེས་རྟོགས་བྱུང་བ་ལྟར་ན།ད་རེས་ཀྱི་འགྲུལ་སྐྱེལ་མེ་འཁོར་གྱི་གཏོང་འགོ་འཛུགས་ས་ནི་བོད་ལྗོངས་ལྷ་སའི་བབས་ཚུགས་དང་མཇུག་རྫོགས་ས་ནི་ལེའོ་ཉིང་ཧྲེན་དབྱང་བྱང་ཚུགས་ཡིན།མཚོ་བོད་ལྕགས་ལམ་དང་།ལན་མཚོ་ལྕགས་ལམ།པའོ་ལན་ལྕགས་ལམ།ཐའེ་ཀྲུང་དབྱིན་ལྕགས་ལམ།ཅིང་ཀོང་ལྕགས་ལམ་སོགས་ལམ་ཐིག་བརྒྱུད་པ་དང་།བོད་ལྗོངས་དང་།མཚོ་སྔོན།ཀན་སུའུ།ཉིང་ཞ།ཧྲའན་ཤིས།ཧྲན་ཤིས།ཧོ་པེ།པེ་ཅིང་།ལེའོ་ཉིང་བཅས་ཞིང་ཆེན་དང་།གྲོང་ཁྱེར།རང་སྐྱོང་ལྗོངས་བཅས་9བརྒྱུད་ཀྱི་ཡོད་ཅིང་།པེ་ཅིང་ནུབ་ཚུགས་སུ་མུ་མཐུད་འགྲུལ་པ་མེ་འཁོར་དུ་བསྡད་ནས་བསྐྱོད་རྒྱུ་རེད།མེ་འཁོར་གཏོང་ཐེངས་ནི་ལྷ་ས་ནས་པེ་ཅིང་ནུབ་བར་གྱི་ཐེངསZ22དང་པེ་ཅིང་ནུབ་ནས་ཧྲེན་དབྱང་བྱང་བར་གྱི་ཐེངས་Z622སུ་གནས་སྐབས་གཏན་འཁེལ་བྱས་ཡོད་ལ་ལམ་ཐག་རྐྱང་པ་སྤྱི་ལེ་4500ཙམ་ཟིན་པ་དང་སྐྱེལ་འདྲེན་དུས་ཚོད་ཆུ་ཚོད་48ཙམ་འགོར་གྱི་ཡོད།མེ་འཁོར་དེ་25Tམཚོ་བོད་ས་མཐོ་རྣམ་པའི་འགྲུལ་སྐྱེལ་མེ་འཁོར་སྤྱོད་རྒྱུ་ཡིན་པ་དང་།མེ་འཁོར་དེ་མཚོ་བོད་ལྕགས་ལམ་གྱི་ས་བབ་མཐོ་ཤོས་དུམ་བུར་སླེབས་སྐབས་གསོ་རླུང་མཁོ་འདོན་བྱེད་རྒྱུ་ཡིན་པ་རེད།